LOKE HOBENNAN SA PUNTRA
Kico Mi Por Haci Si Mi Ta Hopi Timido?
E mal noticia: Si bo ta timido, of verlegen, bo por perde chens di haya bon amigo of di haci algo nobo of dushi.
E bon noticia: Timidez no necesariamente ta algo malo. E por yuda bo pensa bon prome cu bo papia, y e por yuda bo ta un hende cu ta observa bon y cu ta scucha bon ora otro hende ta papia.
E mihor noticia: Bo no tin nodi keda timido, of verlegen, pa semper. Bo por controla bo timidez. E articulo aki lo mustra bo con bo por haci esey.
Saca afo kico ta preocupa bo
Timidez por pone cu ta dificil pa bo papia cu hende cara cara. Pesey, kisas bo por sinti bo isola, of bo so, manera ta den un camber scur bo ta bo so. Esey no ta nada dushi. Pero si bo saca afo dicon bo ta sinti cu ta dificil pa bo papia cu hende, ta manera bo ta cende un luz. Y probablemente, bo ta ripara cu no tin motibo pa ta hopi preocupa. Ban wak tres ehempel.
Preocupacion #1: “Mi no sa di kico mi tin cu papia.”
Realidad: Hopi biaha, loke hende ta keda corda mas di un combersacion ta con bo a laga nan sinti y no loke bo a papia di dje. Si bo no sa kico pa papia di dje, bo por enfoca riba scucha bon; ta importante pa bo ta realmente interesa den loke hende ta conta bo.
Pensa riba esaki: Ken abo ta prefera di tin como amigo? Un hende cu ta papia papia so y cu semper tin algo di bisa of un hende cu ta scucha bon?
Preocupacion #2: “Hende ta bay pensa cu mi ta laf.”
Realidad: Semper hende lo tin nan mes opinion tocante bo, sea bo ta timido of no. En bes di pensa cu hende lo haya bo laf, bo por yuda hende forma un mihor opinion di bo si bo laga nan conoce bo mihor. Asina, nan por mira con bo ta di berdad.
Pensa riba esaki: Si bo ta pensa cu tur hende ta pensa malo di bo, no ta net abo ta husgando nan, pensando cu nan no ta gusta bo?
Preocupacion #3: “Mi ta bay pasa berguensa si mi bisa algo robes.”
Realidad: Esey ta pasa cu tur hende. Loke bo por haci ta di mira e erornan ey como un chens pa mustra cu bo no ta pensa cu bo ta perfecto.
Pensa riba esaki: Bo no ta prefera di ta cu hende cu ta admiti cu nan no ta perfecto?
Bo tabata sa esaki? Tin hende ta pensa cu nan no ta timido pasobra nan ta manda hopi mensahe. Pero ta mas facil pa bo haya bon amigo ora bo ta combersa cu hende en persona. Sherry Turcle, un psicologo y experto den tecnologia, a skirbi esaki den un buki: “Ora nos ta wak otro su cara y scucha stem di otro, nos ta trata otro na un manera mas humano.” a
Ora bo siña controla bo timidez, lo bo ripara cu un combersacion en persona ta bay mas facil cu bo ta pensa
Loke bo por haci
No compara bo mes cu otro hende. Bo no tin nodi bira un hende super social. Bo por pone meta pa ta menos timido. Asina, bo ta evita di perde chens di haya bon amigo of di haci algo nobo of dushi.
“Un combersacion no tin nodi ta largo, ni bo no tin nodi ta e centro di atencion di e combersacion. Bo por djis cera conoci cu un hende cu bo no conoce of haci algun pregunta simpel.”—Alicia.
Principio di Bijbel: “Laga cada un di boso analisa su mes accionnan, anto e ora ey lo e tin motibo pa ta masha contento cu su mes, sin compara su mes cu otro hende.”—Galationan 6:4.
Observa otro hende y siña for di nan. Observa con hende social ta combersa cu otro hende. Kico ta funciona bon pa nan y kico no? Cua di nan bon cualidadnan abo por desaroya?
“Observa hende cu ta cera amistad facil, y siña for di nan. Wak kico nan ta haci y scucha kico nan ta bisa ora nan cera conoci cu un hende.”—Aaron.
Principio di Bijbel: “Mescos cu hero ta mula hero, hende ta haci otro skerpi.”—Proverbionan 27:17.
Haci pregunta. Generalmente, hende gusta duna nan opinion. Pues, hacimento di pregunta ta un bon manera pa cuminsa un combersacion. Ademas, esey lo kita un tiki di e atencion for di bo tambe.
“Si di antemano bo prepara loke bo ta bay bisa, lo bo ta menos nervioso. Prome cu bo bay un evento social, bo por pensa algun topico cu bo por papia di dje cu un hende of algun pregunta cu bo por hacie. Asina, lo bo ta menos incomodo ora bo cera conoci cu un hende.”—Alana.
Principio di Bijbel: “No busca boso mes interes so, ma tambe interes di otro hende.”—Filipensenan 2:4.
a Saca for di e buki Reclaiming Conversation.