Hende ta pensa cu mas o menos 5 mil miyon hende lo wak e Weganan Olimpico di Zomer 2024. Atleta di 206 pais lo participa den e weganan ey. Thomas Bach, presidente di Comite Olimpico Internacional, a bisa: “Nos ta forma parti di un evento cu ta trece paz y union na mundo. Laga nos apoya e meta di e Weganan Olimpico, esta, pa tur hende biba na paz y uni cu otro, a pesar cu nos tur ta diferente for di otro.”

 Di berdad e Weganan Olimpico por trece paz y union na mundo? Lo yega e dia cu nos lo tin berdadero paz y union?

 Durante e Weganan Olimpico di e aña aki, hende no a pensa riba deporte so. E weganan aki a pone hende papia tocante e problemanan politico y social cu ta causa division entre hende, entre otro, derecho humano, racismo, discriminacion religioso y desigualdad entre hende homber y hende muher.

 Hende ta disfruta di e Weganan Olimpico y otro evento deportivo internacional. Sinembargo, na luga di trece berdadero paz y union, e eventonan aki ta promove actitud y comportacion di hende cu ta causa desunion. Si, e eventonan aki ta mustra con dividi mundo ta realmente.

 Bijbel a profetisa con actitud di hende lo ta den nos tempo. E actitudnan ey ta pone cu ta bira hopi dificil pa uni hende. (2 Timoteo 3:1-5) Pa haya sa mas tocante e profecia ey, lesa e articulo “Bijbel A Bisa Con Hende Lo Pensa y Actua den Nos Tempo?”

 Bijbel ta sigura nos cu un dia lo tin paz y union na mundo. Bijbel ta priminti cu tur hende na mundo lo ta uni bou di un gobierno den cielo cu yama “e Reino di Dios.”—Lucas 4:43; Mateo 6:10.

 Hesucristo, Rey di e Reino ey, lo trece paz rond mundo. Bijbel ta bisa:

•   “Hende husto lo ta manera mata cu ta spruit di nobo, y lo tin paz tur caminda.”—Salmo 72:7.

•   “Lo e libra hende pober cu ta sclama pa yudansa ... Lo e libra nan for di opresion y violencia.”—Salmo 72:12, 14.

 For di awor, e siñansanan di Hesus a uni miyones di hende di 239 pais. Como cristian, testigonan di Jehova rond mundo a siña con pa ta na paz cu otro hende. Pa haya sa con esey ta posibel, lesa e edicion di E Toren di Vigilancia cu e tema: “Nos Por Vence Odio!”