Na aña 2020 varios desaster natural a tuma luga rond mundo y e pandemia di COVID-19 a cuminsa. Con testigonan di Jehova a yuda e hendenan cu a ser afecta?

 Durante di e aña di sirbishi 2020, a e Comite di Coordinador di Cuerpo Gobernante a aproba pa uza 28 miyon dollar b na yudansa pa desaster natural. Nan a duna yudansa na victima di mas cu 200 calamidad, manera e pandemia di COVID-19, varios siclon tropical, inundacion na Africa, scarsedad di cuminda na Venezuela y secura na Zimbabwe. E donacionnan a yuda paga cuminda, awa, luga di keda, paña, cuido medico, producto basico pa limpieza, y tambe pa drecha y traha edificio. Ban wak algun ehempel di trabou di auxilio.

 COVID-19. E pandemia a afecta nos rumannan fisicamente, emocionalmente y economicamente. Pa yuda e rumannan, mas cu 800 Comite di Auxilio a ser forma mundialmente. E comitenan aki ta wak e necesidadnan di nos rumannan y ta informa e Comite di Coordinador pa nan por manda e yudansa necesario.

 Durante aña 2020, e Comitenan di Auxilio a yuda hopi hende haya cuminda, awa, producto di higiena y remedi. Den algun area, e Comitenan di Auxilio a traha hunto cu e ancianonan local pa yuda e rumannan haya yudansa di gobierno.

 Hende cu no ta Testigo a tuma nota di nos trabou di auxilio. Por ehempel, Field Simwinga, comisario di e districto di Nakonde, Zambia, a bisa e rumannan: “Nos ta masha agradecido pa e yudansa net na ora cu boso a duna na e famianan den necesidad.”

 Scarsedad di Cuminda na Angola. E pandemia di COVID-19 a pone cu no tabatin suficiente cuminda na Angola y e prijsnan a subi hopi. Tabata cada bes mas dificil pa nos rumannan cumpra cuminda.

 Sucursal di Brazil a ser acerca pa yuda, y nan a manda pakete di cuminda pa nos rumannan na Angola. E rumannan a investiga cua ta e mihor manera pa cumpra y manda cuminda pa despues cumpr’e na cantidad grandi. A paga mas o menos 22 dollar pa cumpra y manda cada pakete cu a contene casi 20 kilo di cuminda manera aros, bonchi y azeta pa cushina. Te cu awe a manda 33.544 pakete di cuminda, esta un total di 654 ton. Tur esaki, hunto cu otro producto local a yuda alimenta mas cu 50.000 hende.

 Con e rumannan a sinti ora nan a haya e yudansa aki? Alexandre, cu ta biba na un parti isola di Angola, a bisa: “Esaki a laga mi mira bon cla cu Jehova ta stima mi y cu mi no ta mi so. Mi ta importante pa e organisacion di Jehova.” Mariza, un mama soltera, a bisa: “Jehova a scucha mi oracion. Mi ta gradici Dios y su organisacion.”

 Secura na Zimbabwe. Durante di e aña di sirbishi 2020, tabatin un secura severo na Zimbabwe. Como consecuencia miyones di hende a hera muri di hamber. Miles di Testigo na Zimbabwe no tabatin suficiente cuminda.

 A forma cinco Comite di Auxilio pa percura cuminda pa e rumannan. Centenares di publicador a yuda empaketa cuminda, hinca cuminda den truck of a fia nan auto pa hiba e cuminda. c Durante e aña di sirbishi 2020, a uza 691.561 dollar pa duna cuminda na mas cu 22.700 hende.

 Den algun caso, net ora e rumannan a caba cu tur loke nan tabatin di come, yudansa a yega. E rumannan a gradici Jehova ora e cuminda a yega. Algun di nan a hasta cuminsa canta cantica di salon.

 Dos Testigo viuda, cu ta biba den un cierto area, a bay un reunion den nan bario caminda lo a papia di e yudansa cu un organisacion no gubernamental ta duna (ONG). Na e reunion nan a cuminsa papia di politica y a pone algun condicion pa por haya cuminda. Pesey, e rumannan a dicidi cu nan no por acepta e condicionnan pa haya yudansa. Ora nan tabata saliendo for di e reunion, e hendenan a haci bofon di nan, y a bisa nan: “Wak pa despues boso no bin pidi cuminda cerca nos.” Sinembargo, djis dos siman despues, e rumannan a yega den e area ey, y a yuda e ruman muhernan cu cuminda. Nan a yega hopi mas prome cu e yudansa cu ONG a manda.

 E trabou di auxilio na Zimbabwe a duna un bon testimonio. Wak e ehempel di Prisca, cu ta biba den un pueblito. A pesar di e problemanan cu e secura a trece cu ne, Prisca a sali tur diaranson y diabierna den sirbishi, hasta durante e temporada cu mester ploeg e tera. Hende cu tabata biba den e pueblito ey tabata haci bofon di dje. Nan a bis’e: “Bo famia lo muri di hamber pasobra bo ta cana predica.” Prisca a bisa: “Jehova nunca ta laga su sirbidornan na caya.” Poco tempo despues, el a haya un pakete di cuminda di nos organisacion. Esaki a impresiona algun di su bisiñanan. Nan a bisa Prisca: “Dios nunca a faya bo; nos kier siña mas tocante dje.” Awor shete bisiña ta scucha e reunionnan di congregacion na radio.

 Segun cu nos ta yega mas cerca di e fin, nos lo sigui haya nos cu desaster natural. (Mateo 24:3, 7) Nos ta aprecia e donacionnan generoso cu boso ta haci na diferente manera riba donate.pr418.com. Asina nos por yuda nos rumannan cu ta den necesidad.