For di 26 december 2022, pionero regular y pionero special por a cuminsa asisti na Scol di Pionero atrobe caminda ta safe pa haci esey. E pioneronan por asisti na e scol, sea en persona of via Zoom. Tur cos ta depende di e circunstancianan local. Nos rumannan ta haci tur loke nan por pa sigui e lesnan special aki. Nan ta haci esey a pesar di varios dificultad, manera bombardeo, blackout, problema financiero of mal conexion di Internet. Jehova a bendiciona nan ricamente pa nan esfuersonan.

Natalia cu ta biba na e stad Kryvyi Rih a bisa: “E scol di pionero tabata manera un salbabida pa mi. E scol a yuda mi pa mi no hoga den mi preocupacionnan y pa mi no laga miedo podera di mi.” Anastasia cu ta biba na e stad Chernivtsi a bisa algo similar: “E scol a convenc’e mi cu Jehova ta stima mi masha hopi. Hopi cos teribel a pasa aña pasa, pero e scol a bin net na ora. E scol a duna mi forsa pa sigui lucha pa ricibi e bendicionnan di Jehova.”

Svitlana ta un pionero cu ta biba na e stad Kitsman. Na prome instante, e tabata preocupa ora el a haya un invitacion pa asisti na e scol di pionero. El a splica: “Mi a bisa Jehova tur mi preocupacionnan, entre otro, mi preocupacion tocante placa. Mi a confia den dje, y e no a laga mi na caya. Jehova a cuida mi, y el a mustra mi cu e ta stima mi.” Svitlana su experencia a motiva su casa cu no ta Testigo pa cuminsa bay reunion di congregacion.

Na dos ocasion, algun pionero cu tabata den un scol di pionero na e stad Zhytomyr mester a busca refugio den un bodega pa motibo di un posibel atake di avion di guera. Nan a uza un fogon pa haci e camber cayente pa nan por sigui cu e lesnan. Un di e pioneronan ey cu yama Valentyna a caba di muda pa Zhytomyr. A pesar di e dificultadnan cu nan a pasa aden, el a bisa: “Nunca lo mi no lubida e scol aki. Mi tabata sinti manera mi tabata bon cuida bou di e halanan poderoso di Jehova.”

Mescos cu e pioneronan na otro pais, e pioneronan na Ucrania tabata masha contento mes pa tende tocante e cambio den e rekisitonan pa pionero. Despues di e anuncio, Yulia a bisa: “Mi tin masha hopi aprecio pa Jehova. Awe mainta, mi a roga Jehova pa yuda mi sigui traha den e trabou di pionero regular. Mi no tabata sa con lo el a yuda mi, pero mi tabatin sigur cu lo el a yuda mi. Despues cu mi a tende cu e rekisitonan di ora pa pionero a baha, mi a haya mas aprecio pa tur loke Jehova ta haci pa mi. E noticia aki cu nos a haya na final di e scol tabata manera e cherry riba e bolo.”

E siguiente cifranan ta for di un informe cu nos a haya di Ucrania te cu 24 di januari 2023. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin tur cifra, pasobra ta dificil pa mantene contacto cu nos rumannan na tur parti di Ucrania.

• 47 publicador a muri

• 97 publicador a ser herida

• 8.953 publicador a bandona nan cas pa bay otro luga di e pais cu ta mas safe

• 590 cas a ser destrui

• 645 cas tin daño grandi

• 1.722 cas tin daño leve

• 8 Salon di Reino ta completamente destrui

• 17 Salon di Reino tin daño grandi

• 76 Salon di Reino tin daño leve

• Tin 26 Comite di Yudansa na Ucrania

• 46 cas a ser drecha

• 5 Salon di Reino a ser drecha

• E comitenan a yuda 54.445 publicador haya otro luga mas safe pa keda

• 27.655 publicador a huy pa otro pais. Eynan, nos rumannan ta yudando e publicadornan ey