•   Abo gusta haci cos leuk sin plania mucho, pero bo casa gusta tin tur cos plania.

•   Abo ta un persona keto y reserva, pero bo casa ta un persona cu gusta ta rond di hende.

 Bo casa sa haci cos cu ta irita bo? Si bo keda enfoca riba e cosnan ey, esey lo afecta bo matrimonio. Bijbel ta bisa “hende cu ta keda papia tocante un pica ta kibra bon amistad.”—Proverbionan 17:9.

 En bes di laga e cosnan cu ta irita bo di bo casa causa problema den bo matrimonio, kisas bo por purba di mira nan for di un punto di bista positivo.

Den e articulo aki

•  Un punto di bista positivo di cos cu ta irita bo

•  Loke otro pareha ta bisa

•  Guia pa combersacion

 Ta posibel cu e cos cu bo casa ta haci cu ta irita bo tin di haber cu un cualidad cu bo ta admira di dje. Ban wak tres ehempel:

 “Hopi bes mi esposo ta slow pa haci cos of pa prepara pa bay un caminda. Pero na mes momento, e tin hopi pasenshi—hasta cu mi. Tin biaha, e echo cu e ta slow ta irita mi. Pero mi sa cu esey ta parti di loke mi ta gusta di dje tambe.”—Chelsea.

 “Mi esposa ta plania tur cos en detaye; e mester sinti cu e tin tur cos bou di control, y esey sa irita mi. Di otro banda, su atencion pa detaye ta pone cu semper e ta prepara pa tur cos.”—Christopher.

 “Tin biaha ta parce cu mi esposo no ta interesa den algun cos, y esey ta frustra mi. Pero na mes momento, su manera relaha di haci cos ta loke a atrae mi na dje. Mi ta admira su habilidad pa keda calmo den situacion dificil.”—Danielle.

 Manera Chelsea, Christopher y Danielle a siña, un casa su puntonan fuerte y puntonan debil hopi bes ta parti di e mesun cualidad. Kisas lo bo tin gana pa bo casa no tin un cierto debilidad mas. Pero corda cu e ora ey bo ta perde su punto fuerte tambe. Esey ta mescos cu un moneda: bo no por djis kita un banda so di un moneda y bent’e afo.

 Claro cu algun cos cu ta irita nos no tin un banda positivo. Por ehempel, Bijbel ta admiti cu tin “hende cu ta rabia lihe.” (Proverbionan 29:22) Den caso asina, un persona mester haci esfuerso pa kita “tur tipo di amargura malicioso, rabia, furia, gritamento y papiamento di cos ofensivo.” a—Efesionan 4:31.

 Pero ora ta trata di algo cu ta djis irita nos, sigui Bijbel su conseho: “Sigui soporta otro ... hasta si un di boso tin motibo pa keha un otro.”—Colosensenan 3:13.

 Ademas, purba di mira e banda positivo di e cos cu ta irita bo. Kisas e ta parti di un cualidad cu a atrae bo na bo casa. Un esposo cu yama Joseph a bisa: “Si bo enfoca riba e cosnan cu ta irita bo, esey ta mescos cu si bo enfoca riba e banda skerpi di un diamanta y no riba su bunitesa.”

 Prome, purba di contesta e preguntanan aki pa bo mes. Despues papia tocante e contestanan hunto.

•   Bo ta sinti cu algo cu bo casa ta haci cu ta irita bo ta causando problema den bo matrimonio? Si ta asina, kico esey ta?

•   Loke cu bo casa ta haci ta algo malo of e ta djis algo cu ta irita bo?

•   Tin un banda positivo di e cos cu ta irita bo? Si ta asina, kico esey ta y dicon bo ta balora e cualidad ey di bo casa?