Eric: Pa mi ta franco cu bo, mi no ta un hende religioso. Pesey, mi no ta kere cu nos tin mucho cos di papia.

Brian: Danki pa bisa mi. Mi nomber ta Brian. Y di bo?

Eric: Eric.

Brian: Mucho gusto, Eric.

Eric: Mucho gusto.

Brian: Mi kier puntra bo algo: Bo a lanta den un famia religioso?

Eric: Si, pero ora mi a cuminsa bay universidad, mi a stop di bay misa.

Brian: M’a compronde. Y kico bo a studia na universidad?

Eric: Ciencia social y historia. Semper mi a gusta historia, esta, con sociedad humano a desaroya a traves di historia.

Brian: Historia ta un topico fascinante. Manera bo sa, Bijbel ta un buki di historia. Bo a yega di analisa loke e ta bisa?

Eric: No. Mi sa cu Bijbel ta un bon buki, pero nunca mi no a mir’e como un buki historico.

Brian: Bo ta parce un hende cu tin un mente habri. Si bo tin un par di minuut, mi kier djis mustra bo con Bijbel ta cuadra cu historia.

Eric: Sigur no. Pero mi no tin un Bijbel.

Brian: No ta problema. Mi por mustra bo den mi mes Bijbel. E prome ehempel ta di 1 Cronicanan capitulo 29, versiculo 26 y 27. Eynan e ta bisa: “Asina David, yiu homber di Isai, a reina riba henter Israel. Y e temporada cu el a reina riba Israel tabata cuarenta aña; el a reina shete aña na Hebron y trintitres tres aña na Jerusalem.”

Eric: Pero, kico bo kier bisa cu esaki?

Brian: Wel, un tempo algun hende tabata bisa cu Rey David nunca no a existi.

Eric: Berdad? Dicon nan tabata duda?

Brian: Pasobra te asina leu ta Bijbel so tabata haci mencion di dje. Pero na aña 1993, un team di arkeologo a descubri un pida piedra cu un palabra riba dje cu traduci ta nifica “Cas di David.”

Eric: Interesante!

Brian: Un otro persona menciona den Bijbel cu hende a duda cu el a existi tabata Poncio Pilato, un gobernador den tempo di Hesus. E ta ser menciona aki na Lucas capitulo 3, versiculo 1, entre varios otro funcionario di gobierno di e epoca ey.

Eric: Si, mi ta mir’e aki. E ta bisa cu “tempo Poncio Pilato tabata gobernador di Judea, Herodes tabata gobernante di districto di Galilea.”

Brian: Corecto. Pa hopi aña algun experto riba tereno di Bijbel a duda cu Poncio Pilato a existi. Pero, mas o menos 50 aña pasa nan a descubri  un piedra na Medio Oriente cu su nomber graba riba dje.

Eric: Ahn si? Nunca mi no a tende di esey.

Brian: Ta pesey mi ta contento pa comparti e informacion aki cu bo.

Eric: Pa ta franco cu bo, semper mi a mira Bijbel como un obra literario; pero mi no ta kere cu e por yuda nos mucho. Kisas e ta cuadra cu historia berdad, pero mi n’ ta kere cu e ta practico pa nos tempo.

Brian: Mi ta sigur cu hopi hende ta pensa mescos cu bo. Pero ami ta wak e otro. Bo sa dicon? Esey ta pasobra e necesidadnan basico di hende no a cambia for di principio te awor. Por ehempel, semper nos tabatin mester di cuminda, paña y un dak riba nos cabes. Y semper nos a sinti e necesidad pa comunica cu otro hende y pa por tin un bida di famia feliz. Tur ta cosnan cu nos ta balora, no ta berdad?

Eric: Bo tin rason.

Brian: Bijbel por yuda nos cu tur e cosnan aki. Nos por bisa cu e ta un buki antiguo pero practico pa nos tempo.

Eric: Con bo kiermen?

Brian: Laga mi pon’e asin’aki: Aunke Bijbel a ser skirbi hopi siglo pasa, e principionan fundamental cu e ta contene ta aplicabel te awe.

Eric: Okay, den ki sentido asina?

Brian: Por ehempel, principionan di Bijbel por yuda nos haya un punto di bista balansa di placa, hiba un bida di famia feliz y ser un bon amigo. E ta manera un mapa cu por guia nos riba nos caminda di bida. Bo no ta haya cu awe no ta facil pa bo por ta un bon esposo y cabes di famia?

