Nos ta sigui roga Jehova pa yuda nos rumannan na Mariupol. Ainda tin bringamento riba caya y bombardeo eynan. Ta cu masha tristeza, nos tin cu informa cu seis di nos rumannan a muri den e bombardeonan. Te aworaki, dies di nos rumannan a muri na Ucrania. Ademas, manera nos por a mira den noticia, un teatro a ser bombardia siman pasa. Tabatin 1.000 hende cu tabata busca refugio den e teatro ey. Niun di nos rumannan no a muri, pero algun di nan a ser herida levemente.

Mas o menos 750 di nos rumannan a bandona Mariupol; un 1.600 di nos rumannan a keda den e stad. Hopi di nan ta biba na Mariupol mes, den parti oost. E parti ey ta bou di control di Rusia.

Manera nos a bisa den un otro informe, un 200 di nos rumannan a busca refugio den bodega di un luga caminda tin un Salon di Reino y un Salon di Asamblea. Nos a logra comunica cu nan. Nan a bisa:

“Durante e bombardeo hopi di nos rumannan tabatin hopi miedo. Algun di nan tabata hasta yora. Ora nos tabata tende e explosionnan, nos a pensa cu sigur nos lo a muri di sea e explosionnan of di candela. Un anciano a sugeri pa nos canta cantica di nos buki di cantica. Prome, nos a canta cantica 10 y despues cantica 15. Ora e zonido di e explosionnan tabata bira mas y mas duro y e edificio tabata sacudi mas fuerte, nos tabata canta mas duro. Despues, nos a lesa Salmo 27 y nos a trat’e hunto. Caba, tur hende a cuminsa bisa kico ta nan texto faborito y con e texto ta anima nan ... Loke nos ta pasando aden ta convence nos cu Jehova ta ‘e Tata di tierno misericordia y Dios di tur consuelo’, kende por laga nos sinti calmo ora nos ta pasa den tempo dificil.”—2 Corintionan 1:3, 4.

Varios anciano y miembro di Comite di Yudansa ta haci tur loke nan por, hasta risca nan bida, pa yega cerca e rumannan pa duna nan cuminda y remedi. Tin biaha, ora e rumannan ey ta buscando nos rumannan den stad, nan tin cu gatia riba suela pa bala no alcansa nan. Nos ta masha orguyoso di nos rumannan, kendenan ta “risca nan bida” pa nan rumannan.—Romanonan 16:4.

No tin gas ni coriente mas na e stad. Pesey, nos ruman muhernan ta cushina pafo. Nan mester tin hopi curashi pa haci esey, pasobra ta masha peligroso. Ora e cuminda ta cla, e rumannan ta percura pa e publicadornan di edad y esnan deshabilita haya algo di come. Hopi ruman a perde nan cas, auto of otro cos material. A pesar di esey, nan ta masha agradecido pa tur loke nan rumannan ta haci pa nan.

E rumannan cu ta den luga di refugio ta sigui haci cos spiritual hunto. Nan ta studia Bijbel hunto, y ora nan haya oportunidad, nan ta predica na otro hende.

E siguiente cifranan ta for di un informe cu nos a haya di Ucrania te cu 22 di maart 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin sigur cu tur cifra ta cuadra, pasobra ta dificil pa mantene contacto cu nos rumannan na tur parti di Ucrania.

• 10 publicador a muri

• 27 publicador a ser herida

• 33.180 publicador a bandona nan cas pa bay otro luga di e pais cu ta mas safe

• 78 cas a ser destrui

• 102 cas tin daño grandi

• 484 cas tin daño leve

• 1 Salon di Reino ta completamente destrui

• 4 Salon di Reino tin daño grandi

• 18 Salon di Reino tin daño leve

• Tin 27 Comite di Yudansa na Ucrania

• E comitenan a yuda 25.069 publicador haya otro luga mas safe pa keda

• 14.308 publicador a huy pa otro pais. Eynan, nos rumannan ta yudando e publicadornan ey