Ruman Liudmyla Mozul y Ruman Kateryna Rozdorska a sufri hopi pa motibo di e guera. Pero Jehova ta consolando nan. Ruman Liudmyla su casa Petro y Ruman Kateryna su casa Dmytro tabata un di e prome testigonan di Jehova cu a muri pa motibo di e guera na Ucrania. Lamentablemente, te cu awe, 34 di nos rumannan a muri pa motibo di e guera.

Ruman Petro y Liudmyla a batisa na aña 1994. Nan tabatin 43 aña casa.

Ruman Liudmyla a bisa: “Tur dia, mi rumannan ta anima mi. Nan ta sigui yama mi na telefon pa anima mi. Ademas, m’a haya un carta di sucursal cu tabata asina bunita cu awa a basha for di mi wowo ora mi tabata les’e.”

E guera a cuminsa dia 24 di februari 2022. Ruman Petro tabata sirbi como sirbidor ministerial den un congregacion di idioma di seña. El a muri riba 1 di maart 2022 ora e cu su famia tabata purba di huy for di e bombardeonan na e stad Kharkiv.

Riba e dia ey, despues cu tabatin varios dia di bombardeo, avion di guera a cuminsa ataca e stad. Ruman Petro y su famia a coy djis e cosnan necesario, y nan a sali den 30 minuut. Ruman Petro cu Liudmyla tabata den un auto y nan yiu homber, Oleksii, y su casa, Maryna, tabata den un otro auto. Liudmyla a conta: “Nos tabata core riba caminda den un area residencial. Dado momento, tabatin un atake aereo caminda nos tabata core. Nos auto tabata sacudi hopi pa motibo di e bombardeonan.”

Ruman Petro, kende tabatin 67 aña di edad, a core hala un banda pa evita di dal contra e auto di Ruman Oleksii. Toch, el a haya basta herida grave. Ruman Petro cu su casa Liudmyla mester a ser hiba hospital. Poco despues, Ruman Petro a muri. Ruman Liudmyla tambe tabatin herida. E tabatin pida hero di e bomnan den su pia y bariga. Oleksii cu Maryna no a ser herida. Tres dia despues cu Ruman Liudmyla a sali for di hospital, el a haya sa cu su casa a fayece.

Ruman Liudmyla a bisa: “Ora mi medita riba Jehova su bondad y su maraviyoso proposito pa futuro, esey ta laga mi sinti mi mas trankil. Mi tin sigur cu lo mi mira mi casa atrobe den e mundo nobo. Mi ta anhela pa e bunita dia ey yega.”

Ruman Dmytro cu Kateryna tabatin ocho aña casa. Dia 8 di maart 2022, Ruman Dmytro a yama su casa for di trabou, algun ora prome cu el a muri. Ruman Dmytro su ultimo palabranan tabata: “Un djis mi ta bin cas.”

Algun ora despues, un colega di Ruman Dmytro a yama Ruman Kateryna. E colega a bisa cu Ruman Dmytro a trapa riba un mina, y e mester a ser transporta pa hospital. Ruman Dmytro a muri cinco ora despues di su operacion.

Despues cu Ruman Kateryna a haya sa cu su casa a muri, el a bisa: “E anochi ey, Jehova a tene mi man, y el a carga mi den su brasanan. Mi tabata sinti cu Jehova tabata cu mi.”

Ruman Dmytro tabatin 28 aña di edad. El a batisa na aña 2006, y e tabata sirbi como anciano den Region Donetsk na Ucrania.

Poco despues di Ruman Dmytro su entiero, Ruman Kateryna a biaha 12 ora pa e por a bay un luga mas safe na Ucrania. El a bisa: “Mi a haya masha hopi animacion di mi rumannan di tur parti di Ucrania y hasta di otro pais. Nan a mustra hopi amor na mi, y esey a fria mi dolor un poco.”

El a sigui bisa: “Sirbishi tambe a yuda mi ... Ora mi ta sinti mi hopi tristo, mi ta pensa riba texto di Bijbel cu mi a siña for di cabes, manera Filipensenan 4:6 y 7. Y mi ta bisa nan na bos halto.”

Nos tin sigur cu Jehova lo sigui fortalece y consola nos rumannan cu a perde ser keri pa motibo di e guera na Ucrania.—Salmo 61:1-3.