Eric: Berdad, eynan si bo tin un punto. Mi tin un aña casa y no ta semper ami cu mi esposa ta di acuerdo cu otro.

Brian: Ta esey ta e reto. Pero Bijbel ta contene conseho practico cu por yuda nos. Laga nos wak un ehempel na Efesionan capitulo 5. Nos por lesa versiculo 22, 23 y 28. Bo por lesa nan?

Eric: Sigur no! E ta bisa: “Laga esposanan ta sumiso na nan esposo, manera nan ta sumiso na Señor, pasobra e esposo ta cabes di su esposa mescos cu Cristo ta cabes di e congregacion, esta, su curpa, di cua e ta salbador.” Anto 28 ta bisa: “Di e manera aki, esposonan mester stima nan esposa manera nan mes curpa. Esun cu ta stima su esposa ta stima su mes.”

Brian: Bon. Danki. Si tur dos partner trata di aplica e conseho simpel aki, bo no ta kere cu nan bida di famia lo mehora?

Eric: Si, mi ta kere cu si. Pero ta mas facil pa bisa cu pa haci.

Brian: Esey ta berdad; niun hende no ta perfecto. Den e mesun capitulo ey di Bijbel tin un texto cu ta conseha nos pa ta rasonabel. * Den tur relacion ta importante pa nos keda balansa y dispuesto pa sede. Bijbel a yuda ami cu mi casa haya e balansa ey.

Eric: Mi ta mira kico bo kiermen.

Brian: Testigonan di Jehova tin un website cu tin conseho practico pa parehanan casa y bida di famia. Si bo tin un par di minuut, mi por mustra bo loke e tin di ofrece.

Eric: Ta bon, mi tin un tiki tempo.

Brian: Nos website ta www.pr418.com/jw-paa y esaki ta su pagina inicial.

Eric: E potretnan ta bunita.

Brian: Eseynan ta duna bo un idea di e trabou di predica cu nos ta haci rond mundo. Aki bo ta haya un tab di “Publicacion.” Bou di dje, bo ta haya revista nobo y otro publicacionnan cu ta trata diferente topico, manera bida di famia. Por  ehempel, laga nos wak e foyeto Dios Tin Bon Noticia pa Nos! Un di su lesnan tin e tema: “Con Bo Por Tin un Famia Feliz?”

Eric: Esey ta un topico interesante. Mi tin gana di sa e contesta.

Brian: E les aki ta menciona varios punto cu por yuda bo pa bo por tin un matrimonio feliz. Wak e paragraf aki, bou di pregunta 2. Bo por lesa e ultimo dos frasenan?

Eric: Si, e ta bisa: “Esposo y esposa mester stima otro y respeta otro. Como cu nan ta imperfecto, nan mester siña pordona otro si nan kier pa nan matrimonio ta feliz.” Hmm, mi ta eens cu esey.

Brian: Danki pa a les’e. Un di e textonan di Bijbel menciona aki ta Efesionan 5:33. Mi tin mi Bijbel aki. Bo por lesa esaki tambe?

Eric: Okay. E ta bisa: “Laga cada un di boso stima su esposa manera e ta stima su mes; di otro banda, e esposa mester tin respet profundo pa su esposo.”

Brian: Bo a ripara cu e enfasis ta riba duna loke cada un ta spera di ricibi di e otro?

Eric: Con bo kiermen?

Brian: Wel, e homber kier sinti cu su casa ta respet’e, no ta berdad? Y e esposa, na su turno, lo no kier ta sigur cu su casa ta stim’e?

Eric: Claro cu si!

Brian: Si e esposo ta haci cos cu ta mustra cu e ta stima su casa, lo ta mas facil pa su casa respet’e.

Eric: Corecto.

Brian: Aunke e conseho aki a ser skirbi casi 2.000 aña pasa, te ainda e ta util tanto pa esposo como esposa. Si nan tur dos aplic’e, nan lo haya bon resultado.

Eric: Mi tin cu admiti cu Bijbel tin mas aden cu loke mi a kere.

Brian: Mi ta contento di tende esey, Eric. Lo mi tin gana di bin bek pa tende bo opinion riba e di tres pregunta: “Bo mester pone fin na un matrimonio cu no ta feliz?” den e mesun les di e foyeto ey riba nos website. *

Eric: Ta bon. Mi ta warda bo. Ami cu mi casa lo wak e hunto ora nos haya un chens.