Poco despues cu e guera na Ucrania a cuminsa, Iryna Makukha, un ruman muher soltera di 46 di edad, a bay stacion di trein na Kharkiv. El a dicidi cu lo ta mas safe pa e bay un otro pais. Tabata un desaster na e stacion di trein. Hende tabata subi trein sin sa unda e trein lo hiba nan. Iryna a subi un trein cu tabatin tur su bentananan tapa. Nan tabata haci esey pa evita un atake riba e trein. Ta te despues cu e trein a sali, Iryna a haya sa cu e trein tabata rumbo pa Slovakia.

Awor, Ruman Iryna ta biba na Republica Checo. El a yega Praga dia 3 di maart 2022. El a haya un trabou di limpieza, y e ta haci mantencion chikito na un edificio. E ta biba den un apartamento hunto cu dos otro ruman di Ucrania cu tambe ta refugiado. Ruman Iryna ta siñando Checo. Anto el a sigui traha den e trabou di tempo completo. E tin 20 aña caba ta trahando den e trabou di tempo completo.

Ruman Iryna a bisa: “M’a mira bon cla cu Jehova ta uza nos rumannan pa cuida nos. Esey a fortalece mi fe masha hopi mes.”

Casi 23.000 di nos rumannan di Ucrania a tuma e decision personal di bay otro pais pa busca refugio. Hopi bes, e rumannan cu a dicidi di keda biba na un otro pais a haya un luga mas safe pa biba. Pero nan a haya nan mes cu otro reto. Nan mester busca un cas y trabou, y nan mester regla nan papelnan. Ademas, e refugiadonan mester regla pa nan yiunan bay un scol nobo. Fuera di haci tur e cosnan ey, nan mester siña un idioma nobo tambe. E rumannan aki a realisa cu nan rutina spiritual y e yudansa di nan rumannan ta sumamente importante pa yuda nan durante e tempo dificil aki.

Famia Perceac a pasa den esey. Anatoli y Olena Perceac y nan yiu muher Alina di 17 aña di edad tabata biba na Mykolaiv Oblast, na Ucrania. E bombardeonan a destrui parti di e bario caminda nan tabata biba. Nan a bay Rumania dia 6 di maart 2022. Anatoli tin nacionalidad di Moldovia. Pesey, e tabatin mag di sali di Ucrania pa bay Rumania cu su famia. Olena a splica con nan a sinti ora nan mester a bandona nan pais. El a bisa cu bo por compar’e cu ora “bo ta saca un palo cu raiz y tur y plant’e un otro caminda.”

E rumannan na Rumania a yuda Famia Perceac haya un apartamento pa nan biba aden. Anatoli y Olena a logra haya trabou. Anto Alina por a sigui bay su scol na Ucrania via Internet.

E rumannan na Rumania a yuda e famia aki na varios manera practico. Ademas, e rumannan a duna e famia sosten emocional y spiritual. Regularmente, e rumannan ta pasa tempo cu e famia pa nan no sinti nan nan so. Olena y Alina ta siñando e idioma di Rumania. Loke ta yuda nan ta JW Language, y nan ta participa den e trabou di predicacion cu nan congregacion nobo. Anatoli a siña papia e idioma tempo e tabata mas jong.

Anatoli a bisa: “For di cuminsamento, nos por a mira con Jehova ta yuda nos. Jehova a mustra cu e ta stima nos; el a uza e organisacion y nos rumannan pa yuda nos.”

Alina Havryliuk tabata viuda prome cu e guera a cuminsa. E tin 37 aña di edad, y su yiu homber Vladyslav tin 16 aña di edad. Nan a bandona nan stad Vinnytsia, na Ucrania. Nan a yega Suwałki, na Polonia dia 27 di februari. Alina a conta: “Mi tabata preocupa tocante unda nos lo biba y con lo mi percura pa nos famia. Pero mi tabatin tur confianza cu Jehova lo cuida nos.”

Di biaha Alina a cuminsa busca un trabou cu lo no strob’e di bay reunion. El a haya trabou na un scol, caminda e mester haci limpieza y mantencion. Alina a bisa: “Mi ta agradecido cu e trabou cu mi a haya a duna mi mas oportunidad pa participa den e trabou di predicacion. Ademas, e ta yuda mi percura pa mi famia.”

Alina y Vladyslav ta siñando Polaco. Nan ta sirbi tambe como pionero auxiliar riba un base regular na un congregacion di idioma Polaco. Vladyslav a logra inscribi na un scol secundario.

Nos rumannan di Ucrania ta haya nan cu hopi dificultad, pero Jehova ta sigui duna nan e poder cu ta surpasa esun di hende. Nan a mira con e palabranan di 2 Corintionan 4:8 a cumpli den nan caso. E ta bisa: “Nos ta haya nos bou di hopi presion, ma nos no ta asina den preta cu nos no por move; nos no sa sigur kico pa haci, ma nos no ta totalmente sin salida.”