For di december 2012, testigonan di Jehova na Tailandia tabatin un campaña special pa yuda alumnonan tin exito na scol. Binti testigo di Jehova a bishita varios scol na Bangkok. Nan a reuni cu e director di scol y a ofrece e maestro- y alumnonan e ¡Despertad! di october 2012 cu tin e tema “Con pa Logra Exito na Scol.”

E campaña tabata asina exitoso cu e Testigonan a sigui cu ne den henter e pais. Den un aña y mey nan a bishita 830 scol. Alumnonan y maestronan tabata asina ansioso pa haya nan copia di e revista ¡Despertad! cu mester a re-imprimie tres biaha pa asina nan tur por a haya un. Inicialmente ta solamente 30.000 copia a ser imprimi di e ¡Despertad! Sinembargo, e tema tabata asina popular cu a distribui mas cu 650.000 di e revista aki.

Directornan di scol y maestronan a reconoce e balor di e revista ¡Despertad! Un meneer a bisa: “E revista a yuda nos studiantenan tin un bon relacion cu nan famia y pa pone bon meta.” Algun scol a uza e material den nan curriculum. Otronan a uz’e pa les di lesamento. Na un scol, e alumnonan mester a skirbi un opstel tocante un di e articulonan den e revista. Esun cu a haci e mihor opstel a gana un premio.

Un studiante a bisa cu el a gusta e articulo “Con pa gana e bataya contra obesidad infantil y hubenil”, cu ta den e revista. El a splica cu obesidad ta un problema comun y cu su amigonan no ta gusta papia tocante esey. El a bisa: “Danki pa duna nos consehonan cu ta facil pa compronde y aplica.”

Mayornan tambe a aprecia e revista. Un mama a expresa su gratitud pa e revista na un Testigo cu a bishit’e, el a bisa: “E tin bon consehonan pa yuda mi yiu muher siña mihor na scol.”

Un vocero pa testigonan di Jehova, Pichai Petratyotin, a bisa: “ E ¡Despertad! ta enfatisa e sabiduria cu tin den Bijbel cu te awe ainda ta practico pa nos. Como testigonan di Jehova nos ta haya educacion hopi importante, y pesey nos ta contento cu nos por a distribui e revista aki gratis pa tur hende.”