Pica ta cualkier accion, sintimento of pensamento cu ta contrario na Dios su normanan. E ta inclui kibra e leynan di Dios door di haci loke ta malo, of inhusto, den bista di Dios. (1 Juan 3:4; 5:17) Bijbel ta bisa cu si un persona keda sin haci loke ta corecto, esey tambe ta pica.—Santiago 4:17.

 Den e idiomanan original di Bijbel, e palabra pica ta nifica “hera e marca.” Por ehempel, un grupo di soldaat den antiguo Israel tabata asina apto den tira slinger, cu nan no tabata “hera.” Literalmente por a traduci e expresion ey como lo no a “peca.” (Huesnan 20:16, Beibel Santu) Pues, peca ta nifica hera e marca di Dios su normanan perfecto.

 Como e Creador, Dios tin e derecho di establece normanan pa humanidad. (Revelacion 4:11) Nos tur tin cu duna cuenta na dje pa nos accionnan.—Romanonan 14:12.

Ta posibel pa no peca nunca?

 No. Bijbel ta bisa cu nos “tur a peca y no por refleha e gloria di Dios.” (Romanonan 3:23; 1 Reynan 8:46; Eclesiastes 7:20; 1 Juan 1:8) Dicon esey ta asina?

 Na cuminsamento, e prome hendenan, Adam cu Eva tabata sin pica. Esey ta pasobra Dios a crea nan perfecto, segun su imagen. (Genesis 1:27) Pero, nan a bira imperfecto ora nan a desobedece Dios. (Genesis 3:5, 6, 17-19) Anto ora Adam cu Eva a haya yiu, nan a pasa pica y imperfeccion pa nan yiunan, manera un defecto cu nan ta hereda. (Romanonan 5:12) Rey David di Israel a bisa: “Den kulpa mi a nase.”—Salmo 51:5, Beibel na papiamentu koriente.

Tin algun pica cu ta mas grave cu otro?

 Si. Por ehempel, Bijbel ta bisa cu e hombernan di antiguo Sodoma tabata “masha malbado mes” y nan pica tabata “masha pisa mes.” (Genesis 13:13; 18:20, Beibel Santu) Laga nos wak tres factor cu ta determina con grave of serio un pica ta.

1.   Gravedad. Bijbel ta bisa cu nos mester evita picanan serio manera inmoralidad sexual, idolatria, hortamento, buracheria, extorsion, matamento y bruheria. (1 Corintionan 6:9-11; Revelacion 21:8) Pero, Bijbel ta haci un diferencia entre e picanan aki y otro pica cu nos ta haci sin cu nos por yuda of sin pensa. Por ehempel, nos accion y palabra por hurt otro hende sin cu nos kier. (Proverbionan 12:18; Efesionan 4:31, 32) Sin embargo, Bijbel ta anima nos pa no minimisa e gravedad di ningun pica pasobra esaki por hiba na violacionnan mas serio di e leynan di Dios.—Mateo 5:27, 28.

2.   Intencion. Tin hende ta comete pica pasobra nan no conoce e mandamentonan di Dios. (Echonan 17:30; 1 Timoteo 1:13) Aunke Bijbel no ta hustifica e tipo di picanan aki, e ta distingui nan for di e tipo di picanan unda un persona ta kibra Dios su ley deliberadamente. (Numbernan 15:30, 31) Bijbel ta indica cu e persona cu ta peca deliberadamente tin un “curason malbado.”—Jeremias 16:12, Beibel Santu.

3.   Frecuencia. Bijbel ta haci un distincion tambe entre comete pica un biaha y practica e mesun pica pa un tempo largo. (1 Juan 3:4-8) Dios ta condena esnan cu ta “practica pica deliberadamente” hasta despues di a haya sa loke ta corecto.—Hebreonan 10:26, 27.

 Personanan culpabel di pica serio, por sinti nan hopi malo pa motibo di e fayonan cu nan a comete. Por ehempel, Rey David a skirbi: “Mi kulpa a subi pasa riba mi kabes, manera un peso fuera di mi forsa.” (Salmo 38:4, Beibel na papiamentu koriente) Sin embargo, Bijbel ta duna e speransa aki: “Laga e malbado bandona su caminda, y e hende inhusto su pensamentonan; y lag’e bolbe cerca SEÑOR, y e lo tin compasion cu ne; y cerca nos Dios, pasobra e lo pordona abundantemente.”—Isaias 55:7, Beibel Santu.