Hopi turista ta bishita e famoso waterval pega cu e stad Pagsanjan na Filipinas. Mi tata, Nardo Leron, a crece eynan den pobreza. Debi na e corupcion cu e tabata mira den gobierno, cuerpo policial y na su trabou, el a bira amarga y rabia.

 Mi mayornan a traha duro pa lanta nan ocho yiunan. Hopi biaha nan tabata keda hopi dia for di cas pa cuida e cosecha den e seronan. Constantemente, ami cu mi ruman homber mayo, Rodelio, mester a percura pa nos mes y hopi bes nos a pasa hamber. Como mucha, masha poco nos por a hunga. Ora nos a haci shete aña, nos tur mester a cuminsa traha den cunucu. Nos tabatin cu carga saco di coco pisa y subi sero steil. Si e carga tabata mucho pisa pa hisa, nos mester a lastr’e bay cu ne.

 Nos tata tabata bati nos, pero tabata mas doloroso pa wak con e tabata bati nos mama. Nos tabata purba di stop e, sin por a logra. Ami cu Rodelio a palabra den secreto cu ora nos bira grandi nos ta mata nos tata. Cuanto mi a anhela di tin un tata cu a stima nos!

 Mi tabata asina frustra y rabia debi na mi tata su actitud violento cu mi a bay fo’i cas cu mi 14 aña. Pa un tempo mi a biba riba caya y a cuminsa huma marihuana. Despues mi a cuminsa traha riba un boto cu tabata hiba turista na e waterval.

 Algun aña despues, mi a cuminsa studia na e universidad na Manila. Pero, debi cu mi mester a bay Pagsanjan den weekend pa traha, mi no tabatin masha tempo pa studia. Mi bida tabata dificil y sin sentido, y marihuana no tabata calma mi ansiedadnan mas. Mi a cuminsa experimenta cu metanfetamina, cocaina y heroina. Droga hopi bes a hiba mi na inmoralidad sexual tambe. Tur rond di mi tabatin pobreza, inhusticia y sufrimento so. Mi tabatin rabia riba e gobierno y a culp’e pa tur e problemanan ey. Mi a puntra Dios: “Dicon bida ta asina?” Pero mi no a haya niun contesta den e diferente religionnan cu mi a investiga. Mi a cuminsa uza mas droga pa calma mi desesperacion.

 Na aña 1972, e studiantenan na Filipinas a organisa varios protesta contra e gobierno. Mi a participa den un di e protestanan ey cu a bira masha violento. Hopi hende a ser aresta, y algun luna despues, nan a establece un ley militar contra e tipo di protestanan ey den henter e pais.

 Un biaha mas mi a bin termina riba caya, pero e biaha aki cu miedo di autoridad, pasobra mi a participa den e protestanan. Pa financia mi adiccion na droga, mi a bolbe cuminsa horta y finalmente a ofrece servicio sexual na hende rico y na stranhero. Mi no tabatin cu nes si mi a biba of muri.

 Mientrastanto, mi mama y mi ruman homber mas chikito a cuminsa studia Bijbel cu testigonan di Jehova. Mi tata a rabia masha y a kima nan literatura biblico. Pero, nan tur dos a persevera y a batisa como testigo di Jehova.

 Un dia, un testigo di Jehova a papia cu mi tata tocante e promesa biblico di un futuro den cua lo tin berdadero husticia tur caminda riba Tera. (Salmo 72:12-​14) E speransa aki a atrae mi tata asina tanto cu el a dicidi di investiga esey pa su mes. Den Bijbel el a haya sa, no solamente di Dios su promesa di un gobierno husto, sino tambe loke Dios ta rekeri di esposo y tata. (Efesionan 5:​28; 6:4) Djis un poco tempo despues, mi tata y tur mi rumannan a bira Testigo. Debi cu mi tabata leu for di cas, mi no tabata sa nada di esaki.

