Na augustus 2022, a ser anuncia cu lo a reanuda e predicacion di cas pa cas den algun area na Ucrania caminda ta safe pa haci esey. Nos rumannan tabata ansioso pa cuminsa predica di cas pa cas atrobe. Nan a ripara cu hopi hende tabata mustra interes den mensahe di Bijbel. Un persona cu a acepta un estudio di Bijbel a bisa: “Despues di a mira e cosnan horibel cu ta tumando luga durante e guera y cuanto hende ta sufri pa motibo di e guera, a bira bisto cu ta Dios so por resolve e problemanan di humanidad.” Aki ta sigui algun experencia.

Ruslan, un ruman di Congregacion Lanivtsi, tabata un poco nervioso pa cuminsa predica di cas pa cas atrobe. E cu su esposa a haci oracion na Jehova pa Jehova duna nan curashi y yuda nan haya hende cu ta interesa den un mihor futuro. Nan a keda asombra pasobra despues di apenas dos ora predicando, nan a papia cu ocho hende. Anto, tur ocho persona a acepta un estudio di Bijbel.

Olha y un otro ruman di Congregacion Kremenets tabata predicando di cas pa cas. Un homber a acerca nan pa puntra si nan tabata papiando cu hende tocante Palabra di Dios. E homber a bisa nan: “Mi ta huma, y mi ta bebe di mas. Mi a compronde cu pronto lo mi tin cu para dilanti di Dios pa duna cuenta na dje. Ora e momento ey yega, mi no kier ta e persona cu mi ta awor.” Nan a traha un afspraak cu ne pa cuminsa un estudio di Bijbel.

Ruman Vasyl di Congregacion Lviv-Riasne-Skhidnyi tabata den sirbishi cu su grupo di sirbishi. El a reconoce cas di un señora cu el a yega di papia cu ne algun aña prome. El a corda cu e señora tabata rabia y cu e no tabata kier papia cu testigonan di Jehova. Ruman Vasyl a dicidi di bati na e señora su porta pa ofrec’e un estudio di Bijbel. Pa su sorpresa, e mesun señora a bin na porta. E señora a bis’e cu e kier sa mas tocante e Scrituranan Santo. E señora a acepta un estudio di Bijbel, y nan a traha un afspraak cu ne pa bishit’e atrobe.

Serhii, kende ta den Congregacion Illintsi, a batisa na aña 2021. Nunca el a yega di predica di cas pa cas. E tabata nervioso; pesey, el a tuma tempo pa prepara masha bon mes. Serhii a bisa: “Mi a wak e videonan di ehempel pa presentacion masha hopi biaha. Despues di a haci esey, ta curashi so mi tabatin mester.” Serhii a bisa cu ora el a haya oportunidad pa papia cu hende tocante e bon noticia, el a bira masha contento. E no tabatin miedo mas.

Nikol di Congregacion Rozdil tambe tabatin un experencia similar. El a batisa na augustus 2022. El a bisa: “Mi tabata hopi nervioso; mi tabatin hasta miedo pa predica na hende en persona. Pero despues, mi a experencia con dushi ta pa papia personalmente cu hende tocante Jehova!”

E siguiente cifranan ta for di un informe cu nos a haya di Ucrania te cu 11 di november 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin tur cifra, pasobra ta dificil pa mantene contacto cu nos rumannan na tur parti di Ucrania.

• 46 publicador a muri

• 97 publicador a ser herida

• 12.569 publicador a bandona nan cas pa bay otro luga di e pais cu ta mas safe

• 590 cas a ser destrui

• 645 cas tin daño grandi

• 1.722 cas tin daño leve

• 6 Salon di Reino ta completamente destrui

• 19 Salon di Reino tin daño grandi

• 63 Salon di Reino tin daño leve

• Tin 27 Comite di Yudansa na Ucrania

• E comitenan a yuda 53.948 publicador haya otro luga mas safe pa keda

• 25.983 publicador a huy pa otro pais. Eynan, nos rumannan ta yudando e publicadornan ey