Nos rumannan na Ucrania no a stop di apoya otro. Nan ta sigui yuda otro y asina mustra amor y sacrificio propio.

Ruman Olena tin 81 aña di edad. Riba 6 di juni, un bom a explota djis un par di meter leu di su cas. E bom a destrui cas di su bisiña y laga un buraco atras di 7 meter hundo. E explosion tabata asina pisa cu el a haci hopi daño na e cas di Ruman Olena.

Ruman Olena a bisa: “Ora mi tabata drumi, un muraya a cay net banda di mi cabes. Tabatin un stof preto den laira, y tur caminda tabatin glas y piedra benta. M’a gradici Jehova cu mi tabata na bida.” Algun minuut despues di e explosion, e rumannan den e area a bay cerca Ruman Olena. Un ruman homber su cas tambe a haya hopi daño; toch el a bin wak conta cu Ruman Olena. Ruman Olena a sigui bisa: “Ora e rumannan a yega, nan tabata den shock. Nan no tabata sa ki pa bisa. Pero e simpel echo cu nan tabat’ey tabata un animacion pa mi. Tabata masha bunita pa mira con nan tur tabat’ey pa apoya mi.”

Serhii ta un anciano cu hunto cu algun hoben den congregacion regularmente ta bishita Ruman Olena. Ruman Serhii a bisa: “Ora m’a tende cu tabatin un explosion cerca di Ruman Olena su cas, m’a keda hopi preocupa. M’a haya un alivio ora m’a mira cu e no a keda hopi herida; el a djis haya algun sla na su curpa. Casi bo no por kere, pero e prome cos cu Ruman Olena tabata kier despues cu su cas a keda destrui ta e publicacionnan cu el a haya algun dia prome.”

Nos ta contento cu e famianan di Ruman Olena a haya un cas nobo pa Ruman Olena. E congregacion ta sigui yuda Ruman Olena, y e ancianonan ta yam’e na telefon tur dia. E rumannan a cumpra aparato di oido pa Ruman Olena pa e por beneficia mas di e reunionnan. Ruman Olena a bisa: “Tin biaha, mi ta sinti manera mi no tin forsa, pero e reunionnan ta fortalece mi. Mi rumannan ta yama mi regularmente, y mi ta masha agradecido pa nan yudansa.”

Un pareha a tuma refugio den bodega di un Salon di Reino cu 200 otro publicador. Nan a skirbi un carta pa conta nan experencia. E ruman muher a bisa: “Mi tabata hopi impresiona cu e bunita manera cu e ancianonan tabata cuida nos. Nan a corda mi di e ehempel di David. David a risca su bida pa salba su carnenan for di un leon y un beer. E ancianonan cu tabata hunto cu nos mester a risca nan bida pa busca awa y cuminda pa nos. Ademas, nan tabata busca combustibel pa nos tin luz. Danki na nan esfuersonan, nos tabatin reunion di congregacion y salida pa sirbishi. Hasta ora e bombardeonan tabata hopi pisa, e ancianonan tabata bishita e rumannan cu a keda na nan cas. E ancianonan tabata trece cuminda y awa pa nan, y nan tabata consola e rumannan. Mi tin hopi respet pa e ancianonan ey. Prome cu e guera, mi tabata mira e ancianonan manera e rumannan cu ta siña nos y cu ta predica. Awor, mi ta mira nan manera wardador cu bo por conta cu ne. Mi ta asina agradecido pa e bon ehempel cu nan ta pone. Nos ancianonan tin curashi, semper bo por conta cu nan, y nan ta cuida nos bon.”

E publicadornan di un congregacion na Ucrania a skirbi un carta na sucursal di Ucrania tocante e rumannan cu ta dirigi e trabou di yudansa. Nan a bisa: “Nos ta masha agradecido mes. Nos ta asina impresiona cu e manera cu Jehova ta cuida nos mediante nos rumannan. Nos a mira con e palabranan di Hesus a cumpli den nos caso: ‘Na esaki tur hende lo sa cu boso ta mi discipelnan, esta, si boso ta stima otro.’”—Juan 13:35.

E siguiente cifranan ta for di un informe cu nos a haya di Ucrania te cu 21 di juni 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin tur cifra, pasobra ta dificil pa mantene contacto cu nos rumannan na tur parti di Ucrania.

• 42 publicador a muri

• 83 publicador a ser herida

• 31.185 publicador a bandona nan cas pa bay otro luga di e pais cu ta mas safe

• 495 cas a ser destrui

• 557 cas tin daño grandi

• 1.429 cas tin daño leve

• 5 Salon di Reino ta completamente destrui

• 8 Salon di Reino tin daño grandi

• 34 Salon di Reino tin daño leve

• Tin 27 Comite di Yudansa na Ucrania

• E comitenan a yuda 52.348 publicador haya otro luga mas safe pa keda

• 23.433 publicador a huy pa otro pais. Eynan, nos rumannan ta yudando e publicadornan ey