E tradicionnan relaciona cu e fiesta di Pasco di Resureccion no ta basa riba Bijbel. Mas bien, historia ta demostra cu e tradicionnan relaciona cu e fiesta ey ta basa riba rito antiguo di fertilidad. Laga nos analisa algun di nan:

1.   Nomber: Segun Encyclopædia Britannica, origen di e nomber Ingles Easter pa Pasco di Resureccion no ta conoci; e ta deriva for di e nomber Eostre, cu ta e diosa Anglosahon di aurora y lente. Otro buki di referencia ta conect’e tambe cu Astarte, e diosa di fertilidad di Fenicia cu na Babilonia tabata conoci como Ishtar.

2.   Coneu: E Catholic Encyclopedia ta bisa cu “coneu ta un simbolo pagano y semper tabata un simbolo di fertilidad.”

3.   Webo di Pasco: Segun Funk & Wagnalls Standard Dictionary of Folklore, Mythology and Legend, e tradicion di busca webo di Pasco cu supuestamente e coneu di Pasco ta trece “no ta djis un wega inocente di mucha, sino parti di un rito di fertilidad.” Hende di algun cultura tabata kere cu webo decora di Pasco “tabatin poder magico y por a trece felicidad, prosperidad, salud y proteccion.”—Traditional Festivals.

4.   Paña nobo pa Pasco: Awe hende tin custumber di bisti paña nobo riba dia di Pasco. Segun The Giant Book of Superstitions, “tabata un falta di respet cu ta trece mala suerte pa saluda e diosa di Primavera, of Eastre, di Scandinavia sin paña nobo bisti.”

5.   Misa di aurora: Esaki tin di haber cu rito y ceremonia di hende cu den pasado tabata adora solo “durante e equinox di lente pa yama bonbini na solo y na su poder di duna bida nobo na tur cos viviente.”—Celebrations—The Complete Book of American Holidays.

 E obra The American Book of Days ta bisa lo siguiente tocante e origen di Pasco di Resureccion: “No tin duda cu na principio, Iglesia di antes a adopta tradicion pagano antiguo y a duna nan un nificacion cristian.”

 Bijbel ta instrui nos pa no adora Dios mediante tradicion y custumber cu e no ta aproba. (Marco 7:6-8) Na 2 Corintionan 6:17, Bijbel ta bisa: “‘Separa boso’, Jehova ta bisa, ‘y stop di mishi cu loke ta impuro.’” Pues, Pasco di Resureccion, of Easter, ta un dia di fiesta pagano cu nos mester evita si nos kier agrada Dios.