Na region Donetsk, e bringamento tabata fuerte. A pesar di esey, Ruman Mykola Bozhedomov tabata bay Kramatorsk varios biaha pa yuda mas tanto ruman posibel evacua e stad pa scapa nan bida.

Sinembargo, dia 8 di april 2022, Ruman Mykola a fayece pa motibo di un bombardeo cu a tuma luga riba e stacion di trein na Kramatorsk. Ruman Mykola tabatin 58 aña di edad.

Riba e dia ey, mas cu 50 hende a fayece, y mas cu 100 hende a ser herida despues di e bombardeo. Entre nan, tabatin un ruman muher cu a fayece. Anto, un ruman homber a ser herida. Otro ruman cu a sobrevivi e atake a bisa cu tabatin dos explosion masha duro mes, y pida hero di e bomnan a spart bay tur caminda.

Ruman Mykola tabatin 22 aña casa cu Ruman Nina. Ruman Nina a bisa: “Mi casa semper a pone interes di otro hende prome. Semper e tabata masha interesa pa yuda e rumannan di edad avansa y e rumannan cu tabata malo. Varios biaha, el bay Kramatorsk, pero cada bes tabata bira mas peligroso pa bay. Esaki lo mester tabata su ultimo biaha.”

Ruman Mykola y su casa a batisa hunto na aña 1997. Ruman Mykola tabata un anciano pa hopi aña. E rumannan ta dunando Ruman Nina hopi amor y apoyo. Ruman Nina a bisa: “Nan palabranan di consuelo ta loke ta yudando mi hopi den e momentonan dificil aki.”

Ruman Nina a bisa tambe cu e ta hayando hopi consuelo for di Bijbel. Un texto cu a anim’e hopi ta Isaias 40:28-31. Ruman Nina a bisa: “Jehova ta yuda mi haya forsa atrobe. Mi ta sinti cu Jehova ta stima mi masha hopi. Den pasado, mi tabata lesa tocante Jehova su amor den nos publicacionnan. Pero awor, mi mes ta sinti Jehova su amor.”

Nos ta sigui resa pa Ruman Nina y otro ruman cu a perde ser keri den e guera aki. Nos tin sigur cu Jehova lo sigui sostene nan.—Salmo 20:2.