•  Kico ta flirtmento?

•  Dicon tin hende ta flirt?

•  Kico ta e peligernan di flirtmento?

•  Loke otro hobennan ta bisa

 Tin hende ta pensa cu flirtmento ta un manera pa laga un hende di e sexo opuesto sa cu bo ta interesa den dje. Esey por ta cu palabra of accion. Ta malo pa mustra interes romantico den un hende? No necesariamente. Un mucha muher cu yama Ann a bisa: “Si bo tin edad pa casa y tin interes den un hende, con bo por haya sa kico e ta sinti pa bo?”

 Sinembargo, den e articulo aki nos lo trata un otro tipo di flirtmento: un hende cu ta haci manera e tin interes romantico den un otro hende sin intencion di cuminsa algo serio cu ne.

 “No tin nada malo den duna un hende atencion special cu e intencion di cuminsa un relacion romantico cu ne. Loke si ta malo ta pa laga un hende pensa cu bo ta interesa den dje sin intencion di cuminsa algo serio cu ne.”​—Deanna.

 Tin hende ta flirt djis pa nan sinti nan mas mihor di nan mes. Hailey a bisa: “Ora bo realisa cu bo por haya e tipo di atencion ey, lo bo kier haya mas di dje.”

 Pero si bo laga un hende pensa cu bo tin interes romantico den dje mientras cu no ta asina, bo ta mustra cu bo no tin cu nes cu su sintimentonan. Ademas, esaki ta mustra cu bo no ta madura. Bijbel ta bisa: “Bobedad ta alegria pa esun cu falta comprondemento.”—Proverbionan 15:21, Beibel Santu.

 Cu bon motibo Hailey a bisa: “Flirtmento por cuminsa como algo inocente, pero hopi biaha e ta caba na malo.”

•   Flirtmento ta daña bo reputacion.

   “Un hende cu ta flirt ta mustra cu e ta insigur y no ta madura. Bo ta ripara cu e no ta sincero y cu e ta purba di probecha di bo.”​—Jeremy.

   Bijbel ta bisa: “Amor ... no ta busca su mes interes.”—1 Corintionan 13:4, 5.

   Pensa riba esaki: Kico ta e cosnan cu bo por bisa of haci cu por duna bo e reputacion di ta un hende cu ta gusta flirt?

•   Flirtmento ta haci e otro hende dolor.

   “Si mi conoce un mucha homber cu ta gusta flirt, mi no kier ta banda di dje mes. E ta pone mi pensa cu e unico motibo cu e ta papia cu mi ta pasobra mi ta un mucha muher. Hende cu ta flirt no tin interes den mi; e unico cos cu nan ta busca ta pa nan sinti nan mes mihor.”—Jaqueline.

   Bijbel ta bisa: “Laga cada hende sigui busca, no su mes beneficio, sino esun di e otro persona.”—1 Corintionan 10:24.

   Pensa riba esaki: Un hende a yega di laga bo kere cu e ta interesa den bo siendo cu no ta berdad? Si ta asina, con bo a sinti bo despues? Con bo por evita di laga otro hende sinti nan asina?

•   Flirtmento ta pone cu ta bira mas dificil pa bo haya amor berdadero.

   “Ami lo no kier casa y ni sikiera date un hende cu ta gusta flirt. Con mi por siña conoce of confia un hende cu no ta sincero?”—Olivia.

   E salmista David a skirbi: “Mi no ta anda cu hipocritanan.”—Salmo 26:4, Beibel Santu

   Pensa riba esaki: Ki tipo di hende ta gusta un hende cu ta flirt? Ta e tipo di hendenan ey abo kier atrae?