Ruman Rinat Kiramov a ser condena na april 2023. Aworaki, e ta sinta un sentencia di 7 aña di prizon den un campo pa trabou forsa. Riba 18 di april 2024 (un aña despues cu el a ser condena), e autoridadnan di prizon a manda Ruman Rinat di e campo pa trabou forsa pa un prizon cu ta duna cuido medico. Esey tabata algo inespera. Supuestamente, e autoridadnan a sospecha cu Ruman Rinat a haya tuberculosis. Dos dia despues, un grupo di prizonero a cuminsa interoga Ruman Rinat. Nan a exigi pa Ruman Rinat duna nan informacion tocante e testigonan di Jehova na Akhtubinsk, e stad caminda e tabata biba. Despues cu Ruman Rinat a nenga di haci esey, nan a cuminsa tortur’e. Pa cuater dia largo, nan a tortur’e na varios manera. E grupo a hasta uza un arma cu ta manda shock di coriente. Ademas, e hombernan no a laga Ruman Rinat drumi, sinta of baña. Nan tabata fors’e pa keda lanta y pa keda para riba su pianan henter dia y anochi. Ruman Rinat tabatin mag di come solamente un bes pa dia.

Algun dia despues cu e hombernan a cuminsa tortura Rinat, Galina (Ruman Rinat su casa) a bin bishit’e na e prizon. Galina a keda den shock ora el a wak su casa. El a mira cu Rinat su cara tabata tur blousa, cu Rinat no por a cana bon y cu su mannan tabata tembla. Despues cu Rinat a conta Galina loke a pasa, Galina a tuma contacto cu Rinat su abogado. Mesora, e abogado a pidi e autoridadnan pa haci un examinacion medico di Ruman Rinat pa e heridanan cu e tabatin, y e abogado a pidi pa haci un investigacion di henter e asunto.

Despues cu fiscal a ser informa di e asunto, nan a reuni cu Rinat, y nan a laga un dokter haci un examinacion medico. Despues cu e dokternan a confirma cu Rinat a ser tortura, fiscal a manda e caso pa Ministerio di Asunto Interino. E examinacion a saca afo tambe cu Rinat no tabatin tuberculosis. Pesey, riba 17 di mei 2024, nan a manda Rinat di e hospital bek pa e campo di trabou forsa. Eynan, e ta actualmente.

Rinat a bisa Galina loke a yud’e wanta henter e situacion. El a bisa: “Mi tabata djis keda resa y keda pensa riba texto di Bijbel. Niun hende no por a stop mi di haci e cosnan ey. Mi ta contento cu mi a studia Bijbel regularmente prome cu esaki a pasa cu mi. Esey a yuda mi corda texto di Bijbel.” Rinat a sigui bisa: “Hopi hende a logra soporta trato cruel debi cu nan ta dedica na cierto causa, y nan no tabatin Jehova su spirito santo. Pero ami si tin Jehova su poder sin limite pa fortalece mi. Mi a bisa den mi mes: ‘Awor ta mi chens pa mustra Jehova cu lo mi keda fiel na dje; lo mi no entrega.’”

Loke a pasa cu Ruman Rinat ta haci nos tristo. Pero Ruman Rinat su ehempel ta anima nos tambe, pasobra e ta mustra nos cu Jehova semper lo duna nos “poder cu ta surpasa esun di hende” pa nos por persevera.—2  Corintionan 4:7.