 Na aña 1978, mi a muda bay Australia. Pero hasta den e pais pacifico y prospero ey, mi no por a haya paz mental. Mi a sigui uza droga y alcohol. Mas despues den e aña ey, e testigonan di Jehova a bishita mi. Mi a gusta loke nan a mustra mi den Bijbel tocante un mundo pacifico, pero tabata dificil pa mi confia den nan.

 Djis un poco despues, mi a bay Filipinas bek pa un par di siman. Mi rumannan a bisa mi cu mi tata a haci hopi esfuerso pa bira un mihor persona, pero mi tabatin asina tanto rencor cu mi a evita tur contacto cu ne.

 Mi ruman muher mas chikito a siña mi, for di Bijbel, dicon bida ta yen di sufrimento y inhusticia. Mi a keda asombra con un mucha muher teenager cu masha poco experencia di bida por a duna mi contesta riba mi preguntanan. Prome cu mi a bay, mi tata a duna mi e buki Bo por biba pa semper den Paradijs riba tera. a El a bisa: “Stop di busca. E buki aki lo yuda bo haya bo contestanan.” El a anima mi pa busca e testigonan di Jehova ora mi yega Australia.

 Mi a sigui mi tata su conseho y a haya un Salon di Reino cerca di mi cas na Brisbane. Mi a acepta un estudio di Bijbel. E profecianan di Bijbel, manera esnan na Daniel capitulo 7 y na Isaias capitulo 9, a mustra mi cu Dios su Reino, cu ta completamente liber di corupcion, lo goberna riba nos den futuro. Mi a siña cu nos lo disfruta di un paradijs aki riba Tera. Mi a desea pa ta aceptabel den Dios su bista. Pero, mi a realisa cu e ora ey mi mester a domina mi emocionnan, stop cu mi adiccion na droga y alcohol y stop di hiba un bida inmoral. Mi a termina e relacion cu e mucha muher cu mi tabata biba cu ne y a stop cu mi adiccionnan. Segun cu mi confianza den Jehova Dios a sigui crece, mi a pidie den oracion pa yuda mi haci mas cambio.

 Gradualmente, mi a nota cu loke mi ta siña di berdad por cambia un persona completamente. Bijbel ta bisa cu si nos haci esfuerso, nos por bisti un “personalidad nobo.” (Colosensenan 3:9, 10) Segun cu mi tabata purba di haci esaki, mi a realisa cu loke mi a tende di e cambionan den mi tata su personalidad por tabata berdad. En bes di sinti rabia y rencor, mi kier a haci paz cu ne. Porfin mi a pordona mi tata y a kita e odio cu mi tabatin contra dje for di infancia.

 Como hoben, hopi bes mi a imita e mal conducta di otronan. E spiertamento di Bijbel a resulta di ta berdad den mi caso—mal compania a hiba mi den mal caminda. (1 Corintionan 15:33) Pero mi a haya berdadero amigo entre e testigonan di Jehova, y nan a yuda mi bira un mihor persona. Entre nan tambe mi a conoce mi kerida esposa Loretta. Hunto nos ta siña otro hende con Bijbel por yuda nan.

 Danki na Bijbel mi a mira mi tata bira un persona cu nunca mi a pensa cu lo e bira—un esposo amoroso pa mi mama y un cristian humilde cu ta stima paz. Ora cu nos a topa na aña 1987 despues cu mi a batisa como testigo di Jehova, mi tata a brasa mi pa prome biaha den mi bida.

 Pa mas cu 35 aña, mi tata a sigui traha hunto cu mi mama, y a comparti e speransanan di Bijbel cu otro hende. El a bira un homber diligente y cariñoso, conoci como un persona cu gusta yuda. Durante e añanan ey mi a siña respet’e y stim’e. Mi ta orguyoso di ta su yiu. Mi tata a fayece na aña 2016, pero mi ta cord’e cu hopi cariño. Mi sa cu nos dos a haci cambio grandi den nos personalidad ora cu nos a aplica e principionan di Bijbel. Mi odio a disparce por completo. Mi ta masha agradecido cu mi a conoce mi Tata celestial, Jehova Dios, kende a priminti di caba cu tur e problemanan cu famia rond mundo ta enfrenta.