Dia 19 di mei 2022, mas cu 75 funcionario di alto rango a informa Conseho di Siguridad di Nacionnan Uni tocante e scarsedad di cuminda cu tin rond mundo. E funcionarionan a indica cu “esaki tabata un crisis caba debi na COVID-19 y debi na cambio di clima. Pero awor, tin mas scarsedad debi na e guera na Ucrania. Rond mundo, varios pais tin poco of casi niun cuminda.” Poco despues di esey, e corant The Economist a skirbi cu “e guera aki ta bay causa hamber pisa na tur parti di mundo.” Bijbel a bisa di antemano cu lo bay tin e tipo di crisisnan aki den nos tempo. Ademas, Bijbel por yuda nos trata cu e crisisnan aki.

•    Hesus a profetisa: “Nacion lo lanta contra nacion y reino contra reino, y lo tin scarsedad di cuminda.”—Mateo 24:7.

•    Revelacion ta papia tocante cuater coredo di cabay simbolico. Un di e coredonan di cabay ta representa guera. E coredo cu ta bin despues di dje ta representa hamber. Esey ta referi na un tempo cu cuminda lo bira scars y prijs di cuminda lo bira masha halto mes. “Mi a mira un kabai pretu aparesé; esun sintá riba dje tabatin un balansa den su man. Mi a tende un kos ku a zona manera un stèm, bisa ... : ‘Solamente un kana di trigo pa e suèldu di henter un dia di trabou i solamente tres kana di sebada pa e suèldu di henter un dia di trabou!’”—Revelacion 6:5, 6, Beibel papiamentu koriente.

 E profecianan di Bijbel aki tocante scarsedad di cuminda ta cumpliendo awor, den e tempo cu Bijbel ta yama “e ultimo dianan.” (2 Timoteo 3:1) Pa haya sa mas tocante “e ultimo dianan” y e coremento di e cuater coredonan di cabay den e buki Revelacion, wak e video Mundu A Kambia Desde 1914 y lesa e articulo “E Cuater Coredonan di Cabay—Ken Nan Ta?”

•    Bijbel ta contene hopi conseho practico cu por yuda nos trata cu situacion dificil, incluso aumento di prijs di cuminda of hasta scarsedad di cuminda. Pa algun ehempel, lesa e articulo “Siña Con pa Biba cu Menos Placa.”

•    Bijbel ta duna nos speransa cu e situacion lo mehora. Bijbel ta priminti cu lo tin un tempo cu “lo tin un abundancia di maishi den e Tera” y tur hende lo tin cuminda na abundancia. (Salmo 72:16) Pa haya sa mas informacion tocante loke Bijbel ta priminti pa futuro y dicon bo por confia loke Bijbel ta bisa, lesa e articulo: “Speransa pa un Mihor Futuro.”