Bijbel a profetisa cu den nos tempo lo tin guera, temblor, pest y otro “escenanan spantoso.” (Lucas 21:10, 11) E profecianan aki a sigui cumpli den e aña di sirbishi 2022. a Por ehempel, e conflicto na Ucrania a sigui keto bay, afectando bida di miyones di hende. Gran parti di mundo tabata recuperando ainda di e pandemia di COVID-19. Anto riba dje, hopi hende a ser asota pa desaster natural, manera temblor na Haiti y tormenta destructivo na Centro America, Filipinas y e parti zuidoost di Africa. Con testigonan di Jehova a yuda e victimanan?

 Durante e aña di sirbishi 2022, nos organisacion a duna yudansa na victima di un 200 desaster! En total, casi 12 miyon dollar a bay na e trabounan di yudansa aki. b Laga nos wak con a uza placa di donacion pa yuda e victimanan di dos desaster.

 Dia 14 di augustus 2021, un temblor di magnitud 7.2 a sacudi parti zuid di Haiti. Lamentablemente, tres Testigo a fayece (dos ruman muher y un ruman homber). E sobrevivientenan a haya nan ta enfrenta e daño fisico y emocional cu e temblor a causa. Un ruman homber cu yama Stephane a conta: “Tabatin asina tanto morto den henter e stad cu pa mas cu dos luna largo tabatin varios entiero tur siman.” Éliézer, un otro ruman, a bisa: “Hopi Testigo a perde nan cas. Anto no tabatin paña, sapato ni otro necesidad basico. Hopi ruman a biba pa varios luna den spanto pa motibo di aftershock constante.”

 Mesora nos organisacion a ofrece yudansa. E sucursal di Haiti a zorg pa mas cu 53 ton di cuminda; y tambe nan a percura pa tent, lona, matras y charger solar pa telefon celular. Ademas, durante e aña di sirbishi 2022 a reconstrui of drecha mas cu 100 cas. Mas cu un miyon di dollar a bay na tur e trabounan di yudansa aki.

 Nos rumannan a keda hopi agradecido mes. Lorette a bisa: “E temblor a destrui nos cas y nos negoshi completamente. Nos no tabatin nada pa come. Pero, Jehova su organisacion a yuda nos, dunando nos tur loke nos tabatin mester.” Micheline a bisa: “E temblor a daña e casita den cual ami cu mi dos yiu hombernan tabata biba. Ami no tabata sa kico pa haci, sino di haci oracion so. Y Jehova a contesta mi mediante su organisacion. Aworaki nos ta biba den un cas solido. Ami ta determina pa haci tur loke ta na mi alcance pa mustra Jehova mi gratitud.”

 Autoridadnan local a tuma nota di nos trabounan di yudansa. E director di e oficina di gobernador na L’Asile a bisa: “Mi ta felicita boso pa e manera rapido cu boso a bin yuda. Mi ta elogia boso pa e gran respet cu boso ta mustra na e funcionarionan di gobierno. Mi ta contento di mira cu boso no ta interesa den placa. Mas bien, boso kier yuda hende. Boso ta motiva pa amor.”

 Dia 24 di januari 2022, tormenta tropical Ana a dal Mozambique y despues a hala bay pa Malawi. E ciclon aki a trece awasero pisa y biento fuerte di mas cu 100 kilometer pa ora. El a ranca kabel di coriente benta abou, laba varios brug bay cu ne y causa hopi inundacion.

 E tormenta a afecta mas cu 30.000 Testigo na Malawi y Mozambique. Charles, un ruman cu a yuda den e trabou di yudansa a bisa: “Ora mi a mira cuanto mi rumannan tabata sufri y cuanto nan a perde, esey a haci mi hopi tristo.” Anto riba dje, e tormenta a bay cu e tiki cuminda y cosecha cu nan tabatin. Hopi ruman a perde nan cas. Lamentablemente, e casa y dos yiu muher di un ruman homber a hoga ora nan boto di rescate a bolter.

 E tormenta tabata teribel. Na Nchalo, Malawi, banda di un or di marduga, famia Sengeredo a tende e zonido spantoso di hopi awa ta basha bin den nan direccion. Dos riu a desborda! Ruman Sengeredo a bisa su famia pa nan core sali for di e cas. Esey tabata un bon decision, pasobra poco despues e inundacion a pone cu e cas a basha abou. Nan a perde tur nan pertenencianan. Loke e inundacion no a bay cu ne a sufri daño. E famia a dicidi di bay na e Salon di Reino, cu normalmente nan por a cana yega den 30 minuut. Pero awor, debi na e situacion, a tuma nan dos ora. Nan a yega papa muha y morto cansa, pero sano y salvo.

 Mesora e sucursalnan di Malawi y Mozambique a organisa e trabounan di yudansa. Nan a instrui e superintendentenan di circuito y e ancianonan pa evalua e necesidadnan di e rumannan cu a ser afecta y pa duna ayudo spiritual y emocional. A asigna varios comite di yudansa pa dirigi e trabounan, y e comitenan aki a cuminsa di biaha pa yuda e rumannan haya cuminda y otro necesidad. Mas cu 33.000 dollar a bay na ayudo humanitario y mas cu 300.000 dollar a bay na drecha y reconstrui cas pa e rumannan.

 E comitenan di yudansa a uza e fondonan na un manera sabi, loke tabata hopi importante pa motibo di inflacion halto. Por ehempel, prijs di hariña di maishi—un cuminda basico na Malawi—a subi cu casi 70 porciento den e prome shete lunanan di e trabounan di yudansa. Prijs di gasolin tambe a subi. Pa spaar placa, e rumannan a cumpra cuminda y material di construccion localmente y por mayor. Asina nan a logra haya descuento y evita gasto halto di transporte.

 E trabounan di yudansa a haci e pueblo di Jehova hopi contento. Felisberto, un ruman di Mozambique, a bisa: “Hamas mi a mira un organisacion duna asina tanto: nan a duna material y trahador di construccion, transporte, cuminda y instruccion amoroso. E trabounan di yudansa aki tabata un ehempel sobresaliente di e amor di ruman cu Hesus a menciona na Juan 13:34, 35.” Ester, un viuda na Malawi kende su cas a basha abou, a bisa: “Mi a sinti mi desespera, pasobra mi no tabatin moda pa traha un otro cas. Pues, ora e rumannan a bin traha un cas pa mi, mi a sinti manera ta den Paradijs mi tabata caba.”

 Mientras cu e mundo nobo priminti no yega ainda, nos lo sigui haya nos cu mas y mas desaster. (Mateo 24:7, 8) Sinembargo, danki na bo donacion generoso, nos tin sigur cu e pueblo di Jehova lo ricibi e yudansa necesario. Por haya instruccion di con pa haci donacion riba donate.pr418.com. Danki pa bo generosidad.