E situacion na Ucrania ta keda masha dificil. Pesey, e sucursal di Ucrania ta haci extra esfuerso pa bishita e rumannan pa asina anima nan. Varios ruman homber ta trahando duro pa haci bishita di animacion na miles di ruman cu a haya nan ta muda pa motibo di e guera. E bishitanan ey ta dunando bon resultado. Un miembro di Comite di Sucursal a bishita algun ruman na parti west na Ucrania. Despues di e bishita, un ruman muher cu ta kedando cu 30 otro ruman na un Salon di Reino na Uzhgorod a bisa: “M’a sinti comosifuera Jehova a duna mi un brasa duro.”

E ruman hombernan ta haciendo nan best pa anima mas o menos 100 ruman cu ta forma parti di e Comitenan di Yudansa. Ihor, un miembro di un Comite di Yudansa a bisa: “Ta despues cu ami cu mi casa a haya nos ta muda y keda na cas di algun ruman, mi a haya e asignacion pa sirbi den e Comite. Un biaha, ora nos tabata bastante cansa, un miembro di Comite di sucursal cu tambe tabata bastante ocupa a duna nos un bishita di animacion. El a scucha nos cu masha atencion. Nos por a mira cu e tabata masha interesa den nos. Tin biaha, nos ta sinti manera ta mucha nos ta y cu nos tin masha poco control riba nos situacion. Pero, ora nos ta sinti nos asina, sin sa kico pa haci, nos ta resa pa Jehova guia nos. Hopi bes, nos ta mira con Jehova ta yuda nos.”

Nos por bisa lo siguiente tocante e Salonnan di Reino den e areanan di guera: 4 Salon a ser destrui completamente, 8 a haya hopi daño y 33 a haya daño leve.

E siguiente cifranan ta for di un informe cu nos a haya di Ucrania te cu 17 di mei 2022. E cifranan aki ta basa riba informe veridico di nos rumannan na Ucrania. Sinembargo, posiblemente, e cifranan ta hopi mas halto. Nos no tin tur cifra, pasobra ta dificil pa mantene contacto cu nos rumannan na tur parti di Ucrania.

• 37 publicador a muri

• 74 publicador a ser herida

• 45.253 publicador a bandona nan cas pa bay otro luga di e pais cu ta mas safe

• 418 cas a ser destrui

• 466 cas tin daño grandi

• 1.213 cas tin daño leve

• 4 Salon di Reino ta completamente destrui

• 8 Salon di Reino tin daño grandi

• 33 Salon di Reino tin daño leve

• Tin 27 Comite di Yudansa na Ucrania

• E comitenan a yuda 48.806 publicador haya otro luga mas safe pa keda

• 21.786 publicador a huy pa otro pais. Eynan, nos rumannan ta yudando e publicadornan ey