Si! Bijbel ta bin di “Dios, kende ta consola esnan cu ta deprimi.” (2 Corintionan 7:6) Aunke Bijbel no ta un buki tocante salud mental, el a yuda hopi hende stop di pensa tocante suicidio. Bijbel su conseho practico por yuda bo tambe.

•  Ki conseho practico Bijbel ta duna?

•  Bijbel ta papia tocante hende cu no kier a biba mas?

•  Ki texto di Bijbel por yuda bo lucha contra pensamento di suicidio?

•  Kico nos por haci si un amigo bisa: “Mi kier muri”?

•  Kico si antes mi a purba di caba cu mi bida?

• ● Papia tocante bo sintimentonan.

   Loke Bijbel ta bisa: “Un amigo ta stima tur ora bay, y un ruman ta naci pa tempo di adversidad.”—Proverbionan 17:17.

   Nificacion: Nos mester di e yudansa di otro hende ora nos tin sintimentonan negativo cu ta laga nos sinti angustia.

   Si bo tene bo pensamentonan pa bo so, bo ta carga un peso cu por bira insoportabel. Pero si bo papia cu otro hende tocante bo sintimentonan, bo por cuminsa sinti bo mas mihor y mira bo situacion na un manera mas positivo.

   Loke bo por haci: Papia cu un hende awe, kisas un famia of un bon amigo. a Un otro manera cu bo por expresa bo mes ta di skirbi loke bo ta sinti.

• ● Busca yudansa profesional.

   Loke Bijbel ta bisa: “Hende bon di salud no tin mester di dokter, ma hende malo si.”—Mateo 9:12.

   Nificacion: Nos mester busca yudansa medico ora nos ta malo.

   Pensa pa comete suicidio por ta un indicacion di maleza mental of emocional. Mescos cu maleza fisico, bo no mester tin berguensa. Bo por haya yudansa pa trata cu maleza mental y emocional.

   Loke bo por haci: Busca yudansa di un dokter specialisa mas pronto posibel.

• ● Corda cu Dios ta interesa den bo.

   Loke Bijbel ta bisa: “No ta pa dos cen preto nan ta bende cinco mofi? Toch Dios no ta lubida ni un di nan ... Pues, no tene miedo; boso ta bal mas cu hopi mofi.”—Lucas 12:6, 7.

   Nificacion: Bo ta valioso pa Dios.

   Kisas bo por sinti cu bo ta bo so, pero Dios ta wak loke bo ta pasando aden. Dios ta interesa den bo—hasta si bo a perde gana di biba. Salmo 51:17 ta bisa: “Un curason arepenti y kibra, o Dios, bo no ta desprecia.” Dios kier pa bo biba pasobra e ta stima bo.

   Loke bo por haci: Busca prueba den Bijbel cu ta mustra cu Dios ta stima bo. Por ehempel, wak capitulo 24 di e buki Hala Cerca Jehova.

• ● Resa na Dios.

   Loke Bijbel ta bisa: “Tira tur boso inkietud riba [Dios], pasobra e ta interesa den boso.”—1 Pedro 5:7.

   Nificacion: Dios kier pa bo cont’e tur loke bo ta pensa y sinti.

   Dios por duna bo tanto e paz mental como e forsa pa sigui padilanti. (Filipensenan 4:6, 7, 13) Di e manera aki, Dios ta sostene e persona cu ta sclama na dje den oracion pa yudansa.—Salmo 55:22.

   Loke bo por haci: Resa na Dios awe. Menciona su nomber, Jehova, y bis’e loke bo ta sinti. (Salmo 83:18) Pidi Dios yuda bo sigui padilanti.

• ● Medita riba e speransa di Bijbel pa futuro.

   Loke Bijbel ta bisa: “Nos tin e speransa aki manera un anker pa nos alma; e ta sigur y tambe firme.”—Hebreonan 6:19.

   Nificacion: Bo sintimentonan por varia masha hopi mes, manera un tormenta ta suta un barco, pero e speransa cu Bijbel ta duna por yuda bo keda stabiel.

   E speransa ey no ta un fantasia pero ta basa riba Dios su promesa pa caba cu tur loke ta pone nos sufri.—Revelacion 21:4.

   Loke bo por haci: Bo por siña mas tocante e speransa den Bijbel ora bo lesa les 5 di e foyeto Dios Tin Bon Noticia pa Nos!

