“PAKICO NET AMI? Pakico Dios a laga e cos aki pasa cu mi?” E preguntanan aki tabata molestia Sidnei di Brazil tempo cu e tabatin 24 aña. Despues cu el a haya un accidente riba un waterslide, e no por a cana mas y mester a uza un rolstoel.

Ta masha facil pa un hende sinti cu Dios a decepcion’e ora e sufri pa motibo di un accidente, maleza, morto di un ser keri, desaster natural of guera. Esaki no ta nada nobo, ya cu e patriarca Job di tempo biblico tambe a sinti esey ora el a haya un golpi tras di otro. Como cu el a kere cu ta Dios a causa su sufrimento, el a culp’e inhustamente y a bisa: “Mi ta sclama na bo pa yudansa, ma bo no ta contesta mi; mi ta lanta para y bo no ta paga atencion na mi. Bo a bira cruel pa mi; cu e poder di bo man bo ta persigui mi.”—Job 30:20, 21.

Job no tabata sa pakico el a pasa den asina tanto dificultad ni dicon e cosnan ey a pasa cu ne ni dicon Dios a permiti nan pasa cu ne. Ta bon cu Bijbel ta splica nos dicon e tipo di cosnan ey ta sosode y con nos mester reacciona ora nan sosode.

Bijbel ta bisa cu Dios “su obra ta perfecto, pasobra tur su camindanan ta husto; un Dios di fieldad y sin inhusticia, husto y recto e ta.” (Deuteronomio 32:4) Siendo cu esey ta e caso, bo ta kere ta logico pa pensa cu un Dios “husto y recto” lo pone hende sufri djis pa e castiga nan of refina nan?

Claro cu no, Bijbel ta bisa nos: “Ora un hende ta pasa den prueba, e no mester bisa: ‘Dios ta pone mi na prueba.’ Pasobra ningun hende no por pone Dios na prueba cu cos malo, y e mes tampoco no ta pone ningun hende na prueba cu cos malo.” (Santiago 1:13) En realidad, Bijbel ta siña nos cu na comienso tur cos tabata perfecto. Dios a duna Adam cu Eva, e prome pareha, un luga masha bunita pa biba aden cu tur loke ta necesario. Tambe el a duna nan trabou cu ta duna satisfaccion. Dios a bisa nan: “Sea fructifero y multiplica, y yena e Tera y haci esaki somete na bo.” Adam cu Eva no tabatin ningun motibo pa sinti cu Dios a decepciona nan.—Genesis 1:28.

Pero awe, e situacion cu nos ta biba aden ta leu di ta perfecto. A traves di historia, hende a pasa den situacionnan hopi dificil. Si, “henter creacion hunto ta sigui keha y ta keda den dolor.” (Romanonan 8:22) Ta kico a pasa anto?

Pa nos haya sa pakico nos ta sufri, nos mester bay bek na e tempo cu sufrimento a cuminsa. Bou di instigacion di e angel rebelde Satanas e Diabel, Adam cu Eva a rechasa Dios su norma di loke ta bon y loke ta malo ora nan a desobedece Dios su mandamento pa no come di “e palo di conocemento di bon y malo.” Diabel a bisa Eva cu nan lo no muri si nan desobedece Dios. Di e manera ey, el a pone hende pensa cu Dios ta un gañado. Tambe, el a duna di compronde cu Dios no ta laga su sirbidornan dicidi pa nan mes loke ta bon y loke ta malo. (Genesis 2:17; 3:1-6) Cu otro palabra, Satanas a insinua cu sin e guia di Dios cos lo bay hopi mihor pa hende. Pues, Satanas a lanta un acusacion hopi serio, esta cu Dios ta un mal gobernante.

Un otro acusacion cu Satanas a lanta ta cu hende ta sirbi Dios pa motibo di interes personal. El a bisa Dios: “Bo no a traha un trankera rond di [Job], rond di su cas, y rond di tur loke e tin na tur banda? ... Ma saca bo man awor y mishi cu tur loke e tin; siguramente e lo maldiciona bo den bo cara.” (Job 1:10, 11) Maske Satanas tabata papiando di Job, el a duna di compronde cu tur hende ta sirbi Dios pa motibonan egoista.

Con lo ta e mihor manera pa Dios mustra unabes pa semper cu e acusacionnan ey ta falso? Wel, Dios, kende ta e persona mas sabi den henter e universo, tin e mihor solucion. Un solucion cu lo no laga nos keda decepciona. (Romanonan 11:33) El a dicidi di laga hende goberna nan mes pa un  tempo pa asina nan por mira ken su gobernacion ta mihor.

E situacion teribel cu tin rond mundo ta mustra claramente cu gobiernonan humano a fracasa rotundamente. Nan no a trece paz ni siguridad ni felicidad. Al contrario, nan ta a punto di ruina e Tera. Esaki ta mustra cu loke Bijbel ta bisa ta berdad: “No ta keda na hende pa dirigi su pasonan.” (Jeremias 10:23) Ta Dios su proposito pa hende tin paz, felicidad y prosperidad pa semper. Y ta su manera di goberna so por logra esey.—Isaias 45:18.

Ta con Dios lo cumpli cu su proposito? Corda cu Hesus a bisa su siguidornan pa pidi den oracion: “Laga bo Reino bini. Laga bo boluntad sosode, mescos cu den cielo, tambe riba Tera.” (Mateo 6:10) Si, na e debido tempo, mediante su Reino, Dios lo elimina tur loke ta causa sufrimento. (Daniel 2:44) Lo no tin ni pobreza ni maleza ni morto mas. Dios a priminti cu e “lo libra esun den necesidad ora cu e sclama pa yudansa.” Pues, Dios lo yuda esnan pober. (Salmo 72:12-14) Y e ta priminti cu “ningun habitante lo no bisa: ‘Mi ta malo.’” (Isaias 33:24) Y kico di esnan cu a muri caba y cu ta den Dios su memoria? Hesus a bisa: “Lo yega e ora cu tur esnan cu ta den graf lo tende su stem y lo sali afo.” (Juan 5:28, 29) Con bo ta haya e promesanan aki? Bunita no!

Mas o menos 17 aña despues di su accidente, Sidnei, kende nos a menciona na principio di e articulo aki, a bisa: “Mi no a culpa Dios nunca pa e accidente, pero mi tin cu admiti si cu na principio mi a sinti cu Dios a decepciona mi. Tin biaha mi ta sinti mi hopi tristo, y mi ta yora ora mi pensa riba mi incapacidad fisico. Sinembargo, mi a siña for di Bijbel cu e accidente no tabata un castigo di Dios y cu cosnan inespera por sosode cu nos tur. Ademas, oracion na Jehova y cierto textonan cu mi a lesa den Bijbel a fortalece mi spiritualmente y a yuda mi keda positivo.”—Eclesiastes 9:11; Salmo 145:18; 2 Corintionan 4:8, 9, 16.

Kico por yuda nos pa nos no sinti cu Dios a decepciona nos? Wel, ta bon pa nos tene na mente e motibonan pakico Dios ta permiti sufrimento y cu pronto Dios lo kita tur sufrimento. Nos ta sigur cu Dios ta “esun cu ta recompensa esnan cu ta haci esfuerso pa busc’e.” Ningun hende cu pone confianza den Dios y su Yiu lo no keda decepciona.—Hebreonan 11:6; Romanonan 10:11.