Mi famia a biba e prome añanan di mi bida cerca di Leipzig, Oost Alemania, no mucho leu for di e fronteranan di Polonia y Republica Checo. Tempo mi tabatin seis aña, nos famia a bay biba na Brazil y despues na Ecuador pa motibo di mi tata su trabou.

Cu 14 aña di edad, mi famia a manda mi un internaat na Alemania. Como cu mi mayornan tabata basta leu, te na Sur America, ta mi mes mester a percura pa mi mes. Mi a bira hopi independiente y mi no tabata worry kico otro hende tabata pensa di mi.

Tempo mi tabatin 17 aña, mi mayornan a bay biba bek na Alemania. Na cuminsamento mi tabata biba cerca nan pero pa motibo di mi actitud independiente mi no por a acepta nan reglanan di cas. Cu 18 aña di edad mi a bay for di cas.

Mi no por a sinta keto y constantemente mi tabata purba di haya un proposito den bida. Mi a experimenta cu diferente estilo di bida y organisacion. Despues di tur esey, mi a yega na e conclusion cu e mihor cos cu mi por a haci cu mi bida tabata di explora nos bunita planeta prome cu hende caba cu ne.

Mi a cumpra un brommer y a sali di Alemania rumbo pa Africa. Pero poco despues mi mester a bay Europa bek pa drecha mi brommer. Despues di esey, mi tabata riba un beach na Portugal. Mi a dicidi di laga mi brommer atras y cuminsa biaha cu barco.

Mi a join un grupo di hoben cu tabata preparando pa crusa Ocean Atlantico. Entre e hobennan ey mi a conoce mi futuro casa, Laurie. Nos a nabega bay e islanan di Caribe. Despues cu nos a keda un tempo cortico na Puerto Rico, nos a bolbe Europa. Nos tabata busca un boto di bela pa nos combertie den un boto den cua nos por a biba. Pero despues cu nos tabatin apenas tres luna ta busca, nos tabatin cu interumpi nos plannan pasobra nan a manda yama mi pa mi drenta servicio militar di Alemania.

Mi a pasa 15 luna den marina Aleman. Durante e tempo ey mi a casa cu Laurie y nos a haci preparacionnan pa ora  mi sali for di marina nos sigui biaha. Net prome cu mi a cuminsa mi servicio militar, nos a cumpra un casca di boto. Pocopoco durante e tempo ey mes, nos a combertie den un boto di bela chikito. Nos tabatin plania pa biba den dje y sigui explora nos bunita planeta. Pero prome cu nos a caba e boto, y poco despues cu mi a sali for di servicio militar, nos a conoce testigonan di Jehova y a cuminsa studia Bijbel cu nan.

Na cuminsamento mi no tabata mira e importancia di cambia mi bida mucho. Mi tabata casa cu e señora cu mi tabata biba cu ne y mi a stop di huma caba. (Efesionan 5:5) Ademas, mi tabata pensa cu un bon cos cu nos por a dedica nos bida na dje tabata di biaha rond mundo y admira Dios su creacion.

Pero, en realidad, mi tabatin cos di cambia si, specialmente na mi personalidad. Mi tabata sumamente orguyoso y mi tabata confia demasiado den mi mes. Mi tabata pensa cu mi ta masha cos, y cu tur cos tabata draai rond di mi.

Un dia, mi tabata lesa Hesus su famoso Sermon Riba Sero. (Mateo capitulo 5-7) Na prome instante mi no tabata compronde loke Hesus a bisa tocante felicidad. Por ehempel, el a bisa cu feliz ta esnan cu tin hamber y sed. (Mateo 5:6) Mi tabata puntra mi mes con un hende cu ta den necesidad por ta feliz. Segun mi tabata siña mas di Bijbel, mi a bin realisa cu nos tur tin un necesidad spiritual, pero cu nos mester ta humilde pa admiti cu nos tin e necesidad ey pa asina nos por yen’e. Ta manera Hesus a bisa: “Feliz ta esnan cu ta consciente di nan necesidad spiritual.”—Mateo 5:3.

Despues cu ami y Laurie a cuminsa studia Bijbel na Alemania, nos a muda bay Francia y despues Italia. Unda cu nos a bay, nos a topa testigonan di Jehova. Mi a keda sumamente impresiona cu nan amor sincero pa otro y nan unidad. Mi a mira cu nan di berdad ta un hermandad mundial. (Juan 13:34, 35) Cu tempo, ami cu Laurie a batisa como testigo di Jehova.

Despues cu mi a batisa, mi a sigui haci cambio na mi personalidad. Ami cu Laurie a dicidi di nabega banda di e costa di Africa bay abou y crusa Ocean Atlantico pa yega Merca. Ta ora nos tabata den e boto chikito ey riba lama grandi, mi a realisa con chikito y insignificante mi ta compara cu nos magnifico Creador. Como cu mi tabatin asina tanto tempo liber (pasobra no tin mucho cos di haci meymey di ocean), mi a dedica mi mes na lesa Bijbel. Mi a keda hopi impresiona cu e relatonan di Hesus su bida aki riba Tera. E tabata un homber perfecto cu mucho mas habilidad di loke mi por a imagina, y toch nunca e no a hala atencion na su mes. E no tabata pensa solamente riba su mes, sino riba su Tata celestial.

Segun cu mi tabata medita riba Hesus su ehempel, mi a mira e necesidad di pone e Reino di Dios na prome luga den mi bida en bes di dedica solamente e tempo cu mi a resta na dje. (Mateo 6:33) Ora cu porfin ami cu Laurie a yega Merca, nos a dicidi di stop di nabega, keda biba eynan y dedica nos mes na nos sirbishi na Dios.

Antes, tempo mi tabata pensa solamente riba mi mes, mi tabata hopi insigur di mi mes. Sinembargo, awor mi a haya un fuente di sabiduria infalibel pa guia mi. (Isaias 48:17, 18) Tambe mi a haya un proposito den bida cu nunca antes mi tabatin; sirbi Dios y yuda otronan siña di dje.

Nos matrimonio a bira hopi mas stabiel pasobra nos ta aplica e principionan di Bijbel. Ademas, nos a ser bendiciona cu un bunita yiu muher, kende tambe stima Jehova.

Nos bida no tabata semper facil. Pero, cu Jehova su yudansa, nos ta determina pa nunca stop di confia den dje.—Proverbionan 3:5, 6.