Algun hende ta bebe di mas ora nan tin stress, ora nan ta sinti nan nan so of ora nan ta sinti nan laf. Kico di abo? Bo ta bebiendo mas alcohol cu custumber? Si esey ta e caso, kico bo por haci pa tene bo bebemento bou di control y asina evita cu bo ta cuminsa depende di alcohol. Ata aki algun informacion cu por yuda bo.

•  Kico ta nifica bebe alcohol na un manera modera?

•  Con mi por sa si mi ta bebiendo di mas?

•  Cinco idea pa yuda bo tene bo bebemento di alcohol bou di control

 Loke Bijbel ta bisa: “No anda cu esnan cu ta gusta dal nan biña.”—Proverbionan 23:20.

 Pensa riba esaki: Bijbel no ta contra bebemento di alcohol na un manera modera. (Eclesiastes 9:7) Pero e ta mustra cu tin un diferencia entre bebemento modera, bebemento di mas y buracheria. (Lucas 21:34; Efesionan 5:18; Tito 2:3) Hasta si bo bebemento no hiba na buracheria, bebemento di mas ta malo pa bo salud. Ademas, bebemento di mas por daña nos relacion cu otro hende y por pone nos tuma mal decision.—Proverbionan 23:29, 30.

 Hopi experto ta haci un distincion entre bebemento cu riesgo abou y bebemento cu riesgo halto. Con nan ta calcula e nivel di riesgo? Nan ta conta cuanto glas di alcohol un persona ta bebe pa dia y cuanto biaha pa siman e ta bebe alcohol. a Claro, tur hende ta reacciona diferente na alcohol, y tin biaha ta mihor un hende no bebe mes. E Organisacion Mundial di Salud ta splica lo siguiente:

 “Den algun caso, hasta un of dos glas di alcohol por ta di mas—por ehempel:

•   Si bo tin cu stuur of traha cu [un of otro] mashin [di coriente].

•   Si bo ta na estado of ta duna yiu lechi di pecho.

•   Si bo ta bebe cierto remedi.

•   Si bo tin problema medico.

•   Si bo no por controla bo bebemento.”

 Loke Bijbel ta bisa: “Laga nos samina y investiga nos camindanan.”—Lamentacionnan 3:40.

 Pensa riba esaki: Bo por proteha bo mes contra e consecuencianan malo cu bebemento di mas ta trece cu ne si regularmente bo analisa cuanto bo ta bebe y haci e cambionan necesario. E siguiente señalnan por indica cu bo bebemento di alcohol ta saliendo for di man.

•   Bo mester bebe pa sinti bo bon. Bo ta sinti cu bo tin cu bebe pa bo por relaha, socialisa of pasa bon. Bo ta bebe alcohol pa trata cu bo problemanan.

•   Bo ta bebe mas cu bo tin custumber di bebe. Bo ta bebe mas regular y bo ta bebe bibida mas sterki. Bo mester bebe cada bes mas alcohol pa bo sinti e mesun efecto cu antes.

•   Bo bebemento a pone cu bo a haya bo cu problema na cas y na trabou. Por ehempel, bo ta gasta mas placa na alcohol cu bo tin.

•   Ora bo bebe bo ta tuma mal decision of bo ta haci cos peligroso. Kisas bo ta dicidi di stuur, landa of traha cu un cierto mashin.

•   Tin hende a bisa bo cu nan ta preocupa pasobra bo ta bebe di mas? Ora nan papia cu bo tocante bo bebemento, bo ta rabia. Bo ta purba di sconde bo bebemento for di otro hende of bo ta gaña tocante e cantidad di alcohol cu bo ta bebe.

•   Bo tin problema pa stop di bebe. Bo a purba di bebe menos of stop di bebe, pero bo no por.

 1. Traha un plan.

 Loke Bijbel ta bisa: “E plannan di hende balente siguramente ta conduci na abundancia.”—Proverbionan 21:5.

 Purba esaki: Scoge ki dia den siman lo bo bebe. Pone un limite rasonabel na e cantidad di alcohol cu lo bo bebe e dianan ey. Anto scoge por lo menos dos dia den siman cu lo bo no bebe nada mes.

 Un organisacion na Reino Uni cu ta promove consumo responsabel di alcohol ta bisa: “E mihor manera pa baha bo riesgo di bira dependiente di alcohol ta di programa periodo regular cu lo bo no bebe alcohol.”

 2. Cumpli cu bo plan.

 Loke Bijbel ta bisa: “Caba loke boso a cuminsa cu ne.”—2 Corintionan 8:11.

 Purba esaki: Busca pa sa cuanto alcohol ley ta permiti pa un hende bebe pa asina bo por calcula y conta bo consumo di alcohol corectamente. Cumpra bibida saludabel y sin alcohol cu bo ta gusta.

 National Institute on Alcohol Abuse and Alcoholism na Merca ta bisa: “Cambio chikito por haci un diferencia grandi. E cambionan ey por baha e chens cu lo bo haya bo cu problema relaciona cu abuso di alcohol.”

 3. Pega na bo decisionnan.

 Loke Bijbel ta bisa: “Laga boso Si nifica Si, y boso No, No.”—Santiago 5:12.

 Purba esaki: Si un hende ofrece bo algo di bebe cu ta bay contra bo plan, sea prepara pa bisa “No” na un manera amabel pero firme.

 National Institute on Alcohol Abuse and Alcoholism na Merca ta bisa: “Mas lihe bo bisa ‘no,’ mas facil lo ta pa bo pega na bo decision.”

 4. Pensa riba e beneficionan.

 Loke Bijbel ta bisa: “Fin di un asunto ta mihor cu su principio.”—Eclesiastes 7:8.

 Purba esaki: Traha un lista di e cosnan cu ta motiva bo pa tene bo bebemento di alcohol bou di control. Por ehempel, lo bo drumi mihor, cuida bo salud, spaar placa of tin un mihor relacion cu otro hende. Si bo papia cu otro hende tocante bo meta, papia tocante e beneficionan y no con dificil e ta.

 5. Pidi Dios yuda bo.

 Loke Bijbel ta bisa: “Pa tur cos mi tin forsa pa medio di esun cu ta duna mi poder.”—Filipensenan 4:13.

 Purba esaki: Si bo ta pensa cu lo bo tin problema cu bebemento di alcohol, pidi Dios yuda bo. Pidi Dios forsa y dominio propio. b Tuma tempo pa busca e consehonan sabi cu tin den su Palabra, Bijbel. Cu Dios na bo banda, bo por tene bo bebemento di alcohol bou di control.