3 DI MEI 2022
NOTICIA INTERNACIONAL
“Sigui Fortalece Bo Amistad cu Jehova”
Programa Special pa Anima Nos Rumannan na Ucrania y Polonia
Dia 26 di april 2022, Ruman Mark Sanderson, un miembro di Cuerpo Gobernante di testigonan di Jehova, a yega Polonia. El a bay Polonia pa anima e rumannan cu a ser afecta pa motibo di e guera na Ucrania.
Algun ruman na Polonia ta haci trabou tecnico tras di cortina na e Salon di Asamblea
Tur congregacion na Polonia y Ucrania a ser invita pa un programa special cu a tuma luga dia 30 di april 2022. Na Polonia, e rumannan di Ucrania cu ta refugiado y e rumannan cu a yuda cu trabou di yudansa a ser invita pa asisti na e programa na e Salon di Asamblea na Varsovia. En total, incluso e personanan cu tabata conecta via sistema di conferencia di video, tabatin 250.000 persona cu a wak e programa na Polonia y Ucrania.
“Ruman Sanderson a bisa: “Nos rumannan na tur parti di mundo ta pensa riba boso y ta resa pa boso. Na nos oficina principal, tur dia e rumannan ta pidi Jehova pa yuda nos rumannan na Rusia y Ucrania. Na e reunionnan di Cuerpo Gobernante tambe nos ta pidi pa Jehova yuda nos rumannan na Rusia y Ucrania.” Ruman Sanderson a confirma e rumannan: “E dificultadnan cu boso ta pasando aden no kiermen cu boso a perde Jehova su bendicion. E ta mira boso; e ta stima boso, y e ta cerca di hende cu ta pasa den dificultad.”
Un grupo di ruman cu a evacua Mariupol, Ucrania, ta wak e programa special
Ruman Sanderson a sigui bisa: “Sigui fortalece boso amistad cu Jehova. Nos meta no ta djis pa logra yega na final di e dificultadnan, pero nos meta mester ta pa nos fe ta mas fuerte y pa nos tin un amistad mas cera cu Jehova. Esey ta e les cu Jehova kier siña nos.”
Serhiy, un anciano na e stad Odessa, Ucrania, a bisa: “E ultimo siman aki mi no por a drumi bon, pasobra mi ta sinti mi hopi preocupa, tristo y insigur. Sinembargo, [e programa special] a convence mi mas ainda cu Jehova no solamente ta interesa den su pueblo como grupo, pero cu e ta interesa den cada un di nos individualmente.”
Tatiana ta un ruman muher di Kiev cu ta refugiado. El a bisa: “Awe, m’a echt sinti cu Jehova ta hopi interesa den mi. Ta comosifuera Jehova a brasa mi pa mustra mi cuanto e ta stima mi. Ni maske unda nos bay, Jehova semper ta cu nos.”
Nos ta stima nos rumannan hopi, y nos tin sigur cu e programa special a convence nos rumannan mas ainda di Jehova su amor leal pa su pueblo.—Salmo 136:1.
