Gran parti di e infrastructura na algun parti di Ucrania a sufri hopi daño of a ser destrui debi na bombardeo. Pesey, hopi di nos rumannan no tin coriente. Pero nan no ta laga esey stroba nan di asisti na reunion of di participa den otro actividad teocratico.

Anastasia y Debora ta sirbi como pionero regular na Kiev. Nan a bisa cu pa por lo menos 12 ora pa dia nan no tin coriente. Ora nan tin coriente, nan ta carga nan aparatonan electronico. Asina, nan por uza nan pa wak reunion ora coriente bay. Ademas, nan ta cumpra data pa wak e reunionnan. Hopi biaha, e conexion di data ta wanta net te ora reunion caba.

E problemanan cu coriente ta pone cu nos rumannan ta haya nan cu otro dificultad. Algun di nan no tin suficiente verwarming. Tin biaha, nan tin cu uza un generator cu ta pafo di cas pa nan por haya coriente y mantene nan cas cayente. Otro ruman ta bay cerca nan famianan cu si tin verwarming. Nos ta contento cu hopi di nos rumannan tin cas of apartamento cu tin verwarming via e red di gas. Pues, nan ta sigui haya gas a pesar di e blackoutnan.

Iryna ta un pionero cu ta biba na e stad Ivano-Frankivsk. E ta purba di keda positivo den e situacion dificil aki. E ta bisa: “Mi a dicidi cu mi no ta bay concentra riba cos cu mi no tin control ariba. Pues, mi ta purba di no preocupa mucho cu e cosnan cu lo pasa den futuro; mi ta djis enfoca riba loke ta pasando den e oranan cu tin mi dilanti. Mi ta purba di pensa di antemano loke mi por haci durante un blackout y haci sigur cu mi tin e publicacionnan cu mi tin mester.”

Maske nos rumannan ta enfrenta varios dificultad, nan ta sigui haci tur loke nan por den nan sirbishi pa Jehova. Nos ta sigur cu Jehova lo sigui bendiciona tur nan esfuersonan pa “haci loke ta bon.”—Galationan 6:9.

E siguiente cifranan ta for di un informe cu nos a haya di Ucrania te cu 6 di december 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin tur cifra, pasobra ta dificil pa mantene contacto cu nos rumannan na tur parti di Ucrania.

• 47 publicador a muri

• 97 publicador a ser herida

• 11.537 publicador a bandona nan cas pa bay otro luga di e pais cu ta mas safe

• 590 cas a ser destrui

• 645 cas tin daño grandi

• 1.722 cas tin daño leve

• 7 Salon di Reino ta completamente destrui

• 19 Salon di Reino tin daño grandi

• 68 Salon di Reino tin daño leve

• Tin 27 Comite di Yudansa na Ucrania

• E comitenan a yuda 54.212 publicador haya otro luga mas safe pa keda

• 26.811 publicador a huy pa otro pais. Eynan, nos rumannan ta yudando e publicadornan ey