Cu tristeza, nos ta anuncia cu mas di nos rumannan a muri pa motibo di e guera na Ucrania. Na tur, 28 testigo di Jehova a muri.

Manera nos por a mira den noticia internacional, den e prome siman di e guera, tabatin hopi bringamento na e pueblonan den cercania di Kiev. Na e luganan ey tin 4.900 publicador. Di e publicadornan ey, 3.500 a huy pa un luga mas safe.

E siguiente experencianan ta mustra cu nos rumannan na e luganan ey ta sigui demostra nan fe firme den Jehova a pesar di varios prueba grandi.

Oleksandr ta un anciano cu tabata biba na e stad Makariv. El a huy pa un luga mas safe na e parti central di Ucrania. Sinembargo, tabatin cuater publicador den su grupo cu e no a logra haya contacto cu ne; esey a preocup’e hopi. Pesey, el a bay bek na e luga caminda nan tabata biba pa wak si e por a haya nan. El a haci esey maske e tabata sa cu tabatin bringamento pisa eynan. El a conta: “Mi sa cu Jehova ta balora su sirbidornan hopi ... Ora m’a yega dilanti di cas di un di e publicadornan, mi a mira cu bom a cay den cura di e publicador. E porta di bodega di su cas tabata cera y niun hende na e cas no tabata contesta mi yamadanan. Esey a preocupa mi hopi.” Oleksandr a kibra e porta pa drenta e bodega. Eybou, el a topa un grupo di hende cu a keda wak e. Ta ken nan tabata? Tabata e publicadornan y algun bisiña cu no ta Testigo cu a busca refugio cerca e publicadornan.

Un di e publicadornan cu tabata den e bodega yama Yaroslav. El a bisa cu nan a keda den e bodega pa ocho dia. El a conta: “Nos tabatin djis algun buscuchi y un glas di awa pa persona pa dia. Nos tabata lesa Bijbel y nos publicacionnan, haci oracion y anima otro. Ora mi a tende Oleksandr ta grita mi nomber pafo, m’a pensa cu e soldaatnan a bin pa bay cu mi. M’a pensa cu sigur mi ta bay muri ... [Pero,] el a salba nos tur. Nos ta masha agradecido na Jehova cu nos tin un famia spiritual cu ta asina amoroso. Nan ta resa pa nos, y nan ta hasta risca nan bida pa salba nos.”

Ruman Pylyp y un otro ruman homber a dicidi di bay hiba cuminda pa e rumannan cu ainda tabata na e pueblo Borodianka. Nan a bay e pueblo dia 17 di maart. Na caminda pa e pueblo, algun soldaat a confisca e auto di Ruman Pylyp y e cuminda cu nan tabatin. Despues, e soldaatnan a aresta e dos rumannan. E soldaatnan a bui e rumannan, tapa nan wowo y cera nan den un camber chikito den un bodega. E soldaatnan a laga nan eynan hunto cu shete otro homber. Dos dia despues, algun vigilante a cera e rumannan den un otro cel, caminda nan a bati e rumannan henter anochi. Ruman Pylyp a bisa: “Mi no tabata sa si mi lo a keda na bida. M’a haci oracion pa mi keda fiel na Dios.”

Na un ocasion, mientras cu nan tabata bati Ruman Pylyp, el a pidi Jehova na bos halto pa yuda e ruman muhernan di edad avansa cu no tabatin cuminda y pa proteha su famia. Ademas, el a gradici Jehova pa tur e añanan bunita cu e por a sirbi Jehova. Dado momento, e vigilante a trece Ruman Pylyp bek na su cel. Eynan, Ruman Pylyp a sigui pidi Jehova pa yuda e soldaatnan compronde cu e rumannan no ta peligroso. Ruman Pylyp y e otro ruman homber a cuminsa predica na e vigilantenan. Pa dos dia largo, nan a predica na tur e vigilantenan cu tabatin shift e dianan ey. Un di e hombernan cu tabata cera cu nan tabata interesa pa tende e mensahe di Bijbel. El a gradici e rumannan. Dia 27 di maart, e dos rumannan y e persona cu a mustra interes a sali liber.

Svitlana ta un ruman muher soltera cu tabata biba na Bucha. Pa dos siman largo, e no por a bandona e area caminda tabatin bringamento. El a bisa: “Awor, di berdad, mi ta compronde con precioso e paz cu Jehova ta duna nos ta. Ora nos tin e paz ey, esey no kiermen cu semper nos sa kico pa haci. Pero ora nos no ta mira un solucion pa nos problemanan, nos ta confia completamente den Jehova.”

Ruman Svitlana a biaha pa un luga mas safe na Ucrania. Na caminda, el a duna testimonio na un señora y e señora su subrino. Ora nan tur a yega na un luga mas safe, un famia cu ta Testigo a duna nan un bonbini. E famia Testigo a laga Ruman Svitlana y e señora cu su subrino keda na nan cas e anochi ey. Su siguiente dia, e señora a puntra si e por asisti na un reunion di congregacion y si e por haya un Bijbel y literatura. Ruman Svitlana a keda den contacto cu e señora.

E siguiente cifranan ta for di un informe cu nos a haya di Ucrania te cu 12 di april 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin sigur cu tur cifra ta cuadra, pasobra ta dificil pa mantene contacto cu nos rumannan na tur parti di Ucrania.

• 28 publicador a muri

• 48 publicador a ser herida

• 40.778 publicador a bandona nan cas pa bay otro luga di e pais cu ta mas safe

• 278 cas a ser destrui

• 268 cas tin daño grandi

• 746 cas tin daño leve

• 1 Salon di Reino ta completamente destrui

• 9 Salon di Reino tin daño grandi

• 26 Salon di Reino tin daño leve

• Tin 27 Comite di Yudansa na Ucrania

• E comitenan a yuda 41.974 publicador haya otro luga mas safe pa keda

• 18.097 publicador a huy pa otro pais. Eynan, nos rumannan ta yudando e publicadornan ey