Ken mester siña mucha tocante sex? Bijbel ta bisa cu ta mayornan tin e responsabilidad aki y hopi mayor a haya e siguiente consehonan practico:

•   No tene berguensa. Bijbel ta papia habri tocante relacion sexual y tambe e ta haci mencion di organonan sexual. Dios a bisa e nacion di Israel pa siña “mucha” tocante e cosnan aki. (Deuteronomio 31:12, Beibel Santu; Levitico 15:2, 16-19) Bo por uza palabranan respetuoso cu no ta kita for di e dignidad di e asunto aki y di e partinan intimo di curpa humano.

•   Siña nan gradualmente. En bes di tene un combersacion largo cu bo yiu tocante asunto sexual ora e ta cerca di bira teenager, siñ’e gradualmente segun su capacidad di capta cos.—1 Corintionan 13:11.

•   Siña nan normanan moral. Tin scol cu ta duna algun orientacion riba tereno sexual, pero Bijbel ta anima mayornan pa bay mas aleu cu esey. Nan mester instrui nan yiunan no solamente encuanto ki funcion organonan sexual tin, sino tambe e punto di bista corecto cu nan mester tin relaciona cu asuntonan sexual.—Proverbionan 5:1-23.

•   Scucha bo yiu. Keda calmo y no core husga bo yiu ora e haci pregunta tocante sex. Mas bien, sea “cla pa scucha, slow pa papia.”—Santiago 1:19.

Con bo por proteha bo yiu contra hende cu kier abusa di dje sexualmente?

•   Tene bo mes na altura. Busca pa sa con hende cu ta abusa di mucha sexualmente ta actua.—Proverbionan 18:15; wak capitulo 32 di e buki Questions Young People Ask​—Answers That Work (volumen 1).

•   Keda pendiente di bo yiu. No laga bo yiu cerca ken cu ta sin haci sigur cu ta hende cu bo por confia, y no laga bo yiu “pa su cuenta.”—Proverbionan 29:15, Beibel Santu.

•   Siña bo yiu cu obediencia tin limite. Yiunan mester siña obedece nan mayornan. (Colosensenan 3:20) Pero, si bo siña bo yiu cu semper e tin cu obedece tur hende grandi, e por cay facilmente den man di hende cu tin mal intencion. Por ehempel, un mayor cristian por bisa su yiu: “Si cualkier hende bisa bo pa haci algo cu Dios no kier, no hacie.”—Echonan 5:29.

•   Train cu bo yiu con e por proteha su mes. Siña bo yiu kico e tin cu haci ora un hende ta purba abusa di dje ora abo no t’ey. Train bo yiu kico e por haci den un situacion asina. Esey por dun’e e confianza necesario pa bisa: “Stop, no haci e cos ey! Mi ta bisa mi tata y mi mama!” Anto siñ’e pa despues e core bay na careda. Kisas lo bo tin cu “keda papia” bes tras bes cu bo yiu pasobra e por lubida facilmente.—Deuteronomio 6:7, Beibel na papiamentu koriente.