Mas o menos 3.000 cas di testigonan di Jehova na Ucrania a sufri daño of ser destrui desde cu e guera a cuminsa na februari 2022. Na augustus, e rumannan na Ucrania a cuminsa drecha algun di e casnan cu a sufri daño. Nan ta haci e trabounan ey caminda ta safe pa haci esey. Departamento di Trabou di Yudansa y Departamento Local di Diseño y Construccion ta supervisa e trabounan ey. E trabounan ta encera, entre otro, drecha dak cu a haya daño, cambia bentana y otro reparacion chikito. Tin biaha, ora ta trata di un cas cu a ser destrui, e rumannan ta comberti un garashi of schuur den un cas simpel. Te cu awor, e rumannan a logra caba cu 37 proyecto di construccion. Tin 48 proyecto di construccion andando.

No ta facil pa haci e trabounan di construccion durante un tempo asina turbulento. Pero e rumannan no a laga esey stroba nan di yuda den e trabounan di reconstruccion. Un ruman muher cu yama Svitlana tin 70 aña di edad, y e ta biba na e stad Velyka Dymerka, na Region Kiev. El a bisa: “Mi no tabatin placa pa drecha e dak y e parti dilanti di mi cas. Pero Jehova tabatin un sorpresa grandi pa mi. Mi rumannan den fe a bin haci e trabounan, y nan a caba tur cos den tres dia.”

Un ruman muher cu yama Nadiia ta biba na e stad Horenka, na Region Kiev. El a splica con e trabounan di construccion ta yudando e rumannan den e trabou di predica. El a bisa: “E trabounan di construccion ta dunando un testimonio grandi den nos comunidad. Hasta hende cu mi no conoce ta papiando tocante e amor cu e rumannan ta mustrando pa otro. Nan no por kere cu mi compañeronan den fe a bin yuda mi.”

Hasta e rumannan cu a perde nan cas ta yudando cu e trabounan. Por ehempel, e cas di Ruman Yevhen y Tetiana a ser destrui ora un bom a explota riba e cas. Na luga di keda sinti duele di nan mes, nan ta trahando duro pa yuda nan rumannan. Ruman Yevhen a bisa: “Semper nos tabata gusta yuda otro hende. Esey ta yuda nos trata cu nos mes problemanan.”

Un ruman muher cu yama Lidiia cu ta biba na e stad Hostomel, Region Kiev a haci algo similar. E rumannan a drecha Lidiia su cas. Esey a motiva Lidiia pa bay yuda cu e trabounan di yudansa. El a bisa: “Pa dos siman, 16 ruman homber y ruman muher a yuda drecha mi cas. Pa mi, tabata manera mi tabata den mundo nobo caba. Awor, mi tambe kier yuda otro ruman.”

Recientemente, un miembro di Comite di Sucursal di Ucrania a bishita e luganan caminda e rumannan ta haci trabou di yudansa pa anima e rumannan cu a perde nan cas. El a bisa: “Semper e rumannan di Ucrania ta mustra amor na otro. Sinembargo, durante e guera aki, e rumannan a bira mas pega cu otro. Ta bunita pa mira con nos kerido rumannan ta reacciona riba e yudansa cu nan ta haya: Nan ta sigui haci mas den e trabou di predica. Ademas, manera 2 Corintionan 9:12 ta bisa, nan ta mustra na varios manera cu nan ta agradecido na Dios.”

E siguiente cifranan ta for di un informe cu nos a haya di Ucrania te cu 20 di december 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin tur cifra, pasobra ta dificil pa mantene contacto cu nos rumannan na tur parti di Ucrania.

• 47 publicador a muri

• 97 publicador a ser herida

• 11.477 publicador a bandona nan cas pa bay otro luga di e pais cu ta mas safe

• 590 cas a ser destrui

• 645 cas tin daño grandi

• 1.722 cas tin daño leve

• 7 Salon di Reino ta completamente destrui

• 19 Salon di Reino tin daño grandi

• 68 Salon di Reino tin daño leve

• Tin 26 Comite di Yudansa na Ucrania

• E comitenan a yuda 54.212 publicador haya otro luga mas safe pa keda

• 26.892 publicador a huy pa otro pais. Eynan, nos rumannan ta yudando e publicadornan ey