Musica ta un bunita regalo di Jehova. E por anima nos y influencia nos pensamento y emocionnan. Sin duda, esaki ta loke ta pasa ora nos scucha nos canticanan, manera esnan di JW Broadcasting. E canticanan aki por logra algo hasta mas importante: nan por hala nos mas cerca di Jehova.

 Desde aña 2014 te awor, nos a produci mas cu 70 cantica, y por lo menos un di e canticanan aki ta disponibel na mas cu 500 idioma! Pero kisas bo ta puntra bo mes: ‘Ken ta traha riba e canticanan aki, y con nan ta ser produci?’

 Bou di supervision di Comite di Siñansa di Cuerpo Gobernante, e team di musica dje Departamento di Audio/Video ta traha riba cantica manera esnan di JW Broadcasting. E team di musica ta consisti di 13 ruman cu ta traha riba e canticanan ey. Nan ta haci varios trabou, manera compone y graba musica, schedule grabacionnan y otro trabounan necesario. Ademas, Comite di Siñansa a aproba pa rumannan rond mundo cu ta traha como boluntario for di cas yuda cu e trabou aki. Entre nan tin compositor, musico y cantante. E rumannan aki humildemente ta uza nan talentonan sin busca reconocemento personal pa nan trabou.

 Con nan ta produci cantica? Prome, Comite di Siñansa ta dicidi riba ki texto di Bijbel e cantica mester ta basa y con e mester laga e oyente sinti. Despues, e team di musica ta dicidi ken ta bay compone e musica y ken ta bay skirbi e letra. Nan ta haci un grabacion di prueba, y Comite di Siñansa ta scuch’e y duna mas sugerencia. Despues, e team di musica ta ahusta e cantica y ta graba e version final. Nan ta graba e canticanan aki na diferente luga, manera na sucursal of na cas cu tin ekipo di grabacion.

 Pa compone y graba cantica, nos rumannan ta uza diferente programa di computer. Ademas, nan tin mester di instrumento, ekipo pa mescla zonido, amplifier, speaker y microfon. Cada microfon por costa entre 100 pa 1.000 dollar of mas. Na aña 2020, nos a uza mas cu 116.000 dollar pa cumpra ekipo di grabacion.

 Kico nos ta haci pa spaar placa? En bes di tin hopi ruman na Betel cu ta produci musica, ta uza hopi boluntario cu ta traha for di cas. Ademas, en bes di laga hopi musico bin hunto pa graba, nos rumannan ta uza programa di computer cu ta crea zonido di varios instrumento.

 E rumannan ta gusta scucha nos canticanan. Tara, cu ta biba na Alemania, a bisa: “E canticanan ta yuda mi relaha ora mi ta sinti mi preocupa of ansha. Ora mi scucha nan na mi mes idioma, mi ta sinti comosifuera ta un brasa mi ta haya for di Jehova.” Ruman Dmitry di Kazakhstan a bisa: “Mi gusta cu mi por scucha e canticanan sin cu mi mester preocupa si nan ta di acuerdo cu principio di Bijbel of no. Ademas, e canticanan ta yuda mi enfoca riba cos spiritual.”

 Delia, di Sur Africa, a bisa con e ta sinti tocante e canticanan: “E canticanan aki a bira un salbabida spiritual pa mi. Ora mi ta sinti mi desanima of mi tin cu trata cu un situacion dificil, semper tin un cantica cu ta cay net bon pa anima mi. Hopi biaha, djis scucha e musica so caba ta pone mi sinti mihor!”

 Algun di e canticanan aki a bira faborito cerca algun hende. Lerato, di Sur Africa, a bisa: “E canticanan ‘Djis Tras di Porta’ y ‘Nos Dushi Paradijs’ ta yuda mi imagina e tempo cu mi por yama mi mama bon bin atrobe. Cada bes cu mi scucha e canticanan ey, mi ta mir’e ta core bin cerca mi cu brasa habri.”

 Un di e canticanan aki a echt yuda un ruman muher teenager na Sri Lanka. El a bisa: “Mi juffrouw di natuurkunde a zundra mi hopi mahos dilanti di henter e klas djis pasobra mi ta un testigo di Jehova. Mi a spanta asina hopi cu mi no tabata sa kico pa bisa. Ora mi a yega cas, mi mama a anima mi pa scucha e cantica ‘Studia y Medita.’ E cantica a yuda mi mira cu mi mester a haci investigacion y prepara un contesta. E siguiente dia, mi a papia cu mi juffrouw. El a scucha mi y bisa mi cu awor e ta compronde e creencianan di testigonan di Jehova mihor. Mi ta gradici Jehova su organisacion pa duna nos canticanan asina animante.”

 Unda nos ta haya e placa necesario pa produci e canticanan aki? E donacionnan cu rumannan ta haci na e obra mundial ta haci esaki posibel. Mayoria di e donacionnan ey ta ser haci via donate.pr418.com. Danki pa boso donacionnan generoso.