Secretario General di Conseho di Europa a manda un carta cu e fecha 9 di december 2022 pa Minister di Relacion Exterior di Rusia. Den e carta, Secretario General a haci un apelacion na Rusia pa cumpli cu algun sentencia cu Corte Europeo di Derechonan Humano a dicta recientemente. Un di e sentencianan ey ta e decision historico di Corte cu ta declara e prohibicion contra testigonan di Jehova na Rusia ilegal. a

E carta a corda Rusia cu su gobierno mester tene su mes na e decisionnan cu Corte Europeo a tuma te cu 16 di september 2022. Rusia tin e obligacion ey maske el a stop di ta miembro di Conseho di Europa na maart 2022. Ademas, e carta a indica cu Conseho di Europa, via su Comite di Minister, lo sigui vigila si Rusia ta implementa e decisionnan di Corte Europeo.

For di juni 2022, Comite di Minister a cuminsa haci apelacion na Rusia pa kita e prohibicion cu Corte Supremo di Rusia a dicta na 2017 cu a prohibi tur actividad religioso di testigonan di Jehova. Comite di Minister a pidi Rusia “pa reevalua e leynan contra extremista cu ta declara e organisacionnan di testigonan di Jehova extremista ...; pa stop tur caso penal of investigacion contra testigonan di Jehova y pa laga tur testigo di Jehova cu ta cera sali liber. Ademas, mester kita tur consecuencia di tur testigo di Jehova cu a ser condena y mester duna tur partido den e caso nan propiedadnan bek of paga nan un compensacion.” b

Te cu awor, e prohibicion a causa problema legal pa mas cu 660 di nos rumannan cu djis kier sirbi nan Dios Jehova. Mas cu 360 di nan tabata cera den prizon, y 114 di nan ta den prizon of detencion preventivo na e momento aki.

Autoridadnan na Rusia a pone mas cu 450 di nos rumannan riba un lista federal di hende extremista y terorista. Esey ta pone cu nan y nan famia ta haya nan cu hopi dificultad. E lista aki ta publico. Pues, tur hende por wak ken ta riba e lista. Esey ta pone cu hopi hende ta wak e personanan riba e lista malo. Ademas, hopi di nan no por a haya trabou. Fuera cu nan nomber ta riba e lista, nan ta haya nan cu varios otro consecuencia legal: nan no tin acceso na nan cuenta di banco; ta mas dificil pa nan renoba nan seguro of cera un seguro nobo, bende propiedad, maneha nan inversionnan, haya herencia, of hasta cumpra carchi di SIM nobo pa nan telefon.

Nos ta contento cu Conseho di Europa ta sigui busca manera pa nos rumannan na Rusia haya husticia. Mientrastanto, nos rumannan rond mundo ta haya hopi animacion ora nan lesa e noticianan tocante nos rumannan na Rusia. Danki na Jehova, nos rumannan na Rusia tin fe fuerte, curashi y goso.—Filipensenan 1:12-14.