Despues di un atake terorista, kisas bo ta puntra bo mes: “Dios ta interesa den loke a pasa? Dicon e cosnan aki ta pasa? Terorismo a lo caba algun dia? Con mi por trata cu e miedo cu mi ta sinti?” Bijbel ta duna bon contesta pa e preguntanan ey.

 Dios ta odia violencia y terorismo. (Salmo 11:5; Proverbionan 6:16, 17) Y Hesus, kende ta representa Dios, a scual su discipelnan ora nan a actua na un manera violento. (Mateo 26:50-52) Tin hende cu ta bisa cu nan ta comete atake violento den nomber di Dios, pero Dios no ta aproba di e atakenan ey. En realidad, e no ta scucha nan oracionnan.—Isaias 1:15.

 Dios ta interesa den tur hende cu ta sufri. Esey ta inclui hende cu ta victima di atake terorista. (Salmo 31:7; 1 Pedro 5:7) Bijbel ta bisa tambe cu Dios ta bay caba cu tur violencia.—Isaias 60:18.

 Bijbel ta bisa kico ta e causa principal di terorismo. E ta bisa: “Hende a eherce autoridad riba un otro hende pa su daño.” (Eclesiastes 8:9, Beibel Santu) Den transcurso di historia humano, hende cu poder a uza terorismo pa oprimi otro hende. Como resultado, hende cu a ser oprimi a uza terorismo pa bringa contra e hendenan cu ta oprimi nan.—Eclesiastes 7:7.

 Dios ta priminti cu e lo caba cu miedo y violencia. Dios ta priminti tambe cu e lo percura pa den futuro tin paz riba Tera. (Isaias 32:18; Mikeas 4:3, 4) Esaki ta loke Dios lo haci:

•   Elimina e causa principal di terorismo. Dios lo kita tur gobierno humano. Anto Tera lo tin un gobierno so, e gobierno di Dios. E gobierno ey lo tin Hesucristo na cabes. Hesus lo trata tur hende na un manera husto. Hesus lo caba cu opresion y violencia. (Salmo 72:2, 14) E tempo ey, niun hende lo no practica terorismo mas. Hende “lo deleita nan mes den paz abundante.”—Salmo 37:10, 11, Beibel Santu.

•   Drecha tur daño cu terorismo a causa. Dios lo drecha tur daño cu hende a sufri pa motibo di terorismo: tanto daño fisico como emocional. (Isaias 65:17; Revelacion 21:3, 4) Dios a hasta priminti cu e lo lanta hende for di morto. E tempo ey, nan lo biba riba Tera, caminda paz ta reina!—Juan 5:28, 29.

 Bijbel ta duna nos bon motibo pa kere cu pronto Dios lo tuma accion. Pero, kisas bo ta puntra bo mes: “Dicon Dios no a caba cu terorismo ainda?” Si bo kier haya un contesta pa e pregunta ey, wak e video Dikon Dios Ta Permití Sufrimentu?