Dia 24 di februari 2022, guera a cuminsa na Ucrania. Miles di testigo di Jehova ainda ta biba na algun parti di Ucrania cu tin hopi bringamento. Un grupo di 21 ruman homber di e stadnan Kremenchuk y Poltava a demostra cu nan ta stima nan rumannan masha hopi mes. Nan ta dispuesto pa bay na e partinan di Ucrania caminda tin bringamento pa yuda nan rumannan sali for di e areanan ey. Ademas, nan ta entrega producto nan nos rumannan den necesidad.

E rumannan ey a haci e biahenan aki 80 biaha den 6 siman. En total, nan a biaha 50.000 kilometer pa yega na e stadnan cu a sufri hopi pa motibo di e guera. Un di e stadnan ey ta Kharkiv. Eynan, nan a yuda 400 di nos rumannan evacua.

Te cu awe, nan a entrega 23 ton di cuminda. Nan a entrega tambe remedi, gasolin y otro producto. Prome cu e rumannan aki sali bay pa yuda nan rumannan, nan ta wak bon ki ruta ta mas safe y ta purba di evita e areanan caminda tin hopi bringamento. Tin biaha, nan biahe por dura 19 ora largo, pasobra e ruman hombernan mester para na varios blokeo militar pa nan auto ser rista.

Na caminda, e ruman hombernan por hasta mira avion di guera bula. Nan ta mira varios edificio cu a ser bombardia. Nan ta topa tambe cu varios tanki di guera y auto cu a ser destrui. Na algun ocasion, e ruman hombernan a sinti con tera tabata sacudi ora bom explota den bisindario.

Dia 2 di april 2022, Ruman Roman tabata preparando algun producto pa nos rumannan na Kharkiv. Diripiente, hopi misil a cuminsa cay riba caminda. El a core tuma refugio den un edificio cu tabata cerca di dje. Trinta minuut despues, el a mira con e bombardeonan a destrui e caminda cu e mester a tuma.

Ruman Volodymyr ta un di e boluntarionan cu a ofrece nan mes pa yuda core e autonan cu ta entrega e productonan. El a bisa lo siguiente tocante e situacionnan peligroso cu nan ta enfrenta: “Nos ta roga Jehova pa sabiduria pa nos tuma bon decision.”

Ruman Oleksandr y su casa, Valentyna, tabata biba na Kharkiv hunto cu Ruman Oleksandr su mayornan di edad avansa. Ora e atakenan tabata tumando luga na nan stad, for di nan bentana, nan tabata mira bom explota apenas 100 meter for di nan cas. Como cu nan no tabatin auto, nan no por a evacua e stad.

Dado momento, e rumannan a yega net na ora pa yuda nan evacua. Ruman Oleksandr a bisa: “Nos tabata gradici Jehova pa e rumannan cu a yuda nos.”

Vasyl, su casa, Natalia, y nan tres yiunan tabata varios dia scondi den bodega di nan cas. Dia 28 di februari 2022, un bom a explota cerca di nan cas mientras cu nan tabata den bodega. E explosion tabata asina fuerte cu el a destrui henter nan cas. Ruman Vasyl ta corda con duro e explosion a zona y cu tur luz den bodega a paga.

Ora cu e bringamento a stop un tiki, Ruman Vasyl y su famia a tuma refugio den bodega di un otro edificio den bisindario. Dia 3 di maart 2022, e rumannan a haya e famia aki. E rumannan a yuda e famia evacua e stad pa bay un luga mas safe na Ucrania.

Ruman Vasyl a splica con e tabata sinti despues cu e rumannan a yuda nan bay un luga mas safe. El a bisa: “Nos tabata asina agradecido na Jehova. Maske tabata djis un siman, loke nos a pasa aden tabata parce un eternidad. Pa prome biaha, nos por a come hunto atrobe na paz sin preocupa tocante siguridad di nos yiunan.”

Ruman Oleksandr, un di e rumannan cu ta yuda transporta e productonan pa nos rumannan, a bisa cu e asignacionnan pa bay yuda nos rumannan evacua ta demostra cu Jehova su pueblo ta uni. El a bisa: “M’a mira cu Jehova di berdad ta cuida su pueblo. Mi tabata masha contento pa mira riba cara di mi rumannan con agradecido nan ta.”

Nos ta aprecia nos ruman hombernan cu ta mustra tanto curashi. Nos ta pidi Jehova pa sigui bendiciona nan pa e sacrificio propio cu nan ta demostra.—Romanonan 12:10.