Na Ucrania, e rumannan ta contento pasobra nan por a cuminsa cu e predicacion publico, y nan a haya varios bon experencia. E superintendentenan di circuito y e ancianonan a informa sucursal cu hopi hende ta contento pa mira nos garoshinan di literatura atrobe. Algun persona a hasta bisa cu nan a sinti falta di mira testigonan di Jehova den nan bario.

Tatiana ta un ruman di Congregacion Serhiivka na region Odesa. El a dicidi di bay bishita e personanan cu el a yega di papia cu ne prome cu e pandemia. El a bisa: “Tabata bisto cu Jehova ta bendiciona nos esfuersonan pa cuminsa predicacion en persona atrobe.” Prome cu e pandemia, Ruman Tatiana a ofrece un señora un curso di Bijbel pero e no a acepta esey. Awor, el bishita e señora atrobe, y e señora tabata hopi interesa pa papia tocante Bijbel. Ademas, awor si, el a acepta un curso di Bijbel. Esey a anima Ruman Tatiana hopi. Pesey, el a bisa: “Mi tin cu bay bek cerca tur hende cu mi a yega di bishita pa wak si nan kier un curso di Bijbel!”

Yevheniy y Lilia ta dos publicador cu mester a bandona nan stad, Mariupol. Nan a bay biba na un luga mas safe na Ucrania. Durante e tempo ey, nan a sigui predica. Nan ta bisa cu e trabou di predica a yuda nan pa nan no keda pensa riba nan problemanan. Nan a bisa: “Nos bida a cambia drasticamente, y nos tabata sa cu cos lo no bay bek manera nan tabata na antes. No ta facil pa cuminsa un bida nobo otro caminda. A pesar di esey, nos sa cu Jehova semper lo yuda nos. E ta yuda nos mediante su spirito santo, y e ta uza nos rumannan cu ta cla pa yuda nos.”

Na otro luga na Ucrania, nos rumannan ta duna testimonio pa medio di nan bon obranan. Por ehempel, un grupo di ruman na e stad Mykolaiv a yuda un organisacion internacional haci reparacion na un deposito pa producto pa yuda e hendenan den e area. E rumannan a drecha e sistema di awa, pone planki na muraya y sorteer varios ton di producto. Ora un señora cu ta representante di e organisacion humanitario a bin controla e trabou, awa a cuminsa basha for di su wowo. El a bisa: “Mi no a spera cu nan lo haci e trabou asina bon.”

Nos rumannan na Ucrania ta pasando den tempo dificil. Pero nan ta keda activo den e trabou di predica y ta sigui “haci loke ta bon.” Esey ta yuda nan mantene nan goso.—Galationan 6:9.

E siguiente cifranan ta for di un informe cu nos a haya di Ucrania te cu 13 di juli 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin tur cifra, pasobra ta dificil pa mantene contacto cu nos rumannan na tur parti di Ucrania.

• 42 publicador a muri

• 97 publicador a ser herida

• 28.683 publicador a bandona nan cas pa bay otro luga di e pais cu ta mas safe

• 524 cas a ser destrui

• 588 cas tin daño grandi

• 1.554 cas tin daño leve

• 5 Salon di Reino ta completamente destrui

• 10 Salon di Reino tin daño grandi

• 36 Salon di Reino tin daño leve

• Tin 27 Comite di Yudansa na Ucrania

• E comitenan a yuda 52.947 publicador haya otro luga mas safe pa keda

• 23.863 publicador a huy pa otro pais. Eynan, nos rumannan ta yudando e publicadornan ey