Bestia Ta Bay Cielo?
Loke Bijbel ta bisa
Bijbel ta bisa cu di tur criatura riba Tera, ta un cantidad limita di hende so lo bay cielo. (Revelacion 14:1, 3) Nan ta bay cielo pa goberna como rey y sacerdote hunto cu Hesus. (Lucas 22:28-30; Revelacion 5:9, 10) Mayoria di hende lo ser resucita pa biba den paradijs riba Tera.—Salmo 37:11, 29.
Bijbel no ta bisa cu tin cielo pa mascota of pa cacho—anto cu bon motibo. Bestia no por tuma e pasonan necesario pa ricibi “e yamada celestial.” (Hebreonan 3:1) E pasonan ey ta inclui gana conocemento, pone fe y obedece Dios su mandamentonan. (Mateo 19:17; Juan 3:16; 17:3) Ta hende so a ser crea cu e speransa pa biba pa semper.—Genesis 2:16, 17; 3:22, 23.
Pa bay cielo, e criaturanan riba Tera mester ser resucita. (1 Corintionan 15:42) Bijbel ta menciona varios relato di resureccion. (1 Reynan 17:17-24; 2 Reynan 4:32-37; 13:20, 21; Lucas 7:11-15; 8:41, 42, 49-56; Juan 11:38-44; Echonan 9:36-42; 20:7-12) Sinembargo, tur tabata di hende y no di bestia.
Bestia tin alma?
No. Bijbel ta bisa cu tanto bestia como hende ta alma. (Numbernan 31:28, NW) Ora Dios a crea Adam, e prome homber, Dios no a duna Adam un alma. Mas bien, Adam “a bira un ser bibo.” (Genesis 2:7) Alma ta consisti di dos cos: “stof di tera” y “rosea di bida.”
Alma por muri?
Si, Bijbel ta bisa cu alma por muri. (Levitico 21:11; Ezekiel 18:20) Bestia y hende a bin di stof, pues ora nan muri tur ta bolbe na stof. (Eclesiastes 3:19, 20) Cu otro palabra, nan ta stop di existi. a
Bestia por peca?
No. Pasobra peca ta encera cualkier echo, sintimento of pensamento cu ta bay contra e normanan di Dios. Pa un criatura por peca, e mester por tuma un decision moral, pero bestia no tin e capacidad ey. Durante e poco tempo cu nan ta biba, generalmente bestia ta sigui nan instinto. (2 Pedro 2:12) Na final di nan bida, nan ta muri maske nan no a peca.
Maltrato di bestia ta aceptabel?
No. Dios a duna hende autoridad riba bestia, pero no e derecho pa maltrata nan. (Genesis 1:28; Salmo 8:6-8) Dios ta interesa den e bienestar di tur bestia—hasta di parha chikito. (Jonas 4:11; Mateo 10:29) Dios a ordena su sirbidornan pa trata bestia bon.—Exodo 23:12; Deuteronomio 25:4; Proverbionan 12:10.
a Pa mas informacion, wak capitulo 6 di e buki Kico Bijbel Ta Siña Realmente?
You May Also Like
PREGUNTA CU BIJBEL TA CONTESTA
Ken Ta Bay Cielo?
Hopi hende tin e idea robes cu tur bon hende ta bay cielo. Kico Bijbel ta siña realmente?
E TOREN DI VIGILANCIA
“Mi No Ta Sinti Mas Cu Mi Tin cu Cambia Mundo”
Con estudio di Bijbel a yuda un activista social haya e berdadero fuente cu lo cambia mundo?
TOCANTE NOS
Pidi un Bishita
Papia tocante un topico di Bijbel of haya sa mas tocante testigonan di Jehova.