Casi 47.000 testigo di Jehova mester a bandona nan cas pa motibo di e guera na Ucrania. Hopi di nan a bay otro parti di e pais cu ta mas safe. Eynan, nan rumannan ta yuda nan. Nan rumannan ta duna nan paña, cuminda, luga pa keda y otro cos cu nan tin mester. E rumannan cu ta yuda mes tin e dificil financieramente. A pesar di esey, nan ta cla pa yuda nan rumannan cu ta den necesidad.

Olha ta un ruman cu ta biba na e stad Uman, na Ucrania. Durante e prome dos lunanan di e guera, Olha y su esposo, kende no ta Testigo, a laga 300 publicador keda na nan cas. Hopi di e rumannan ey a keda djis un anochi so. Hopi biaha, e rumannan tabata yega cerca Olha marduga. Anto, hopi biaha, nan tabata avisa Olha djis un rato prome cu nan a presenta na su porta cu nan tabata biniendo. Un biaha, Olha a laga 22 ruman pareu keda na su cas. Olha tin un yiu homber cu yama Stanislav. E tin 18 aña di edad. Ora e rumannan tabata bin keda na cas, Stanislav tambe tabata haya un oportunidad pa mustra generosidad. Hopi bes, e tabata drumi riba vloer pa laga e rumannan drumi den su camber.

Olha a conta: “Mi ta hopi contento cu mi por yuda Jehova su pueblo den e momentonan teribel aki. Esey ta haci mi hopi feliz.”

Andriy cu su esposa, Liudmyla, a laga hopi ruman keda na nan cas den transcurso di 5 siman. En total, 200 Testigo a keda cerca nan. Riba un anochi, 18 hende a keda na nan cas. Andriy a bisa: “Nos a sigui e conseho di sucursal pa nos tin poco cuminda extra warda. Pa e prome siman y mey, nos a uza e cuminda ey pa yuda e rumannan cu a keda cerca nos. E rumannan ey tabata laga carchi cu placa aden atras, y nos tabata uza e placa ey pa cumpra cuminda pa e rumannan cu tabata bin despues. Comite di Yudansa tambe tabata duna nos cuminda. Pues, nunca nos no tabatin falta di nada.”

Na maart, un ruman cu yama Vita y cu ta biba na e stad Ivano-Frankivsk a sali for di su apartamento y bay biba cu su ruman muher. El a haci esey pa e rumannan por a keda na su apartamento. Vita a bisa: “Pa ami, loke mi ta haci no ta un sacrificio pero un manera pa mi mustra amor na mi rumannan. Mi ta hopi contento cu mi por yuda mi rumannan. Nos ta un famia uni.”

Natalia cu su esposo y yiu muher ta biba na Ternopil. Nan tur a perde trabou ora e guera a cuminsa, y nan a uza mayoria di e placa cu nan tabatin gespaar pa cubri nan gastonan. A pesar di esey, nan tabata dispuesto pa laga un ruman muher y su yiu muher cu limitacion fisico keda na nan cas.

Natalia a conta: “Mi ta corda un experencia di un ruman muher na Africa. E no tabatin mucho placa, toch el a laga 14 ruman keda na su cas pa un congreso. Y niun di nan no tabatin falta di nada.” El a bisa cu e experencia ey a motiv’e pa pone necesidad di otro ruman prome.

Nos rumannan na Ucrania ta pasando den hopi situacion dificil. A pesar di esey, nan ta sigui confia den Jehova, y nan ta sigui mustra hospitalidad.—Romanonan 12:13.