Dia 7 di juni 2022, Corte Europeo di Derechonan Humano a dicta un sentencia historico a contra Rusia debi cu Rusia ta prohibi testigonan di Jehova di practica nan fe. Corte a declara cu e prohibicion cu Rusia a impone riba e testigonan di Jehova na aña 2017 ta contra ley. Corte a indica tambe cu e echo cu Rusia a prohibi testigonan di Jehova di distribui nan literatura y di tin nan website jw.org ta contra ley. Corte a duna ordo pa Rusia stop cu tur investigacion y caso penal contra nos rumannan y pa laga tur testigo di Jehova sali di prizon. Corte a manda Rusia duna tur propiedad cu nan a confisca di testigonan di Jehova bek. Si Rusia no haci esey, nan mester paga un compensacion di 59.617.458 euro (63.684.978 dollar Mericano) pa e propiedadnan cu nan a confisca. Ademas, Corte a dicta cu Rusia mester paga e partidonan cu a haci e peticion pa e casonan aki un suma di 3.447.250 euro ($3.682.445 dollar Mericano) como daño y perhuicio.

E decision cu Corte a tuma ta conta pa 20 caso cu a ser entama entre 2010 y 2019. E partidonan cu a entama caso a surpasa 1.400. Tabatin testigonan di Jehova y varios entidad legal cu tabata entre e partidonan ey. Sinembargo, fuera di e personanan y e entidadnan ey, e decision di Corte ta na fabor di hopi mas persona y entidad. E decision ta bisa cu Rusia “mester haci tur esfuerso pa para tur caso of investigacion penal contra testigonan di Jehova ... Ademas, Rusia mester laga tur testigo di Jehova cu ta cera sali liber.” (Nos mes a haci algun palabra letter diki.) E decision aki ta exonera cada un di nos rumannan na Rusia y pafo di Rusia. E ta indica cu a base di ley nos rumannan ta ciudadano cu ta tene nan mes na ley. Ademas, e decision ta indica cu e investigacionnan y e casonan penal contra nos rumannan y echo cu ta encarcela nan ta inhusto.

Den henter e decision, Corte constantemente ta rechasa Rusia su ponencianan sin base cu nos creencianan, nos publicacionnan, nos website y loke nos ta haci ta extremista. Por ehempel, wak algun cos cu Corte a bisa den su decision:

• Loke nos rumannan ta haci: Corte ta sigui enfatisa cu e cortenan na Rusia “no a logra indica specificamente cu loke e partidonan cu a entama caso a bisa of haci tabata sea motiva of compaña pa violencia, odio of discriminacion contra otro hende.” (§271)

• E creencia cu testigonan di Jehova tin e berdad: “Na un manera pacifico, un hende por purba di convence otro hende cu su religion ta mihor cu otro religion, y e por anima otro hende pa bandona ‘religion falso’ y join e ‘religion berdadero.’ Esey ta un persona su derecho humano di eherce su religion y su derecho di libertad di expresion.” (§156)

• Transfusion di sanger: “E echo cu un señora cu ta miembro di e religion boluntariamente a nenga un transfusion di sanger ta un expresion di su derecho di tuma su mes decision ora ta trata di tratamento medico. Tratado Europeo di Derechonan Humano y ley di Rusia ta proteha e derecho ey.” (§165)

• Nenga servicio militar: “E echo cu hende ta rechasa servicio militar pa motibo religioso no a kibra ningun ley di Rusia.” (§169)

• Nos publicacionnan: “E actividadnan religioso y e contenido di e publicacionnan di e partidonan cu a entama caso ta pacifico. Esey ta cuadra cu e echo cu nan ta bisa cu nan siñansanan no ta promove violencia.” (§157)

• JW.ORG: Corte a determina cu e contenido di jw.org no ta extremista. Si e autoridadnan a haya cu algun parti di e website no tabata bon, nan mester a duna ordo na e organisacion pa kita e partinan ey di e website. Nan no mester a prohibi henter e website. (§231 y §232)

E decision ta critica e autoridadnan di Rusia. Ademas, e ta indica cu e autoridadnan tabatin prehuicio, cu nan no tabata imparcial y cu nan “no a actua di buena fe.” (§187) Por ehempel, e decision ta menciona e siguiente conclusionnan cu Corte a yega na dje:

• “E decision pa caba cu tur organisacion religioso di testigonan di Jehova na Rusia no tabatin base legal. Mas bien, e pruebanan ta indica cu e autoridadnan Ruso tabatin prehuicio contra testigonan di Jehova. E maneho aki tabatin, entre otro, como meta pa forsa testigonan di Jehova pa stop di sirbi nan Dios y preveni cu otro persona ta bira testigo di Jehova.” (§254)

• E autoridadnan Ruso a cera wowo pa e “foutnan cu tabatin den e parti formal di e proceduranan.” Por ehempel, Corte Supremo di Rusia a basa su decision solamente riba rapport cu polis y fiscal a presenta na hues, rapport cu tabata parcial. Corte Supremo di Rusia no a analisa tur e rapportnan cu a ser entrega na Corte na un manera imparcial. (§203)

• Intencionalmente, e autoridadnan a traha un ley contra actividad extremista cu tabata hopi amplio y vago. Esey a permiti e autoridadnan aplica e ley ey manera nan tabata kier contra testigonan di Jehova. (§272)

Nos no sa ki efecto e decision di Corte Europeo di Derechonan Humano lo tin na Rusia. Pero, al final, nos no ta depende di autoridad humano pa yudansa. Na luga di esey, “nos ta spera ansiosamente riba Jehova.” Jehova “ta yuda nos, y e ta nos escudo.”—Salmo 33:20, NW.