28 DI OCTOBER 2022
NOTICIA INTERNACIONAL
Actualmente Tin Mas cu 100 Ruman Encarcela na Rusia y Crimea
Desde 26 di october 2022, tin 106 ruman homber y cuater ruman muher detene of cera den prizon na Rusia y Crimea pa motibo di nan fe. Ruman Dmitriy, kende tin 44 aña di edad, a bira e di 100 sirbidor di Jehova cu a ser encarcela. Ruman Dmitriy a ser aresta dia 8 di september 2022. Nan a acus’e di a participa den actividad extremista pasobra e tabata bay reunion di congregacion y predica na otro persona. Desde 2017, un cantidad di mas o menos 350 testigo di Jehova tabata cera den prizon.
Polis a aresta Dmitriy y pone den aresto preventivo despues cu nan a haci un entrada hudicial na su apartamento cu ta keda den e region Chelyabinsk. Dos dia despues, nan a ser’e den un prizon na Novosibirsk. E prizon ey ta keda mas cu 1.500 kilometer leu for di su cas.
Dmitriy ta comparti un cel cu 12 otro persona. Dmitriy su esposa, Marina, no tin mag di bishit’e. Pesey, nan ta comunica via carta.
Marina a bisa: “Durante e prome dianan despues cu el a ser aresta, mi no por a drumi bon y mi tabata lanta cada bes den marduga. E rumannan di nos congregacion tabata invita mi pa pasa dia cerca nan y esey a yuda mi hopi.”
Marina a bisa cu Dmitriy ta hopi positivo. Marina a sigui bisa: “Jehova ta percura pa bon p’e.”
Marina cu Dmitriy Dolzhikov
A base di Ley Penal di Federacion Ruso, e autoridadnan ta acusa nos rumannan di ta extremista. Anna Safronova, kende tin 27 aña di edad, tambe nan a acusa di ta extremista. Actualmente, Anna Safronova ta sintando un castigo di seis aña den prizon. Esey ta un di e sentencianan di mas largo cu un ruman muher a haya.
Aresto di Dmitriy ta un otro logro di Rusia su campaña bergonsoso contra testigonan di Jehova. E campaña ey tin 5 aña andando, a pesar di intervencion di diferente organisacion internacional. Ora Corte Supremo di Rusia a dicta sentencia contra testigonan di Jehova na aña 2017, e autoridadnan Ruso a bisa cu nan lo elimina tur entidad legal di e Testigonan pero cu nan lo no a stop nan actividadnan spiritual. Sinembargo, nan a stroba e actividadnan spiritual di e Testigonan. Awe, tin 308 caso penal contra casi 700 testigo di Jehova. Ademas, e autoridadnan a haci mas cu 1.851 entrada hudicial na cas di testigo di Jehova.
Nos ta haci oracion pa Dmitriy y pa tur nos rumannan cu ta ser persigui pa motibo di nan fe. Nos tin sigur cu Jehova lo sigui duna nan forsa pa persevera.—Mateo 24:13.