Den e luna di augustus 2014, testigonan di Jehova rond mundo a distribui un tratado pa duna publicidad na e website jw.org. Como resultado, durante e luna ey casi 65 miyon hende a bishita e website. Esey ta 20 porciento mas cu normal. En total, casi 10.000 hende a pidi un curso di Bijbel via di e website, locual ta 67 porciento mas cu e luna prome. Pues, e campaña aki tabata un yudansa pa tur tipo di hende.

Den lift, un Testigo na Canada a cuminda un señora cu yama Madeline y a mustr’e e tratado di e campaña Unda Bo Por Haya Contesta pa e Preguntanan Importante di Bida? Madeline a bis’e cu e anochi prome, ora e tabata riba su balcon, el a roga Dios pa yud’e haya contesta pa preguntanan asina. Den pasado el a yega di yama varios misa pa pidi un curso di Bijbel, pero niun di nan no a yam’e bek. Awor el a cuminsa haya un curso di Bijbel cerca e Testigonan.

Na Filipinas, un Testigo cu yama Rowena a papia cu un homber Chines cu tabata para dilanti di un restaurant fast-food. El a dun’e un tratado y a splic’e cu testigonan di Jehova ta duna hende curso di Bijbel gratis.

E homber a bis’e cu nunca el a yega di mira un Bijbel. E combersacion a motiv’e p’e asisti na un asamblea di testigonan di Jehova. Despues di esey el a bisa cu e tabatin gana di haya sa mas tocante Bijbel y cu e kier a download e for di nos website.

Guillermo, un Testigo sordo na Spaña, a topa Jorge, un ex-compañero di scol cu tambe ta sordo. Jorge a cont’e cu su mama a caba di fayece y cu e tabatin hopi duda y pregunta. E ora ey Guillermo a dun’e un tratado y a splic’e cu riba jw.org e por haya informacion den idioma di seña cu lo por contesta hopi di su preguntanan. Tambe el a invita Jorge na un reunion na nan Salon di Reino. Jorge a bay, y for di e dia ey e no a falta niun reunion, a pesar cu e ta biba 60 kilometer leu for di e salon.

Dos pareha Testigo na Groenland a haci un biahe costoso di seis ora den un boto chikito pa bay na un pueblo di 280 habitante. Ey nan a predica, parti tratado y laga e hendenan wak un video riba jw.org den e idioma Groenlandes. Tambe nan a cuminsa un curso di Bijbel cu un pareha cu nan a topa. Awor nan ta dirigi e curso ey dos biaha pa siman via telefon.

No ta na Noordpool so e esfuersonan aki a ser haci. E Testigonan na Nicaragua tambe a plania pa parti e tratado aki pa hende di e idioma Mayangna cu ta biba den e selvanan cu ta keda na e banda di Lama Caribe. Pa yega eynan, nan mester a core 20 ora nonstop den un bus tur kibra riba un caminda yen di buraco y despues mester a cana 11 ora largo, tin bes den lodo hundo. Ora nan a yega, nan a parti tratado pa e hendenan cu ta biba den e area ey, kendenan a keda hopi asombra y tambe contento di por a wak algun video den nan idioma.

Na Brazil, un Testigo cu yama Estela a ofrece e tratado na un homber cu tabata nabega y cu a pasa na un stad chikito den e selva di Amazona. E homber a tuma e tratado, pero e no a mustra mucho interes den dje y a hinc’e den su saco. Riba caminda pa cas, e motor di su boto a daña y e mester a keda riba e riu. Mientras cu e tabata warda yudansa bin, el a lesa e tratado. Despues el a uza su celular pa subi jw.org, lesa varios articulo y download algun video. Algun dia despues e homber a topa casa di Estela y a pidie p’e gradici Estela pa e tratado. El a bisa: “E articulonan cu mi a lesa a yuda mi keda trankil mientras mi tabata warda un boto bin rescata mi. Mi yiunan gusta e videonan di Caleb. Lo mi sigui bishita jw.org.”