Dia prome di september, testigonan di Jehova rond mundo tabata ansioso pa cuminsa predica di cas pa cas atrobe, un trabou cu nos ta bon conoci p’e y cu nos ta balora masha hopi. Tabata un goso tambe pa participa na e campaña mundial pa ofrece curso di Bijbel durante september. Pa algun ruman, e predicacion di cas pa cas tabata algo cu nan tabata custumbra di haci. Sinembargo, pa algun otro ruman, tabata nan prome biaha cu nan a bay bishita hende personalmente na nan cas pa hiba mensahe biblico. Aki ta sigui algun experencia di rond mundo cu ta mustra con e aña di sirbishi 2023 a cuminsa.

Riba 2 di september 2022, Nicole y Tina, dos ruman muher di Petershagen na Noord Rijn Westfalia, a bay predica den un edificio cu varios apartamento, pero nan no a haya niun hende na cas. Ora nan tabata cana bay, nan a tende un señora jong yama nan. E señora a pidi nan pa bin papia un rato cu ne tocante Bijbel. Anto e señora a splica nan cu e no por a bin na porta ora nan a yama na prome instante. Ora e dos rumannan a drenta e apartamento di e señora, nan a mira e Traduccion di Mundo Nobo di e Santo Scrituranan riba mesa. Nan a mira cu e Bijbel tabata hopi uza. E señora a splica nan cu el a haya e Bijbel ey tres aña pasa tempo cu e tabata biba na Italia. Durante e pandemia, el a muda pa Alemania, y el a perde contacto cu e Testigonan. E rumannan a intercambia informacion di contacto cu e señora, y nan a invit’e na e reunionnan. Dos dia despues, e señora y su dos yiunan a bay reunion. E rumannan a percura pa un hende cuminsa studia Bijbel cu e señora.

Manuel cu Karol Gastelum ta dos pionero special cu ta yuda cu e trabou di predica na e idioma Mam. Nan a topa un señora lief, kende a invita nan den su cas. Como cu e señora no tabata sa cu Dios tin un nomber, e rumannan a dicidi di trata les 04 di e buki Bo Por Disfruta di Bida pa Semper! Titulo di les 04 ta: “Ken Dios Ta?” Ora nan a lesa Isaias 42:8, e señora a keda asombra di mira nomber di Dios, Jehova, den su propio Bijbel.

E señora a cuminsa yora. El a bisa cu un hende no mester djis tin un Bijbel; e mester sa tambe loke Bijbel ta bisa pa asina e por obedece e mandamentonan di Dios. Ora nan a caba e les, e señora a keda contento cu loke el a siña. El a bisa cu lo e conta su esposo tur loke el a siña. Famia Gastelum lo sigui studia Bijbel cu e pareha.

Ora pareha Nukamori tabata predica di cas pa cas, nan a papia cu un señora via intercom. Nan a introduci nan mes, y nan a bisa cu nan ta testigo di Jehova. E señora a pidi e pareha pa nan ward’e un rato. Despues di un rato, e señora a habri porta y bisa: “Mi tabatin hopi gana pa e testigonan di Jehova bishita mi.”

E señora a splica cu tempo e tabata biba na Nagasaki, el a cuminsa studia Bijbel cu e testigonan di Jehova. Durante e pandemia, el a muda bay Yokohama, y el a sigui studia via Zoom. E ruman cu tabata studia cu ne via Zoom a bis’e: “Lo tin un campaña na september. Siguramente, un testigo di Jehova lo bishita bo. Pidi nan pa studia cu bo personalmente.” E señora a keda sorprendi cu e testigonan di Jehova a bishit’e asina lihe. E señora a bisa cu e tin deseo di asisti na e reunionnan. Anto nan a traha afspraak pa e sigui cu e estudio di Bijbel.

