Nos ta masha contento pa informa cu e rumannan na tur parti di Ucrania a conmemora e morto di Hesus. Esey tabata un bunita bendicion di Jehova. Hopi di e rumannan cu mester a huy pa otro luga mas safe a uza varios Salon di Reino na parti west di Ucrania pa tene nan Conmemoracion. Den mayoria di caso, e rumannan a tene nan Conmemoracion den grupo chikito. Nan a laga e rumannan cu no por a sali di cas conecta via sistema di conferencia di video.

Na mayoria parti di Ucrania, durante casi henter dia di Conmemoracion tabatin zonido di alarma pa avisa di un posibel atake di avion di guera. Pero, pa anochi, no tabatin zonido di alarma mas. Ruman Sherhiy cu ta biba na Druzhkivka, region Donetsk a bisa: “Nos tabata pidi Jehova pa e bombardeonan no stroba e Conmemoracion. Anto net prome cu e Conmemoracion a cuminsa, e bombardeonan a stop y e zonido di alarma tambe a para.”

Tabatin un grupo di publicador di edad avansa na Nemishaeve, cerca di Kiev, cu no por a bay reunion pa mas cu un luna. Nan tabata pidi Jehova pa yuda nan bay Conmemoracion. Un anciano cu yama Vitaliy a yuda e grupo tene e Conmemoracion. Ruman Vitaliy a bisa: “No tabatin coriente ni calefaccion (verwarming). Pues, nos mester a tene e Conmemoracion cu flashlight. Ademas, nos no por a toca e canticanan. Pesey, mi yiu muher a toca un violin pa yuda nos canta e canticanan.”

Un anciano cu yama Oleksandr ta biba caminda tin bringamento. El a bisa: “Durante e campaña di invita hende pa e Conmemoracion, nos no por a skirbi carta pa hende den nos teritorio, pasobra bom a cay riba e casnan y varios cas tabata bandona. Pesey, nos a invita nos conocinan, hende cu nos a topa den bodega of hende cu a evacua nan stad. Hopi di e personanan ey nunca a scucha e Testigonan. Hopi di nan a join nos pa Conmemora Hesus Su Morto.”

Nos no a haya cifra di tur congregacion na Ucrania ainda. Pero, te cu aworaki, nos sa cu mas cu 210.000 persona a asisti na e Conmemoracion.

Un ruman na Ucrania a expresa con e ta sinti tocante e Conmemoracion di Hesus Su Morto. El a bisa: “Manera faro ta sigura hende cu ta nabega riba lama cu nan ta cerca di costa, asina cada Conmemoracion ta sigura mi cu Jehova su dia ta cerca. E aña aki, e Conmemoracion a convence mi mas ainda di esey.”

E siguiente cifranan ta for di un informe cu nos a haya di Ucrania te cu 21 di april 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin tur cifra, pasobra ta dificil pa mantene contacto cu nos rumannan na tur parti di Ucrania.

• 35 publicador a muri

• 60 publicador a ser herida

• 43.792 publicador a bandona nan cas pa bay otro luga di e pais cu ta mas safe

• 374 cas a ser destrui

• 347 cas tin daño grandi

• 874 cas tin daño leve

• 1 Salon di Reino ta completamente destrui

• 10 Salon di Reino tin daño grandi

• 27 Salon di Reino tin daño leve

• Tin 27 Comite di Yudansa na Ucrania

• E comitenan a yuda 44.971 publicador haya otro luga mas safe pa keda

• 19.961 publicador a huy pa otro pais. Eynan, nos rumannan ta yudando e publicadornan ey