Despues di tres aña, nos organisacion a cuminsa tene asamblea di circuito en persona atrobe na januari 2023. Na januari 2023, nos a cuminsa tene scol teocratico tambe en persona na hopi pais. Ta bisto cu Jehova a bendiciona e areglonan aki.

Na Villahermosa, Tabasco State, Mexico mas o menos 200 publicador a yuda haci un Salon di Asamblea limpi pa e ta cla pa nan asamblea di circuito. Algun di e publicadornan a biaha casi 6 ora pa yega eynan. Un ruman muher a bisa: “Nos tin hopi tempo sin mira tanto ruman asina hunto na un luga. Nos no kier a perde e oportunidad aki pa yuda.”

Na un asamblea na Crownsville, Maryland, Merca, un ruman muher a bisa: “Mi ta asina contento. Fo’i ora cu m’a yega mi ta yora. Tur mi tissuenan a caba, y e programa no a ni cuminsa ainda. Lo mi no a perde esaki pa nada di mundo.”

E rumannan den hopi teritorio di sucursal tabata masha contento mes cu nan por a asisti en persona na e Scol di Proclamador di Reino y na e Scol pa Superintendente di Circuito cu Nan Casa. Ruman Giovanny Cabezas ta un instructor caminda ta tene scol na Palm Coast, Florida, Merca. El a bisa lo siguiente: “Mi a bira hopi contento ora m’a tende cu lo tene e scolnan teocratico en persona atrobe. Nos tin un luga y un ambiente tremendo aki; tur e instructornan, e studiantenan y e boluntarionan ta completamente dedica na haci Jehova su boluntad.”

Na januari 2023, un ruman muher cu yama Satoko Nakata a asisti na e Scol pa Superintendente di Circuito cu Nan Casa hunto cu su esposo. Ruman Satoko a bisa: “Tabata hopi bon cu, durante e pandemia, nos por a tene reunion y scol di pionero riba Zoom. Sinembargo, tabata dificil pa combersa cu otro, y nos no por a tende otro canta of hari. E scol aki cu nos a bay en persona tabata manera un regalo precioso di Jehova. Nos y e otro studiantenan a combersa y hari cu otro. Tin biaha, nos tabata yora hunto, y nos tabata canta hunto cu alegria. Mi ta hopi agradecido na Jehova y Cuerpo Gobernante.”

Jehova ta hopi contento ora e mira su pueblo bin hunto pa ador’e y pa asisti na scol teocratico. Nos ta sinti mescos cu Rey David, kende a bisa: “Lo mi gradici bo den e congregacion grandi. Lo mi alaba bo entre multitud di hende.”—Salmo 35:18.