27 DI DECEMBER 2022
RUSIA

“Ora Nos Pasa den Prueba, Jehova Ta Haci Nos Fuerte”

PLAY

Corte di e stad Apatity, na Region Murmansk, pronto lo anuncia un veredicto den e caso penal contra Ruman Denis Merkulov. Fiscal no a bisa ainda ki sentencia ta pidi pa Ruman Merkulov.

Informacion Personal

Denis Merkulov

Naci na: 1976 (Kirovsk, Region Murmansk)

Background: E ta traha como welderdo y electricien

E idea cu morto ta algo inevitabel tabata preocup’e hopi. El a bira masha contento ora cu, durante su curso di Bijbel cu testigonan di Jehova, el a siña tocante e proposito cu Dios tin pa humanidad. El a batisa na aña 1995. El a casa cu Nataliya na aña 1998

Loke Nos Ruman A Bisa

Kico bo a siña tocante bo mes durante e experencia aki?

Mi a siña cu no ta djis pasobra mi ta pasa den prueba mi ta bira un mihor persona. Tur dia, mi mester mustra cu mi ta confia den Jehova, y esey lo yuda mi pa mi no entrega. Regularmente, mi ta puntra mi mes: Mi decisionnan of e metanan cu mi ta pone den bida ta mustra cu mi ta confia den Jehova? Cuanto tempo mi ta aparta pa mi lesamento di Bijbel, preparacion pa reunion y e trabou di predicacion? Ora bo pasa den un prueba hopi dificil manera mi ta pasando aden, un prueba cu ta cambia bo bida completamente, ta solamente bo bon amistad cu Jehova y fe fuerte den dje lo yuda bo keda calmo y no entrega.

Tin un texto di Bijbel cu a yuda bo soporta situacion dificil?

E anochi prome cu mi a ser aresta, ami cu mi casa a papia tocante Isaias 41:10. E texto ta bisa: “No tene miedo, pasobra mi ta cu bo; no desmaya, pasobra mi ta bo Dios. Lo mi fortalece bo, si, lo mi yuda bo, si, lo mi sostene bo cu mi man drechi di husticia.” E siguiente dia, ora mi a ser encarcela den un centro di detencion, mi a keda ripiti e texto ey varios biaha den mi mente. Mi tabata para na final di cada frase di e texto, medita riba e parti ey y haci oracion. Mi tabata sinti manera ta Jehova mes tabata bisando mi e palabranan ey. Esey a yuda mi compronde cu Jehova no ta laga nos pasa den prueba pasobra e ta pensa cu nos ta suficientemente fuerte pa soporta nan nos mes. Mas bien, ora nos pasa den prueba, Jehova ta haci nos fuerte.

Ta un consuelo pa sa cu, si nos tin un bon amistad cu Jehova y pone confianza den dje, semper lo e haci nos firme y fuerte ora nos pasa den prueba.—1 Pedro 5:10.

Algun Suceso Cu A Tuma Luga

21 di juli 2021

E autoridadnan a rista cas di 14 testigo di Jehova na Apatity y den bisindario. E agentenan FSB a forsa drenta den e apartamento di Famia Merkulov, y nan a detene e pareha pa interoga nan. E autoridadnan a laga nan sali liber cuat’or di marduga e siguiente dia
22 di juli 2021

E autoridadnan a pidi Ruman Denis pa bin bek na oficina di e investigadornan. Despues, nan a ser’e den un centro di detencion temporal
23 di juli 2021

E autoridadnan a laga Ruman Denis sali liber, y nan a pon’e bou di aresto na cas
17 di september 2021

E autoridadnan a kita e aresto na cas, y nan a duna Ruman Denis ordo pa e no biaha
15 di juli 2022

E autoridadnan oficialmente a acusa Ruman Denis di a organisa actividad extremista pasobra e tabata “canta cantica” y “haci oracion na Jehova Dios”
20 di september 2022

E caso penal den corte a cuminsa

COMUNICADO