Un pareha a ofrece un señora un curso di Bijbel. E señora a bisa e rumannan cu un tempo e tabata studia Bijbel cu testigonan di Jehova. El a bisa cu e tabata hasta asisti na e reunionnan. El a perde contacto cu e Testigonan, y e tabatin berguensa di busca contacto cu nan atrobe pasobra e no tabata biba segun e principionan di Bijbel. Anto, el a cuminsa yora. E pareha a lesa Salmo 10:17 pa e señora, y nan a bis’e cu Jehova no a lubid’e. Nan a elogi’e pa e echo cu e kier biba segun e normanan di Jehova. E señora a acepta un estudio di Bijbel. El a bisa cu su yiu homber di 16 aña tambe kier studia Bijbel pa e sa mas.

E siguiente dia, e pareha a bay bek cerca e señora. E señora y su yiu homber tabata spera nan. Nan a studia les 01 di e foyeto Bo Por Disfruta di Bida pa Semper! Despues di e estudio, e pareha a invita nan na e reunion di den weekend. Tanto e señora como su yiu homber a asisti na e reunion. Nan tur dos a bisa cu nan kier sigui studia Bijbel y asisti na e reunionnan.

Ramon a haci oracion y pidi Dios pa e haya un hende pa e predica na dje riba e prome dia cu a cuminsa predica di cas pa cas atrobe. Na e prome cas cu el a yama, un señora a habri porta djis un tiki asina pa wak ta ken. Ramon a cuminda e señora y introduci su mes. Prome cu e por a cuminsa cu su presentacion, e señora a bisa: “Bo sa pa cuanto tempo mi a warda pa e momento aki? Mi tabata haci oracion pa boso bishita mi.”

E señora a splica cu algun aña prome testigonan di Jehova a tuma contacto cu ne, y e tabata asisti na e reunionnan. Pero despues, el a muda y perde contacto cu e Testigonan. Ramon a splic’e cu nos no tabata predica di cas pa cas durante e pandemia. Anto Ramon a lesa Salmo 37:29 pa e señora, y el a mustra e señora con un curso di Bijbel ta bay. Mesora e señora a acepta pa studia Bijbel. Ramon a pidi un ruman muher pa bishita e señora.

Despues di e experencia ey, Ramon a bisa: “Mi sa cu Jehova y e angelnan ta guia nos pa nos haya e personanan cu kier scucha.”

Na un cas na Kentucky, Katelyn Thompson a ripara cu riba e postbus tabatin algun texto skirbi y e palabranan aki: “Hesus Ta Stima Bo.” Katelyn a bati na e porta, y un señora a contesta. Katelyn a introduci su mes, y el a bisa e señora cu, debi na e Pandemia COVID-19, nos no tabata bishita hende personalmente. Katelyn a splica e señora cu nos tabata skirbi carta y haci yamada di telefon pa anima y consola hende. Katelyn a puntra e señora con ta bay cu ne y cu su famia. E señora a bisa cu su esposo a muri durante e pandemia. El a sigui bisa: “Mi a haya varios carta di boso. Mi a sinti cu Dios tabata yuda mi na e momento cu mi tabatin mester di esey!” Katelyn a bisa e señora cu ta duel e cu e señora su casa a muri. Despues, el a trata les 02 di e foyeto Bo Por Disfruta di Bida pa Semper! cu e señora. Nan a lesa e textonan cu tin den e les, y nan a papia tocante resureccion. E señora a cuminsa yora. E señora a bisa cu precies un aña pasa su tata a muri. E señora a duna Katelyn su informacion di contacto, y el a bisa cu Katelyn por sigui bishit’e. Mas despues, Katelyn a haya un mensahe di telefon di e señora. E mensahe a bisa: “Danki! Mi tabatin mester di e animacion cu bo a duna mi awe.”

No tin duda, Jehova ta bendiciona e echo cu nos a cuminsa predica di cas pa cas atrobe y nos campaña pa ofrece curso di Bijbel!—Juan 4:35.