Poco tempo pasa, un mucha di 10 aña cu yama Hugo a ricibi un Premio Diana for di un institucion di obra di caridad Britanico pasobra el a yuda su coleganan di scol deal cu bullying.

Hugo a bisa: “Mi ta debe e premio aki na e video Defende Bo Mes Contra Bullying sin Bringa. Danki na loke mi a siña di e video ey riba jw.org, mi por ta un embahador contra bullying na scol.”

Hugo a mustra e video na su maestronan prome. Nan a keda asina impresiona cu nan a haci areglo pa e website ta disponibel pa tur e studiantenan di scol. Hopi di e muchanan di entre 8 pa 10 aña di edad na Hugo su scol ta uza jw.org regularmente. Nan a bisa cu e website no solamente a yuda nan pa enfrenta bullying pero tambe a yuda nan haya contesta pa preguntanan manera: Con mi por haya berdadero amigo?

Na un otro scol na Inglatera, un mucha homber di ocho aña cu yama Elijah tambe tabata victima di bullying. Hunto cu su famia nan a analisa e video Defende Bo Mes Contra Bullying. Despues nan a train kico e por bisa y haci ora nan bin ter e. Esaki a duna Elijah curashi pa enfrenta e situacionnan ey. Algun tempo despues durante siman di anti-bullying, e hoofd di scol di Elijah a mustra e video na henter e scol.

Claro cu bullying no ta un problema cu ta sosode solamente na Inglatera. E ta algo cu ta sosode rond mundo, y e video Defende Bo Mes Contra Bullying ta yudando muchanan tur caminda.

Na Merca, un mucha muher di 10 aña cu yama Ivie tabatin miedo di un colega di klas cu tabata ter e. Despues cu el a wak e video Defende Bo Mes Contra Bullying, Ivie a haya curashi pa enfrenta e mucha muher. Tambe el a papia cu su juffrouw, kende a yud’e cu e situacion. E colega di klas a pidie despensa y awor e cu Ivie ta bay bon cu otro.

Testigonan di Jehova ta interesa den e bienestar di hobennan. Pesey, nos ta sigui publica informacionnan practico pa yuda nan trata cu problema di bida diario manera bullying.