1 DI NOVEMBER 2021 | INFORMACION NOBO: 7 DI FEBRUARI 2024
RUSIA

INFORMACION NOBO—NOS RUMAN A BAY PRIZON | Ruman Dmitriy Barmakin Ta Sigui Mantene Su Goso a Pesar Cu E Tin Hopi Tempo den Detencion

PLAY

Riba 6 di februari 2024, Corte di Teritorio Primorye na Vladivostok a confirma e condenacion y sentencia di ocho aña di prizon cu Corte a dicta anteriormente contra Ruman Dmitriy Barmakin. E autoridadnan a detene Ruman Dimitriy mesora den e sala di Corte.

Riba 8 di augustus 2023, Corte di Teritorio Primorye a bay di acuerdo cu e apelacion di Ruman Dmitriy. Corte a anula e sentencia contra Ruman Dmitriy. Mesora, el a sali liber di detencion. Sinembargo, Ruman Dmitriy su caso a ser manda bek pa fiscal. Esey kiermen cu mester trata Ruman Dimitriy su caso pa di tres biaha.

Riba 27 di april 2023, Corte di Districto Pervorechenskiy di Vladivostok na Teritorio Primorye a condena Ruman Dmitriy. Corte a dicta un sentencia di ocho aña di prizon contra Ruman Dmitriy. E autoridadnan a detene Ruman Dmitriy mesora.

Riba 8 di april 2022, Corte di Teritorio Primorye a anula e decision cu a declara cu Dmitriy no ta culpabel. Mester trata su caso di nobo.

Algun Suceso Cu A Tuma Luga

Riba 22 di november 2021, Corte di Districto di Pervorechenskiy di Vladivostok na Teritorio Primorye a dicta sentencia: Corte a declara cu Ruman Dmitriy no ta culpabel, y Ruman Dmitriy a ser absolve di tur acusacion contra dje. Esaki ta prome biaha cu un corte na Rusia a dicidi cu un testigo di Jehova cu a ser acusa di a viola Articulo 282.2(1) di Codigo Penal di Rusia (cu tin di haber cu organisa actividad di un organisacion extremista) no ta culpabel. Corte lo kita e restriccionnan riba su actividadnan. Si fiscal no apela e caso, e veredicto lo bay na vigor riba 3 di december 2021
20 di april 2021

E caso penal a sigui
18 di december 2020

E caso penal a bay bek cerca e fiscal pasobra no tabatin suficiente prueba cu ruman Barmakin a comete un crimen. Corte no a kita e restriccionnan riba su actividatnan
18 di october 2019

Despues di 447 dia, Dmitriy a sali for di prizon, pero corte a pone restriccion pisa riba su actividadnan. Dies bes corte a alarga e cantidad di tempo cu Dmitriy mester a keda den aresto preventivo
28 di juli 2018

Banda di 7 or di mainta, un grupo di polis cu cara tapa y scopet a drenta e apartamento unda Dmitriy y Yelena tabata keda pa cuida Yelena su wela di 90 aña. Nan a hiba tanto Dmitriy como Yelena bek na e stad caminda nan tabata biba, na Vladivostok, cu ta keda 177 kilometer leu. Mesora/di Biaha nan a aresta Dmitriy, y nan a detene bou di aresto preventivo
27 di juli 2018

Nan a cuminsa un caso penal contra Ruman Dmitriy Barmakin
October 2017

Un señora di 30 aña cu ta traha pa e Agencia Federal di Siguridad di Rusia (FSB) a haci comosifuera e ta interesa den Bijbel. El a filma combersacion cu e tabatin cu diferente ruman sin cu nan tabata sa

Informacion Personal

Dmitriy Barmakin

Naci na: 1974 (Alushta, Crimea)

Background: Su mama a muri ora e tabatin dies aña. El a studia pa coki y despues pa traha software pa computer. El a casa cu Yelena na aña 2006. Nan gusta biaha y saca potret di bestia den naturaleza

El a cumpra su prome Bijbel como mucha ora cu e tabata bay scol. E consehonan practico cu el a haya den Bijbel a impresion’e. Cu tempo, el a studia Bijbel cu testigonan di Jehova y a batisa na aña 1994

Loke Nos Ruman A Bisa

Kico a yuda bo keda enfoca riba cosnan spiritual ora bo tabata den prizon?

Mi tabatin custumber di lesa Bijbel tur dia prome cu nan a detene mi. Ora bo ta den prizon, hopi biaha no tin nada pa haci durante dia. Pues, bo tin mas tempo pa pensa. Bo mente ta cuminsa pensa riba cualkier cos cu bo a yega di lesa of studia. Bo no por djis stop di pensa. Y si bo no a yena bo mente cu cosnan spiritual prome cu bo a cay cera, e ora ey lo ta hopi dificil pa bo keda leal.

Ki cualidad a yuda bo persevera ora bo tabata cera?

Hopi bes ora mi tabata pidi Jehova den oracion pa duna mi goso, e tabata contesta mi oracionnan. Y tur hende rond di mi por a mira cu mi tabata contento. Un mainta, ora nan tabata controla si tur prizonero t’ey, un di e wardadornan di preso a puntra mi: “Barmakin, dicon semper bo tin un smile riba bo cara?” Mi a contest’e: “Mi ta contento, pesey mi ta smile.” E wardador di preso a puntra mi: “Bo ta contento cu bo ta den prizon?” Mi a contest’e: “No! Semper mi tabata un persona contento, y mi no ta perde mi felicidad djis pasobra mi ta den prizon.” Algo hopi interesante ta cu mi mes no a nota cu mi tabata smile. Mi tabata hacie sin cu mi sa.

Sin importa ki decision corte tuma, kico bo ta determina pa haci?

Mi ta compronde cu Dios ta permiti mi pasa den e situacion aki pa asina su nomber por ser glorifica. Aunke cu e enemigonan ta purba di intimida Jehova su sirbidornan pa nan stop di predica, mi por mira cu e huesnan, e hendenan cu ta traha den corte y e fiscalnan ta realisando cu testigonan di Jehova ta bon hende. Pesey mi ta determina pa duna gloria na Jehova.

Aunke cu Dmitriy y Yelena ta separa for di otro atrobe pa motibo di prizon, e pareha aki ta pone un bunita ehempel pa nos pasobra nan a laga e goso cu nan ta haña di Jehova haci nan fuerte.—Nehemias 8:10.

COMUNICADO