No. En bes di prohibi placer sexual, Bijbel ta bisa cu e ta un regalo di Dios pa pareha casa. Dios a crea hende “homber y muher” y a mira cu loke el crea tabata “masha bon.” (Genesis 1:27, 31, Beibel Santu) Ora el a uni e prome homber y muher den matrimonio, el a bisa cu “nan lo bira un carni.” (Genesis 2:24, Beibel Santu) E union aki a encera cu nan por tin un banchi di amistad intimo y hunto por haya placer den relacion sexual.

 Bijbel ta describi e placer cu un esposo por haya den matrimonio cu e palabranan aki: “Alegra bo den e esposa di bo hubentud ... laga su pechonan satisface bo tur ora; sea semper encanta cu su amor.” (Proverbionan 5:18, 19, Beibel Santu) Dios kier pa esposanan tambe haya placer den relacion sexual. Bijbel ta bisa: “Tantu e hòmber komo e muhé mester kumpli ku nan obligashonnan matrimonial.”—1 Corintionan 7:3, Beibel na papiamentu koriente.

Un regalo solamente pa pareha casa

 Dios kier pa solamente hende homber y muher casa tene relacion sexual pasobra Hebreonan 13:4 ta bisa: “Laga matrimonio ta honorabel den bista di tur hende, y tene e cama matrimonial sin mancha, pasobra Dios lo husga esnan cu ta comete fornicacion y adulterio.” Parehanan casa mester keda fiel na otro y cumpli cu e promesa cu nan a haci na otro. Nan lo ta mas feliz ora nan no ta busca pa satisface nan mes deseonan, sino ta aplica e principio biblico aki: “Tin mas felicidad den duna cu den ricibi.”—Echonan 20:35.