Cu masha tristeza, nos tin cu informa cu, te cu 29 di maart 2022, shete ruman mas a muri na e stad Mariupol. En total, 17 di nos rumannan a muri na Ucrania.

Varios Comite di Yudansa na Ucrania ta traha nonstop pa duna nos rumannan yudansa. Nan ta hasta risca nan bida pa yega na nos rumannan den e luganan caminda tin bringamento.

Por ehempel, e rumannan cu ta traha hunto cu e comitenan a logra trece cuminda, remedi y otro cos esencial pa nos rumannan na e stadnan cu a sufri mas tanto daño, entre otro, Kharkiv, Kramatorsk y Mariupol. Un miembro di un di e comitenan mester a biaha 500 kilometer tur dia y pasa varios blokeo militar pa trece cuminda y remedi pa mas o menos 2.700 publicador.

E comitenan ta regla transporte pa saca nos rumannan for di e luganan caminda tin bringamento. Un ruman homber cu ta traha cu e comite di Chernihiv a bisa: “Ora e soldaatnan a cuminsa bombardia cas, nos a compronde cu ta mucho peligroso pa keda na Chernihiv. No tabatin coriente y Internet a cay afo. Pesey, e ancianonan mester a haci lihe pa informa tur publicador cu ta tuma refugio den bodega cu tin transporte pa yuda nan sali di e stad.”

Doño di un negoshi di transporte a bay di acuerdo pa uza su vannan y su busnan pa transporta e rumannan. El haci nuebe biahe pa logra salba 254 di nos rumannan na e stad Chernihiv. Na un ocasion, el a hasta drecha un caminda cu mashin grandi pa su bus por a pasa. Nos rumannan ta masha agradecido pa e yudansa ey.

Nos ta masha tristo pa e rumannan cu a perde ser keri den e guera aki. Nos ta anhela pa e tempo yega cu Dios su promesanan den Bijbel lo cumpli y cu lo no tin morto ni tristeza mas.—Revelacion 21:3, 4.

E siguiente cifranan ta for di un informe cu nos a haya di Ucrania te cu 29 di maart 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin sigur cu tur cifra ta cuadra, pasobra ta dificil pa mantene contacto cu nos rumannan na tur parti di Ucrania.

• 17 publicador a muri

• 35 publicador a ser herida

• 36.313 publicador a bandona nan cas pa bay otro luga di e pais cu ta mas safe

• 114 cas a ser destrui

• 144 cas tin daño grandi

• 612 cas tin daño leve

• 1 Salon di Reino ta completamente destrui

• 7 Salon di Reino tin daño grandi

• 23 Salon di Reino tin daño leve

• Tin 27 Comite di Yudansa na Ucrania

• E comitenan a yuda 34.739 publicador haya otro luga mas safe pa keda

• 16.175 publicador a huy pa otro pais. Eynan, nos rumannan ta yudando e publicadornan ey