Cinc’or di mainta, Ruman Femi Durodola y su casa, Yana, a haya un yamada di un anciano di nan congregacion cu a lanta nan for di soño. Ruman Yana ta conta: “E anciano a bisa: ‘No pensa mucho riba e asunto; djis prepara. E ehercito di Rusia ta yegando Kiev!’ Despues di e yamada ey, mi a bira masha nervioso.”

Ta recientemente Femi a casa cu Yana. Femi ta di Nigeria y Yana ta di Ucrania. Despues di e yamada, nan a bisti, prepara nan ultimo koffie cu nan lo bebe na nan cas y lesa nan texto di dia. E texto di e dia ey a bisa: “Boso lo tin forsa si boso keda calmo y demostra confianza den mi.” (Isaias 30:15, NW) Femi a haci un oracion ferviente na Jehova. Caba, nan a coy nan go bag, y nan a laga tur otro cos atras pa busca refugio na Hulanda.

Tin hopi ruman cu a haci mescos cu e pareha ey. Nan a tuma un decision personal pa bandona Ucrania despues cu Rusia a invadi Ucrania riba 24 di februari 2022. Tin mas o menos 130.000 testigo di Jehova na Ucrania. Te cu awor, mas cu 36.000 Testigo a dicidi di bandona nan cas. Y mas cu 16.000 di e rumannan ey a bay otro pais. Hopi di nan a laga nan cas, trabou y congregacion atras. Durante e guera, niun hende homber na Ucrania entre 18 pa 60 aña di edad no tabatin mag di bandona Ucrania. Sinembargo, tabatin excepcion. Por ehempel, si un hende homber tin ciudadania di otro pais e tin mag di bay.

Algun di e rumannan cu a dicidi di bay ta coy trein of bus. E biahe ta basta pisa y tin biaha nan no sa di antemano unda nan lo bay. Nan ta pone fe den Jehova y cu curashi nan ta cuminsa nan biahe. Nan ta bandona nan stad cu a keda tur destrui pa motibo di e guera, sin sa si nan lo bin bek.

Yana a bisa: “Nos a laga tur cos atras. Nos a djis bay cu algun cos. Loke nos ta pasando aden a pone mi realisa cu nos amistad cu Jehova ta e cos di mas importante.”

Cerca di ruman Lilia Antoniuk su cas, tabatin zonido di alarma pa avisa di un posibel atake di avion di guera. Ademas, e por a tende e zonido di bom cu ta explota. Tur caminda riba caya tabatin auto kima y pida pida di edificio y brug.

Ruman Lilia y su yiu muher, Oleksandra, di 17 aña di edad, a dicidi di bay for di Ucrania. Nan a biaha varios dia den trein pa yega Polonia. E trein tabata yen yen di hende. Ruman Lilia y Oleksandra no tabatin mucho cuminda, y nan mester a para hopi ora den trein. Nan a sinti nan mas trankil ora nan a yega e stad Przemyśl na Polonia.

Ruman Lilia a bisa: “Ora nos a mira e rumannan cu borchi di ‘JW.ORG’, nos tabata sa cu nos por a keda trankil y cu e rumannan lo yuda nos bon.” E rumannan a hiba Lilia y Oleksandra un Salon di Reino caminda nan por a sali for di friu, come algo y descansa un poco. Despues di un rato, nan a bay pa keda na cas di un ruman.

Mientrastanto, Ruman Lilia y su yiu muher a bay Alemania. Ruman Lilia a bisa: “Nos tabata sinti cu Jehova tabata cuida nos, y esey a fortalece nos fe. Mi ta aprecia Jehova su cuido amoroso hopi. Ademas, mi ta masha agradecido pa tur loke nos rumannan ta haci pa yuda nos den e tempo dificil aki.”

Ruman Anastasiia Kovalyova a conta con e ehercito di Rusia a haci un atake aereo riba e stad Zaporizhzhia. E tabata mira luz manera candela ta sali for di e armanan grandi cu tabata tira e bomnan, y for di su apartamento, e tabata tende e explosionnan. E subrino y subrina di Anastasiia tin shete y tres aña di edad. E bombardeonan cu tabata bin un tras di otro tabata spanta e muchanan asina tanto cu e famia a dicidi di bay. Anastasiia ta conta: “Nos no por a bay cu mucho cos. Pesey, nos tabata falta paña y varios otro cos. Pero e rumannan a regla tur cos pa nos. Nos a hasta haya mas di loke nos tabatin mester.” Anastasiia, su cuña Anya y e muchanan a bay Alemania via Polonia.

Cada bes cu Ruman Anastasiia Shchukina y su mama, Ruman Olha Lysenko, a tende e alarma cu ta avisa di un posibel atake di avion di guera, nan tabata cera nan mes den e bodega di nan cas chikito. E bodega tabata friu. E rumannan ey ta pionero regular. Nan tabata sirbi caminda tabatin mester di mas predicador, na e pueblo chikito Brailiv, Oblast Vinnytsia. Nan no tabata sa sigur si nan mester a bay for di Ucrania. Pero finalmente, ora e situacion a bira pio, nan a dicidi di bay. Nan a bay cu djis e cosnan necesario, y nan a biaha cu trein pa dos dia. Nan no por a drumi mucho den trein. No tabata facil pa nan haci e biahe, pasobra Ruman Olha tin 58 aña di edad y su salud no ta bon. Dos or di marduga, nan a yega e stad Rzeszow na Polonia. Nan rumannan cristian tabata eynan pa yama nan bonbini. Ruman Anastasiia a bisa: “Maske tabata hopi laat, nos rumannan tabata warda pa nos yega. Nos ta masha agradecido na Jehova y nos rumannan.”

Ruman Andrzej Chyba ta ciudadano di Polonia y su casa Elizabeth ta di Gran Britania. Nan tabata biba den e stad Sumy. Nan tabata den e bodega di cas di un ruman hunto cu cinco otro ruman. Anto nan por a tende e zonido di avion di guera ta bula, tiramento y explosion di bom. E rumannan a dicidi di wak e drama biblico: “O Yehova, den Bo Mi Ta Konfia.” Esey a duna nan mas curashi. E drama ey tabata basa riba e relato den Bijbel tocante Rey Ezekias y e menasa di Asiria contra Jerusalem.

Awor, Ruman Andrzej y su casa ta na Polonia. Ruman Andrzej a bisa: “Nos rumannan a manda nos varios animacion basa riba Bijbel. Por ehempel, nan a anima nos pa lesa Salmo 27 hunto.”

Nos tin sigur cu Jehova lo bendiciona nos rumannan cu a sufri “perdida di tur cos” material y ta wak padilanti pa un futuro sin guera.—Filipensenan 3:8.