• ● Haci algo cu bo ta gusta.

   Loke Bijbel ta bisa: “Un curason contento ta un bon remedi.”—Proverbionan 17:22.

   Nificacion: Ora nos haci cos cu ta duna nos goso, nos lo mehora nos salud mental y emocional.

   Loke bo por haci: Haci algo cu bo sa cu bo gusta. Por ehempel, scucha musica edificante, lesa algo cu ta anima bo, of haci un hobby. Lo bo ta mas feliz tambe ora bo haci algo pa yuda otro hende, hasta si ta algo simpel.—Echonan 20:35.

• ● Cuida bo salud fisico.

   Loke Bijbel ta bisa: “Entrenamento fisico ta yuda.”—1 Timoteo 4:8.

   Nificacion: Haci ehercicio, drumi suficiente y come cuminda saludabel ta bon pa nos.

   Loke bo por haci: Bay cana duro maske ta pa 15 minuut so.

• ● Corda cu sintimento y otro cosnan den bida ta cambia.

   Loke Bijbel ta bisa: “Boso no sa con boso bida lo ta mañan.”—Santiago 4:14.

   Nificacion: Un problema cu ta duna bo angustia—hasta si bo ta pensa cu no tin solucion—kisas ta temporal.

   Sin importa con dificil bo problema ta parce awe, mañan e por cambia. Pues, no entrega. (2 Corintionan 4:8) Bo problema por cambia cu tempo, pero si bo caba cu bo bida bo no por haci nada mas.

   Loke bo por haci: Lesa relato di Bijbel tocante persona cu a sinti nan asina desanima cu nan kier a muri, y wak con nan bida a mehora cu tempo—hopi biaha na un manera cu nan no a spera. Laga nos wak algun ehempel.

 Si. Bijbel ta menciona algun hende cu a bisa “mare mi por muri.” Dios no a rabia cu nan. Al contrario, el a yuda nan. Dios por yuda abo tambe.

Elias

•  ● Ken e tabata? Elias tabata un profeta cu curashi. Pero tabatin momento cu e tambe a sintie desanima. Santiago 5:17 ta bisa: “Elias tabata un homber cu e mesun sintimentonan cu nos.”

•  ● Dicon e kier a muri? Na dado momento, Elias a sintie su so, cu miedo y cu e no ta bal nada. Pues el a roga: “SEÑOR, tuma mi bida.”—1 Reynan 19:4.

•  ● Kico a yud’e? Elias a desahoga su mes cerca Dios. Con Dios a anim’e? Dios a mustra Elias cu e tabata interesa den dje y a demostra con poderoso e ta. Ademas, Dios a sigura Elias cu e tabata valioso y a dun’e un ayudante bondadoso y capaz.

•  ▸ Lesa tocante Elias: 1 Reynan 19:2-18.

Job

•  ● Ken e tabata? Job tabata un homber rico cu un famia grandi y un fiel sirbidor di e Dios berdadero.

•  ● Dicon e kier a muri? Diripiente hopi cos malo a sosode cu Job. El a perde tur su cosnan material. Tur su yiunan a muri den un desaster. El a haya un maleza doloroso. Y finalmente, el a ser acusa falsamente di ta responsabel pa su problemanan. Job a bisa: “Mi ta odia e bida akí, e ta kaba ku mi!”—Job 7:16, BPK.

•  ● Kico a yud’e? Job a haci oracion na Dios y a papia cu otro hende. (Job 10:1-3) El a haya animacion cerca un amigo compasivo, Eliu, kende a yuda Job mira su situacion for di un otro angulo. Mas importante ainda, Job a acepta guia y yudansa di Dios.

•  ▸ Lesa tocante Job: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moises

•  ● Ken e tabata? Moises tabata lider di e antiguo nacion di Israel y tabata un profeta fiel.

•  ● Dicon e kier a muri? Moises tabatin hopi responsabilidad, hende a critic’e constantemente, y el a sintie morto cansa. Pues, el a sclama na Dios: “Por fabor, mata mi mesora.”—Numbernan 11:11, 15.

•  ● Kico a yud’e? Moises a conta Dios con e tabata sinti. Dios a yuda Moises cu su trabou pa asina baha su stress.

•  ▸ Lesa tocante Moises: Numbernan 11:4-6, 10-17.