12 DI AUGUSTUS 2022
UCRANIA
ULTIMO INFORME #12 | Nos Rumannan Ta Mustra Amor Durante e Crisis na Ucrania
“Hasta e Guera No Por A Para e Trabou di Haci Hende Discipel”
Den e siman di 23 pa 31 di juli 2022, hopi publicador di Ucrania a batisa na e congreso di 2022: Sigui Busca Paz! Nan a batisa na Ucrania mes y na varios otro pais caminda nos rumannan di Ucrania a huy bay. Te cu 2 di augustus, 1.113 publicador di Ucrania a batisa. Un ruman di Ucrania a bisa: “Hasta e guera no por a para e trabou di haci hende discipel. Hesus a cumpli cu su promesa: ‘Mi ta cu boso tur e dianan.’”—Mateo 28:20.
Nos ta contento cu nos por comparti e siguiente experencianan:
Natalia ta di e stad Kreminna, Region Luhansk. E tin 63 aña di edad. Natalia y su dos yiu muhernan a cuminsa studia Bijbel cu testigonan di Jehova den careda di e añanan 1990. Su yiu muhernan a progresa y batisa. Pero Natalia mes no a batisa. Tempo cu e guera a cuminsa, Natalia a compaña un famia cu ta Testigo ora nan a huy bay un luga mas safe. Natalia por a keda na un Salon di Reino na e stad Ivano-Frankivsk.
Natalia a bisa: “Despues di e bombardeonan teribel, mi tabata sinti mi asina malo cu m’a pensa cu lo mi no por smile mas. E rumannan a mustra mi hopi amor. Mi no a spera cu nan lo a cuida mi asina bon. Mi a cuminsa stima Jehova. Mi tabata lesa mi Bijbel hopi, y un ruman muher a ofrece mi un curso di Bijbel den e buki Bo Por Disfruta di Bida pa Semper! E ruman ey tabata manera un regalo di Jehova.” Natalia a sigui bisa: “Mi ta masha contento cu mi a logra batisa como un testigo di Jehova. Mi kier obedece e mandamento di mas grandi: stima Jehova mi Dios cu henter mi curason, cu henter mi alma y cu henter mi mente.”—Mateo 22:37.
Olia, na Polonia, ta tene un pintura cu e tema di e congreso: Sigui Busca Paz!
Olia ta di e stad Cherkasy, y e tabata un publicador no batisa ora e guera a cuminsa. Dia 6 di maart, Olia a huy bay Polonia cu su yiu muher y su nieta. Olia a bisa: “Ora nos a yega Polonia nos tabatin solamente nos tas, pero e rumannan a cuida nos bon. Loke nos a pasa aden a convence mi cu Jehova su organisacion ta uni y cu Jehova ta guia su pueblo cu su spirito santo. Ademas, mi tabata mas determina pa dedica mi bida na Jehova. Jehova a yuda mi durante e momentonan di mas dificil di mi bida. Awor, mi kier sirbi Jehova y mustr’e cu mi ta aprecia loke el a haci pa mi.”
Yulia ta di Region Donetsk. E tin 18 aña di edad. El a lanta den un famia cu ta Testigo, pero nunca e no a logra batisa. El a conta un experencia di loke a pasa poco despues cu e guera a cuminsa. El a bisa: “Mi tabata benta riba vloer, y mi a bin realisa cu un ora pa otro mi por a muri. Henter e caya caminda mi famia tabata biba tabata destrui, pero nos tabata na bida ainda. Despues di e experencia ey, mi a cuminsa haci oracion na Jehova y medita riba su cualidadnan. Mi tabata hala mas cerca Jehova y mi no tabata duda mas pa dedica mi bida na Jehova. Jehova a contesta mi oracionnan, y asina el a mustra mi cu e tabata cerca di mi. Prome, mi tabata djis sa ken Jehova ta, pero awor, mi ta stim’e.” Dia 23 di juli Yulia a batisa.
David, di 11 aña di edad, prome cu su bautismo na Alemania
David tin 11 aña di edad. Ora e guera a cuminsa, David a huy bay Alemania cu su famia. E tabata un publicador no batisa for di tempo cu e tabatin 9 aña di edad. E tin gana di logra e metanan spiritual cu e tin. El a bisa: “Mi a dicidi di batisa pasobra mi ta stima Jehova y mi kier ta su amigo. Durante mi bautismo, mi tabata asina contento cu mi a cuminsa yora. Mi ta contento cu mi ta forma parti di Jehova su famia. Mi gusta conta otro hende tocante Jehova y su proposito pa humanidad. Pues, mi siguiente meta ta pa bira un pionero regular. Mi kier yuda e rumannan den congregacion tambe. Pues, mi ta spera cu lo mi por bira un sirbidor ministerial. Mi meta di mas grandi ta di bay traha na Betel. Di tempo cu mi a bishita Betel na Lviv na aña 2018, mi tabatin e soño pa bay traha na Betel.”
Olena ta di Kiev. El a bira un publicador no batisa na aña 2011. E tabata inactivo pa 10 aña. Na 2020, e ancianonan di su congregacion a tuma contacto cu ne, y nan a dun’e e foyeto Bolbe Serka Yehova. El a bisa: “Despues di nan bishita, mi a cuminsa studia Bijbel atrobe y bay reunion. Pero, despues di poco tempo, mi a stop atrobe. Durante e guera, Jehova a contesta mi oracionnan. Anto mi a realisa cu Jehova a proteha mi, mustra mi cu e ta stima mi y duna mi paz mental. Mi a huy bay Rumania, y eynan, mi a haya e Testigonan. E rumannan a mustra mi hopi amor y nan a cuida mi masha bon mes. Mi a sinti cu nan amor tabata manera un dushi deken cu Jehova a tapa mi cu ne.” Dia 23 di juli Olena a batisa. Por ultimo, el a bisa: “Mi ta hopi agradecido na Jehova cu e tabatin asina tanto pasenshi cu mi. Awor mi sa cu ‘pa tur cos mi tin forsa pa medio di esun cu ta duna mi poder.’”—Filipensenan 4:13.
E siguiente cifranan ta for di un informe cu nos a haya di Ucrania te cu 2 di augustus 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin tur cifra, pasobra ta dificil pa mantene contacto cu nos rumannan na tur parti di Ucrania.
Con Esaki A Afecta Nos Rumannan?
43 publicador a muri
97 publicador a ser herida
22.568 publicador a bandona nan cas pa bay otro luga di e pais cu ta mas safe
586 cas a ser destrui
613 cas tin daño grandi
1.632 cas tin daño leve
5 Salon di Reino ta completamente destrui
10 Salon di Reino tin daño grandi
37 Salon di Reino tin daño leve
Trabou di Yudansa
Tin 27 Comite di Yudansa na Ucrania
E comitenan a yuda 53.836 publicador haya otro luga mas safe pa keda
24.867 publicador a huy pa otro pais. Eynan, nos rumannan ta yudando e publicadornan ey